«Ab čym dryžyć moj kožny kvant». Usłuchalisia ŭ pieśni rašuča biełaruskamoŭnaha alboma «Piatli prychilnaści»
15 hadoŭ tamu minskaja rok-hrupa «Piatla prychilnaści» vypuściła svoj pieršy albom «Vsiem dovolen». Rasijskija muzyčnyja krytyki nazvali reliz najlepšym na ruskaj movie. Sami muzyki nikoli nie pryličvali siabie da tak zvanaha «ruskaha roku», jany prosta śpiavali pra blizkija lubomu postsavieckamu čałavieku rečy: słabaści i zaležnaści maleńkaha čałavieka, šeryja piejzažy za aknom i paŭsiadzionnaść, u jakoj niama pierśpiektyŭ. Ale novy albom «Supierpazicyja» adkryvaje i novy etap u tvorčaści kultavaha biełaruskaha post-pank-hurta, piša Mikoła Buhaj.
Och i składanuju mietafaru vybrała «Piatla prychilnaści» dla nazvy svajho novaha alboma. Hałavałomnym terminam «supierpazicyja» apisvajecca źmiašeńnie niekalkich stanaŭ, niekalkich sposabaŭ pierachodu z pačatkovaha stanu ŭ kancavy — stan, paradaksalny z punktu hledžańnia našaha štodzionnaha vopytu.
Prykładam moža być ekśpierymient z katom Šrodzinhiera, u jakim uźnikaje kvantavaja supierpazicyja žyvoha i miortvaha kata.
Pryncyp supierpazicyi, jak i ŭvohule kvantavaja miechanika — a adna z centralnych piesień alboma nazyvajecca «Kvant», — prymianialny nie tolki da mikra-, ale i da makraabjektaŭ.
Źmianiŭsia Illa, źmianiłasia «Piatla»
Naš rehijon apynuŭsia ŭ paradaksalnym stanie pierachodu. Mahčyma, hety praces užo zavieršany, a my ŭsio jašče nie ŭśviedamlajem hetaha. Jak tak moža być, što vajna heta mir? Jak tak moža być, što niazhoda heta turma? Jak tak moža być, što svaboda heta rabstva?
Niekali lidar hurta Illa Čarapko pryznavaŭsia, što jamu brakuje śmiełaści, kab pačać pisać pa-biełarusku. Źmianilisia abstaviny, źmianiŭsia Illa, źmianiłasia «Piatla».
Punkt zboru dla evakuacyi
Pieršaja detal, jakaja kidajecca ŭ vočy jašče da taho, jak pačynaješ słuchać «Supierpazicyju», — jaje vokładka.
Jana litaralna kryčyć svaim kisłotna-zialonym koleram dy adsutnaściu tekstu i vybivajecca z ahulnaj dyskahrafii.
Heta krychu źmienieny znak punktu zboru ludziej dla evakuacyi. Znak strašnaj rečaisnaści, u jakoj vymušanyja žyć muzyki i słuchačy hurta. Ci rychtavacca da jaje.
Pieršy trek na albomie — «Kvant», jaki vychodziŭ niekalki miesiacaŭ tamu sinhłam. Muzyčna i tekstava — heta staraja-znajomaja «Piatla». Tolki
za try hady, jakija prajšli z vychadu papiaredniaha łonhpłeja, u śpiektr temaŭ hurta dadalisia i novyja: isnavańnie siarod strachu, niemahčymaść abaranić siabie dy blizkich i niemahčymaść uciačy ad hetaj realnaści. Voś «ab čym dryžyć moj kožny kvant», havoračy radkom ź pieśni «Kvant».
Ale paśla tryvožnaha «Kvanta» idzie piaščotnaja pieśnia «Ałocha», u jakoj niama miesca strachu. Stvarajecca davoli dziŭnaje adčuvańnie, byccam paśla paničnaj ataki. Adnak rassłablacca rana — dalej Čarapko i kampanija buduć katać słuchača na emacyjnych amierykanskich horkach. Ci stvarać efiekt sihnału pavietranaj tryvohi.
Chočacca słuchać jašče i jašče
Toje samaje možna skazać i pra muzyčny składnik «Supierpazicyi»: pieśnia «Katastrofa» — heta čystaja elektronika, bolš typovaja dla inšaha hurta Čarapko — «Kasijapieja». A trek «Žyćcio jak žach» da alboma dajšoŭ u pavolnaj akustyčnaj viersii, jakaja stvaraje efiekt poŭnaha dysanansu z tekstam. Ale nie robić jaho horšym.
Paśla «Žachu» raptam idzie aptymistyčnaja pieśnia «Štości dobraje», jakaja zakryvaje «Supierpazicyju». Źbiraje rastruščanaha słuchača, udychaje ŭ jaho žadańnie žyć i kładzie jamu ŭ ruki nadzieju. Muzyka ścichła, a razumieńnia, što heta było, pakul nie źjaviłasia. Tamu chočacca słuchać jašče i jašče.
Forma adkazu — vybar movy
«Albom ab pačućciach naziralnika za katom Šrodynhiera. U roli kata — naša z vami ŭsichnaja budučynia. Ab rospačy, praz pryzmu jakoj usio ŭžo vyhladaje miortvym, i nadziei, jakaja dazvalaje bačyć jaho žyvym. Pra nievynosnaść pieražyvańnia supierpazicyi abjekta naš novy pop-albom», — tak charaktaryzuje jaho sam hurt.
«Supierpazicyja» vychodzić za ramki mahčymaściaŭ taho samaha «maleńkaha čałavieka», jaki byŭ u centry ŭvahi ŭsie 15 hadoŭ. Ciapier taki čas, što, kab vyžyć, jamu davodzicca zmahacca za vyžyvańnie.
I chto jak nie «Piatla prychilnaści» moža stać prykładam takoha vyžyvańnia — hurt, pazbaŭleny mahčymaści vystupać na radzimie, praciahvaje zapisvać albomy i jeździć u tury. A biełaruskamoŭny reliz (jaki, darečy, nie praciahvaje šerah «emihranckaj» muzyki, jon ani trochi nie «emihrancki») jašče macniej skiravaŭ fokus jahonaj tvorčaści na toje, što adbyvajecca ŭ Biełarusi i ź biełarusami. I jašče bolš adździaliŭ jaho ad ruskarokavaha nalotu, i heta suhučna ŭsprymańniu mnohich ludziej, dla jakich jon ciapier staŭ taksičny.
Refleksija «Piatli prychilnaści» na šakujučy z punktu hledžańnia našaha raniejšaha dośviedu stan — stan supierpazicyi rospačy i nadziei, — napisanaja na biełaruskaj movie. A forma adkazu byvaje ž i sutnaściu adkazu.
Albom na roznych muzyčnych płatformach:
Stała viadoma pra aryšt minskaha chirurha z 17-hadovym stažam. Joj pahražaje ahromnisty termin za palityku5
Kamientary
Trek "Štości dobraje" vielmi spadabaŭsia! Muzyka miełanchaličnaja i ŭźniosłaja, liryka pra stan kožnaha ŭ krainie, chto "hučna ŭnutrana kryčyć "Jak tabie dapamahčy?" (dumaju, heta pra našuju Biełaruś). Sapraŭdny himn. Ujaŭlaju sabie, jak jon moh by zahučać z arkiestram. Dziakuj, Piatla! Na repit.
Nu ale za movu dziakuj, viadoma. Zvažajučy na armiju prychilnikaŭ hurta - sapraŭdy mocnaja zajava.