«Buduć adpraŭleny pa maršrucie z troch litar». Voś jak Hienprakuratura Abchazii adkazała na zapyt pra Łukašenku
Žurnalisty Biełaruskaha rasśledavalnickaha centra nakiravali ŭ Hienprakuraturu niepryznanaj respubliki zapyt ab mahčymaj pieradačy ziamli kampanii, źviazanaj z Łukašenkam.
Žurnalisty spytalisia ŭ viedamstva, ci praviarałasia ździełka pa pieradačy prybiarežnaha ziamielnaha ŭčastka płoščaj 20 ha kampanii «Žamčužyna 2010», źviazanaj ź Viktaram Šejmanam, na najaŭnaść karupcyjnych dziejańniaŭ.
Hety ŭčastak, pavodle danych BRC, byŭ pieradadzieny kampanii paśla vizitu Alaksandra Łukašenki ŭ Abchaziju.
U adkazie prakuratury pad podpisam jaje kiraŭnika Adhura Ahrabu skazana, što rasśledavańnie BRC jany ličać nieabhruntavanym, a «metaj takich abvinavačvańniaŭ źjaŭlajecca dyskredytacyja adnosinaŭ Respubliki Abchazija i Respubliki Biełaruś i niepasredna prezidenta A.H. Łukašenki».
«Alaksandr Ryhoravič pa pravie źjaŭlajecca adnym z aŭtarytetnych dziaržaŭnych dziejačaŭ sučasnaści, uzoram adkaznaha kiraŭnika, jaki ćviorda abaraniaje intaresy svajho naroda i karystajecca pavahaj u našaj krainie. […]
U vypadku paŭtareńnia padobnych pravakacyjnych zvarotaŭ da dziaržaŭnych struktur Respubliki Abchazija ich aŭtary buduć nieadkładna adpraŭleny pa viadomym maršrucie, što składajecca z troch litar», — havorycca ŭ aficyjnym adkazie viedamstva.
U vieraśni 2022 hoda Alaksandr Łukašenka naviedaŭ Abchaziju i sustreŭsia ź jaje lidaram Asłanam Bžanija. Na nastupny dzień paśla pajezdki premjer niepryznanaj respubliki adobryŭ prapanovu ab pieradačy kampanii «Žamčužyna 2010», źviazanaj z Šejmanam, ziamielnaha ŭčastka ŭ vioscy Kyndyh Ačamčyrskaha rajona dla budaŭnictva sanatorna-kurortnaha kompleksu.
Jak skłaŭsia los chłopca ź viadomaha žyćcieśćviardžalnaha fota studenckaha maršu-2020?7
Kamientary