«Padumali, što buduć «Try čarapachi», akazałasia — dziaržaŭny himn». Što i jak ciapier słuchaje moładź u Biełarusi?

Marharyta, 23 hady. «Praŭładnaja muzyka dla mianie ŭ tatalnym banie»

«Čorny śpis artystaŭ nijak nie paŭpłyvaŭ na vybar piesień, jakija ja słuchaju. U tym liku ja słuchaju pieśni, pryznanyja «ekstremisckimi materyjałami» abo napisanyja zabaronienymi muzykami, ale potym vydalaju ich z historyi pošuku i nie dadaju ŭ svoj płejlist.

Ja taksama słuchaju Karža, jakomu zaraz pahražaje HUBAZiK. Heta, darečy, vielmi žudasna. Ale niahledziačy na heta, kali ja zachaču, ja budu jaho słuchać.

Paśla pačatku vajny ja minimizavała pa maksimumu ŭžyvańnie rasijskaha kantentu, ale i raniej u maim topie było nie šmat rasijskich vykanaŭcaŭ. Ciapier z trochsot piesień u mianie maksimum piać rasijskich. Što tyčycca ŭkrainskaj muzyki, to jaje ja słuchała zaŭsiody, i praciahvaju słuchać zaraz — navat čaściej, čym biełaruskuju».

Dziaŭčyna raskazvaje «Salidarnaści», što na ŭniviersiteckich mierapryjemstvach zabaroniena hrać abo ŭklučać muzyku artystaŭ, jakija znachodziacca ŭ čornym śpisie.

«Taksama hetyja čornyja śpisy ŭskosna paŭpłyvali na majo rašeńnie nie iści na vypuskny albo fiestyvali ŭletku, bo ja razumieła, što tam nie budzie muzyki, jakuju ja lublu. Amal usio, što ja słuchaju, znachodzicca ŭ čornym śpisie. A praŭładnuju muzyku ja nie słuchaju, bo dla mianie jana ŭ tatalnym banie.

Ja dumaju, što i hłabalna takija śpisy ŭpłyvajuć na biełarusaŭ, bo ludzi, jakija časta chodziać tusavacca ŭ restarany, kłuby, mohuć pasłuchać tolki toje, što nie pad zabaronaj — z-za hetaha pastupova adbyvajecca zamiaščeńnie muzyčnaha hustu».

Alaksandra, 24 hady. «Kali ŭkluču «Lapisa Trubiackoha», potym usio čyšču»

«Muzyku ja słuchaju praz Spotify. Słuchaju i svaje lubimyja pieśni, i płejlisty, jakija «padkidvaje» płatforma. Čorny śpis artystaŭ nijak nie paŭpłyvaŭ — jak słuchała, što padabajecca, tak i słuchaju. Tolki remaračka — ja nie bajusia słuchać u navušnikach. A voś hučna słuchać «zabaronienych» artystaŭ bajusia — kali ŭkluču «Lapisa Trubiackoha», potym usio čyšču».

Vieranika, 25 hadoŭ. «Pra čorny śpis, jaki ŭ nas isnuje, ja viedaju, ale mnie na jaho ŭsio adno»

«Ja słuchaju roznuju muzyku. U mianie jość płejlist ź biełaruskamoŭnaj muzykaj — tam «Lapis Trubieckoj», N.R.M. i inšyja, mienš papularnyja. Taksama ŭ mianie šmat ukrainskaj muzyki, jość rasijskaja, ale mała — voś apošnim časam stała słuchać Manietačku i Noize MC. Aproč hetaha, ja lublu anhlijskuju, francuzskuju i italjanskuju muzyku.

Pra čorny śpis, jaki ŭ nas isnuje, ja viedaju, ale mnie na jaho ŭsio adno. Ja viedaju, što navat u niekatorych dziaržaŭnych ustanovach na kancertach mohuć uklučać pieśni muzykantaŭ, uniesienych u čorny śpis. Kali ja čyšču svoj telefon dziela biaśpieki, ja nie vydalaju zabaronienych artystaŭ, tolki z pošuku, kali tam jość «Lapis» abo «Okiean Jelzi».

Dziaŭčyna vielmi drenna stavicca da taho, što čorny śpis muzykaŭ uvohule isnuje ŭ Biełarusi. Jana ličyć, što asabista na kožnaha čałavieka jon nie mocna ŭpłyvaje, ale na publičnuju śfieru — u značnaj stupieni.

«Ja, naprykład, nie źviartaju ŭvahu na toje, chto pobač sa mnoj, kab pasłuchać toje, što mnie padabajecca. Ale tolki kali heta nie pieśni, pryznanyja «ekstremisckimi materyjałami», bo tut užo ryzykuju svajoj biaśpiekaj — heta, naprykład, pieśni Marharyty Laŭčuk abo Tor Band».

