Voś što patrabavaŭ Pucin ad Ukrainy padčas pieramovaŭ u Biełarusi

Rasśledavalnicki prajekt «Sistema» znajšoŭ dakumienty z samymi pieršymi patrabavańniami Rasii da Ukrainy, jakija byli pradstaŭlenyja ŭ pačatku sakavika 2022 hoda — padčas pieramovaŭ pamiž Kijevam i Maskvoj na terytoryi Biełarusi.

Pieršy raŭnd ukrainska-rasijskich pieramovaŭ adbyŭsia 28 lutaha 2022 hoda, praź niekalki dzion paśla pačatku poŭnamaštabnaha ŭvarvańnia Rasii va Ukrainu. Ukrainskaja delehacyja na čale z kiraŭnikom frakcyi «Słuha naroda» ŭ Viarchoŭnaj Radzie Davidam Arachamijaj prybyła ŭ Polšču, adkul viertalotam pieralacieła ŭ rezidencyju Alaksandra Łukašenki «Laskavičy» (Pietrykaŭski rajon). Tam ukrainskija pieramoŭščyki sustrelisia z rasijskaj delehacyjaj, jakuju ŭznačalvaŭ pamočnik Pucina Uładzimir Miadzinski.

Druhi i treci raundy pieramovaŭ — 3 i 7 sakavika adpaviedna — prajšli ŭžo ŭ Bresckaj vobłaści i skončylisia ničym.

«Sistema» adznačaje, što tolki 7 sakavika padčas treciaha raunda pieramovaŭ pačałosia abmierkavańnie kankretnych patrabavańniaŭ Rasii, jakija byli adlustravany ŭ sakretnym dakumiencie pad nazvaj «Damova ab niejtralitecie Ukrainy», jaki i apynuŭsia ŭ rukach rasśledavalnikaŭ.

U dakumiencie šeść staronak asnoŭnaj damovy i čatyry staronki dadatkaŭ. 18 artykułaŭ dakumienta achoplivajuć roznyja śfiery: paramietry niejtralitetu Ukrainy (vajskovyja i mižnarodnyja abaviazacielstvy), pytańni miežaŭ, humanitarnyja pytańni (mova, relihija, historyja), a taksama źniaćcie sankcyj z Rasii.

Vystaŭlajučy patrabavańni, Kreml adrazu adznačyŭ, što Ukraina pavinna całkam admovicca ad Kryma, Danieckaj i Łuhanskaj abłaściej, i što rasijskaja armija zastaniecca na zaniatych u pieršyja tydni ŭvarvańnia terytoryjach Ukrainy «dla doŭhaterminovaha kantrolu nad imi». 

Astatnija punkty takija.