Pa słovach Vieraniki, praŭładnaja muzyka dla jaje — heta kryndž i nie alternatyva zabaronienym śpievakam. Ale ŭsio ž taki čas ad času ŭ jakaści žartu jana moža pasłuchać tvory dziaržaŭnych vykanaŭcaŭ:

«Heta «Biełaja-biełaja Ruś», «Nie pradajecca chata baćkoŭ» i «Bulba-dens», jakuju napisała niaviestka Łukašenki. Tam jość radok sa słovami «Žyviem, akiej», a ja tam čuju «Žyvie Makiej» i mnie zdajecca, što heta svojeasablivy bunt aŭtarki pieśni, jaki kaža, što Makiej zahinuŭ nie prosta tak».

Maryja, 25 hadoŭ. «Kali niechta biełaruskamoŭny daje kancert — heta zaŭsiody vialikaje ščaście»

«Ja miełaman, tamu ŭ maim płejliście zusim roznyja pieśni i vykanaŭcy. Heta Sia, Katy Perry, Maroon 5, Iva Saciva, Palina, Illa Šynkarenka, Niamiha, Maks Korž, Bruta, Lapis, Aureli, Naviband, Pošłaja Moli i mnohija inšyja.

Ja taksama vielmi lublu kłasičnuju muzyku i adnačasova z hetym rok. Rok, darečy, vielmi dapamahaje razhruzicca ŭ našy ciažkija časy. Uklučyŭ, prakryčaŭsia doma, na pryrodzie ci ŭ mašynie ź siabrami, i ŭžo lahčej.

Viadoma, biełarusy ŭnutry krainy vielmi zasumavali pa dobraj muzycy, pa kancertach. Ale mnohija narmalnyja artysty albo zabaronienyja ŭ nas, albo nie pryjazdžajuć. A vybracca kudyści na kancert u Jeŭropu — heta vielmi doraha, uličvajučy vizavyja i transpartnyja vydatki, nu i čas prachodžańnia miežaŭ».

Pry hetym surazmoŭca «Salidarnaści» adznačaje, što časta razam ź siabrami chodzić na kancerty abo iventy ŭ Minsku.

«Kali chtości biełaruskamoŭny daje kancert — heta zaŭsiody vialikaje ščaście. My zaŭsiody starajemsia padtrymlivać svajo, tamu što ludzi źjazdžajuć i našaj muzyki ŭ krainie stanovicca ŭsio mienš. Choć u apošni čas źjaŭlajucca novyja artysty, heta raduje.

Jość taksama vielmi papularny rasijski arkiestr Imperial Orchestra, jaki vystupaje ŭ Biełarusi. Jamu, darečy, jak i Hańnie Aści, zaŭsiody dajuć samyja krutyja placoŭki. Ja ni razu nie była na ich kancercie, ale tudy chadzili mnohija maje znajomyja — jany nie padtrymlivajuć vajnu, ale im ničoha nie zastajecca — viza ŭ Jeŭropu darahaja.

Bo ŭsie hetyja čornyja śpisy tak i pracujuć: adnych muzykaŭ — vyhnali z krainy ci pasadzili, inšych — zabaranili. Tamu ludzi słuchajuć muzyku ŭ navušnikach abo chodziać na dazvolenych artystaŭ. Darečy, hety arkiestr hraje suśvietnuju muzyku — naprykład, saŭndtreki da Marvel, «Piraty Karybskaha mora» i h. d., tamu ludzi iduć, kab naciešycca lubimymi kampazicyjami».

Maša taksama raskazvaje, jak iduć spravy z muzykaj u biełaruskaj stalicy: naprykład, letam u centry Minska časam prachodziać praŭładnyja kancerty, ź pieśniami «pra vajnu i pieramohu» — pobač z takimi placoŭkami stajać aŭtobusy, što moža aznačać, što na takija mierapryjemstvy zvoziać biudžetnikaŭ, a značyć, popyt nie taki ŭžo i vialiki.

«Što tyčycca kłubaŭ i baraŭ, to ciapier tam u trendzie ispanskaja, italjanskaja, arabskaja muzyka — niešta zamiežnaje, što zadavolić dva łahiery. Šamana, Lepsa i Haharynu ja zaraz čuju ŭ horadzie ŭsio radziej. Tak, jość fanaty «ruskaha śvietu», ale ja nie baču ŭ nas mocnaha ruskaha ŭpłyvu.

U kłubach u asnoŭnym uklučajuć muzyku 2000-ch: Vintaž, Maksim, Tatu. Heta dapamahaje adciahnucca i panastalhavać pra bieskłapotnyja časy.

Heta značyć śpisy jość, ich trymajucca, i heta vielmi sumna. Uspomnić situacyju z Meryjem Hierasimienkaj, jakaja praśpiavała pieśniu «Okiean Jelzi», za što jaje pasadzili.

Jość adčuvańnie, što kali chtości ź siłavikoŭ pačuje ich pieśni, to tabie adrazu kranty. Pry hetym ja viedaju, što jany sami lubiać takuju muzyku, toj ža hurt «Kino» i Coja. Atrymlivajecca, im možna słuchać, a nam — nie?»

Situacyja, jakaja skłałasia, adznačaje dziaŭčyna, jaje złuje i razdražniaje. Jana pryznajecca, što časam chočacca prakryčać lubimuju pieśniu, akunucca ŭ minułaje, ale nie možaš.

«Kruty varyjant — źbiracca svaim maleńkim kamjunici i słuchać muzyku na kvatery, leciščy ci ŭ mašynie. Nu a jak inakš to? Pry hetym adznaču, što «Pieriemien» abo «Voiny śvieta» — heta tryhiernyja treki dla ludziej u formie, ich navat strašna dadavać u płejlisty.

Ciapier mnohija imknucca adasobicca ad palityki, pasłuchać niešta nastalhičnaje. Na tusoŭkach nakštałt «Bevierli» taksama hraje anhłamoŭnyja muzyka, jak by ŭ nas ni nahavorvali na Zachad. A jašče Puhačova, Mieładze, a taksama «Vriemia i stiekło», «Niervy». Bo va ŭkrainskaj estradzie vielmi šmat talenavitych ludziej, biez muzyki jakich, jak ni kruci, ciažka ŭjavić narmalnuju tusoŭku.

Usich nie zabaroniš».

Valeryja, 32 hady. «Ciapier źjaŭlajucca novyja hrupy. Značyć, možna čaściej vybiracca na dazvolenyja kancerty, a nie na padpolnyja ŭ padvale»

«Ja słuchaju zusim roznuju muzyku — pad nastroj. Zapar mohuć iści pieśni vykanaŭcaŭ 21pilots, Falling in the Reverse, Iva Sativa, Lera Jaskievič, Bon Iver i što-niebudź z k-pop.

Niadaŭna adkryła dla siabie novy albom Intelligency. Taksama ź biełaruskich vykanaŭcaŭ ja vielmi lublu Nebulae Come Sweet, Passive Voice, «Adzin u kanoe», Zvonku, Palina. Z rasijskich padabajucca Manietačka i Noize, z ukrainskich — «Bumboks», «Okiean Jelzi» i inšyja».

Dziaŭčyna ŭ kursie pra čorny śpis, ale heta nie pieraškadžaje joj słuchać muzykaŭ, jakija tudy ŭklučanyja. Praŭda, robić jana heta ŭ navušnikach, praz kałonku doma abo ŭ kampanii siabroŭ.

«Uvieś śpis ja nie viedaju, ale z uniesienych u jaho ŭ mianie dakładna jość «Daj darohu», Nizkiz i Tor Band. Pieśni apošnich pačynajuć vydalać ci rabić niedastupnymi ŭ Biełarusi ŭ Spotify, a ja słuchaju muzyku tolki praź jaho. Darečy, ja pierajšła ŭ jaho z «Jandeks muzyki», tamu što tam było šmat rekamiendacyj rasijskich muzykaŭ».

Ludzi ŭ Biełarusi, praciahvaje surazmoŭca «Salidarnaści», usio adno słuchajuć muzykaŭ, jakija ŭniesienyja ŭ śpisy i nie mohuć davać kancerty. Heta adbyvajecca i na pracy, i navat u niekatorych hramadskich miescach.

Valeryja taksama adznačaje, što ciapier u Biełarusi źjaŭlajucca novyja hurty.

«Heta značyć, što možna čaściej vybiracca na dazvolenyja kancerty, a nie na padpolnyja. Viadoma, vielmi nie chapaje fiestyvalaŭ u duchu «Naš dzień». Choć u hetym hodzie my chadzili na «Šlach cmoka» — siarod chedłajnieraŭ tam była rasijskaja śpiavačka Green Apelsin — jak ja zrazumieła, jana vielmi papularnaja siarod dziaciej. Byli tam i biełaruskija artysty: naprykład, ja adkryła dla siabie vykanaŭcu Nevika — jaje pieśni tryvała zamacavalisia ŭ płejliście.

Praŭda, na hetym ža samym fiestyvali byŭ vielmi dziŭny momant. Napačatku adnaho z vystupaŭ vykanaŭcy skazali, što padrychtavali admysłovuju kampazicyju, jakuju viedajuć usie. My čamuści padumali, što, moža, heta budzie «Try čarapachi». Ale nie, heta byŭ dziaržaŭny himn. My prosta moŭčki pastajali.

Viadoma, na psichałahičny stan hetyja śpisy vielmi ŭpłyvajuć. Ja b vielmi chacieła schadzić na kancerty i našych viadomych vykanaŭcaŭ, i zamiežnych. Ale dla hetaha ciapier treba tančyć tancy z bubnam, kab adkryć vizu. Pry hetym ja vielmi radujusia, kali dzieści čuju, tak by mović, zabaronienuju muzyku».

• 16
• 1
• 0
• 1
• 1
• 11
• 2
• 1