1. Tatalnaje skaračeńnie armii. Rasija patrabavała skaracić ukrainskuju armiju da 50 tys. čałaviek, uklučajučy 1,5 tys. aficerskaha składu (heta ŭ piać razoŭ mienš, čym Ukraina mieła da 2022 hoda). Kali b hetaje žadańnie było vykanana, va Ukrainy zastałosia b usiaho čatyry karabli, 55 viertalotaŭ i 300 tankaŭ. Pa stanie na 2022 hod heta było b mienš za armiju susiedniaj Biełarusi (u jakoj na toj momant pražyvała amal u piać razoŭ mienš ludziej, čym va Ukrainie).
2. Abmiežavańni na rakietnyja ŭzbrajeńni. Ukrainie prapanoŭvałasia «nie raspracoŭvać, nie vyrablać, nie nabyvać i nie raźmiaščać na svajoj terytoryi rakietnyja ŭzbrajeńni lubych vidaŭ bazavańnia z dalokaściu stralby bolš za 250 km». Mienavita takaja adlehłaść, naprykład, adździalaje Krymski most ad kantralavanaha Ukrainaj Hulajpola, raźmieščanaha pablizu linii frontu, adznačaje «Sistema». Bolš za toje, Rasija pakidała za saboj prava ŭ budučyni zabaraniać Ukrainie «lubyja inšyja vidy ŭzbrajeńniaŭ, jakija mohuć być raspracavany ŭ vyniku navukovych daśledavańniaŭ».
3. Zabarona na vučeńni, zachodniuju dapamohu i ŭstupleńnie ŭ lubyja vajskovyja aljansy. Kreml patrabavaŭ ad Ukrainy poŭnaj admovy ad ustupleńnia ŭ NATA i ŭ lubyja inšyja vajskovyja aljansy razam z admovaj ad luboj zachodniaj dapamohi, vučeńniaŭ i raźmiaščeńnia lubych zamiežnych vajskovych kantynhientaŭ na terytoryi krainy (akramia rasijskich). U adkaz na vykanańnie punktu Kreml aproč inšaha prapanoŭvaŭ harantyi, kab nijakaja kraina «bolš nie mahła vykarystać svaje terytoryi abo terytoryi inšych dziaržaŭ dla naniasieńnia škody niejtralitetu Ukrainy» (mienavita tak Kreml i zrabiŭ, uvarvaŭšysia na poŭnač Ukrainy z terytoryi Biełarusi).
4. Pryznańnie niezaležnaści tak zvanych «ŁNR» i «DNR». Va ŭjaŭleńni Rasii Ukraina pavinna była «pryznać niezaležnaść» tak zvanych Danieckaj i Łuhanskaj «respublik» — pryčym u miežach administracyjnych abłaściej Ukrainy («Sistema» źviartaje ŭvahu, što pa stanie na 24 lutaha 2022 hoda Rasija kantralavała tolki častku hetych abłaściej, a na dadzieny momant jana ŭsio jašče nie maje poŭnaha kantrolu nad hetymi terytoryjami).
5. Adkaznaść za adnaŭleńnie Danbasa. Aŭtary rasijskaha dakumienta ličyli, što mienavita Ukraina pavinna ŭziać na siabie vydatki pa adnaŭleńni infrastruktury Danbasa, «źniščanaj z 2014 hoda».
6. Źniaćcie ŭsich sankcyj i adklikańnie ŭsich pazovaŭ. Rasija taksama patrabavała admieny ŭsich sankcyj — jak ukrainskich, tak i mižnarodnych — razam z adklikańniem usich mižnarodnych sudovych pazovaŭ, padadzienych z 2014 hoda.
7. Status ruskaj movy i majomasnyja pravy RPC. U dadatak da hetaha Rasija nastojvała na prysvajeńni ruskaj movie statusu dziaržaŭnaj i adnaŭleńni ŭsich majomasnych pravoŭ Ukrainskaj pravasłaŭnaj carkvy Maskoŭskaha patryjarchatu.
8. Poŭnaja admiena zabaronaŭ na savieckuju simvoliku. Narešcie, aŭtary dakumienta patrabavali «admianić i bolš nie ŭvodzić lubyja zabarony simvoliki, asacyjavanaj u dziaržavach ź pieramohaj nad nacyzmam», to-bok faktyčna znoŭ lehalizavać va Ukrainie savieckuju i kamunistyčnuju simvoliku. Da dakumienta byŭ prykładzieny pieralik ukrainskich zakonaŭ, jakija aŭtary nazvali prykładami «nacyfikacyi i hieraizacyi nacyzmu». «Sistema» zaŭvažyła, što ŭ śpis taksama trapili zakony «Ab uviekaviečańni pieramohi nad nacyzmam» i «Ab reabilitacyi achviar represij kamunistyčnaha tatalitarnaha režymu».

Całkam dakumient možna pračytać pa hetaj spasyłcy.

Pavialičyć

A što ŭzamien?

Jak piša «Sistema» sa spasyłkaj na atrymany dakumient, Kreml u adkaz na vykanańnie ŭsich patrabavańniaŭ prapanoŭvaŭ Ukrainie tolki «režym spynieńnia ahniu» i «mierapryjemstvy pa spynieńni bajavych dziejańniaŭ». Pra advod rasijskich vojskaŭ z terytoryi Ukrainy havorka nie išła — Rasija brała na siabie tolki abaviazak «nie pašyrać užo kantralavanuju na toj momant terytoryju».

Akramia taho, Ukrainie ŭ hety ž čas «prapanoŭvałasia» advieści ŭsie svaje vojski ŭ punkty pastajannaj dysłakacyi («ci miescy, vyznačanyja Rasijskaj Fiederacyjaj»), a zamiežnym partnioram — «nieadkładna spynić lubuju dapamohu i adklikać z Ukrainy ŭsich supracoŭnikaŭ, jakija majuć dačynieńnie da vajskovych farmavańniaŭ, uklučajučy vajennych daradcaŭ».

Rasijskija vojski, a taksama siły Rashvardyi, pavodle kramloŭskaha dakumienta, pavinny byli zastacca na svaich (akupavanych) miescach da vykanańnia Rasijaj i Ukrainaj «usich abaviazkaŭ pa hetaj damovie». Pakolki hetyja «abaviazki» ŭklučali maštabnyja źmieny va ŭkrainskim zakanadaŭstvie i amal poŭnaje razzbrajeńnie, rasijskaja armija ŭ vypadku zaklučeńnia takoj damovy mahła b znachodzicca pad Kijevam hadami, padkreślivaje prajekt «Sistema».

• 3
• 5
• 7
• 22
• 1
• 0
• 36
• 0