Pravakatara i danosčyka Jaŭhiena Kakojta aficyjna pryznali palitviaźniem
Pravaabarončy centr «Viasna» 20 listapada pryznaŭ palitviaźniami jašče 13 čałaviek. Siarod nazvanych asob prysutničaje i proźvišča Jaŭhiena Katlarova z Homiela, bolš viadomaha jak pravakatar i danosčyk Jaŭhien Kakojta.
Jaŭhien Katlaroŭ, jaki taksama vystupaŭ pad psieŭdanimami Jaŭhien Kakojta i Mikita Kancavy, šmat hadoŭ śpiecyjalizavaŭsia na tym, što padmanvaŭ niezaležnyja miedyja, žorstka prachodziŭsia pa prychilnikach źmienaŭ i pisaŭ danosy.
Čas ad času jamu ŭdavałasia ŭvieści apanientaŭ u zman — jon davaŭ fejkavyja intervju «Biełsatu» i «Zierkału», a taksama supracoŭničaŭ z błohieram Juryjem Cieracham, jaki ŭziaŭ sabie mianušku «Ludažer».
U 2020 i 2021 hodzie jon pisaŭ danosy na prychilnikaŭ źmienaŭ i davaŭ pakazańni śledčym, u tym liku na viadomaha pravaabaroncu Leanida Sudalenku.
Ale nasiŭ voŭk — panieśli i vaŭka. Ź ciaham času ŭ samoha Katlarova źjavilisia prablemy. Letaś jon raspyliŭ ślezaciečny haz i byŭ zatrymany. Za heta ŭ lipieni 2023 jaho asudzili pa administratyŭnym artykule — za «naniasieńnie cialesnych paškodžańniaŭ». A paśla — jašče dvojčy, za «drobnaje chulihanstva» i «ŭchileńnie ad jaŭki ŭ sud».
Pieryjadyčna Katlaroŭ navat krytykavaŭ ułady. Naprykład, paśla sustrečy z namieśnikam staršyni Homielskaha abłvykankama Baranoŭskim u listapadzie 2023 napisaŭ, što «zmahary mieli racyju, uładu treba dziaŭbści i dziaŭbści».
U studzieni 2024 hoda jamu dali štraf za «raspaŭsiud ekstremizmu».
U sakaviku 2024 jon napisaŭ u administracyju Łukašenki list, kab zapytacca pra toje, ci zakonna mieć tatuiroŭku z Pahoniaj — jon akurat nabiŭ sabie takuju. Paśla Katlaroŭ zajaviŭ, što ŭ jaho prablemy, im raptam zacikavilisia siłaviki, a jamu pahražaje zatrymańnie.
Apošnija publikacyi ŭ sacsietkach jon rabiŭ 21 sakavika 2024 hoda. A paśla hetaha adusiul źnik. Nieŭzabavie stała viadoma, što jaho aryštavali i buduć sudzić. Heta adbyłosia paśla publikacyi niekalkich videa, dzie jon krytykavaŭ dziejańni čynoŭnika Homielskaha abłvykankama — Andreja Baranoŭskaha.
30 vieraśnia 2024 hoda ŭ sudzie Navabielickaha rajona Homiela pačaŭsia sudovy praces nad Katlarovym-Kakojta, jakoha abvinavacili pa troch «palityčnych» artykułach: dyskredytacyja Respubliki Biełaruś (art. 369-1) i abraza pradstaŭnika ŭłady (art. 369 KK RB). Pa vynikach zakrytaha suda jamu vynieśli prysud — 1,5 hoda kałonii ahulnaha režymu z maksimalna mahčymych 4 hadoŭ.
Homielskija pravaabaroncy adrazu paśla taho, jak stała viadoma pra zatrymańnie Katlarova, napisali, što ŭ vypadku, kali jamu prysudziać pakarańnie, źviazanaje z pazbaŭleńniem voli, to jaho pryznajuć palitviaźniem. Tak u vyniku i stałasia.
Proźviščy inšych ludziej, pryznanych palitviaźniami hetym razam:
Stanisłaŭ Taspajeŭ, Uładzimir Paraškoŭ, Hienadź Horbač, Ina Palcava, Siarhiej Kryvuć, Andrej Astapienka, Andrej Savicki, Artur Kanapacki, Artur Małčan, Alaksandr Akakijeŭ, Dźmitryj Suŭchanaŭ, Dźmitryj Alchovik.
Chto hetyja ludzi i čamu pravaabaroncy ličać ich spravy palityčna matyvavanymi, možna daviedacca tut.
Śpis usich palitviaźniaŭ Biełarusi — tut.
Usiaho na hety momant palitviaźniami, pavodle acenak pravaabaroncaŭ, pryznanyja 1275 čałaviek. Apošnim časam ahulnaja ich kolkaść istotna nie raście i navat časam źmianšajecca. Ale heta nie tamu, što represii ŭ Biełarusi mienšajuć, — prosta paralelna z novymi vypadkami źniavoleńnia pa kryminalnych spravach idzie praces vyzvaleńnia tych asudžanych, chto całkam adbyŭ svoj termin. Taksama sudy niekatorym prysudžajuć «chatniuju chimiju», paśla čaho čałaviek vychodzić z turemnych ścien, tamu bolš nie ličycca viaźniem.
Varta taksama ŭličvać, što ŭ statystyku ŭvachodziać daloka nie ŭsie, chto znachodzicca ŭ źniavoleńni z palityčnych pryčyn, realnaja kolkaść biełaruskich palitviaźniaŭ našmat bolšaja. Pra vielmi mnohich pravaabaroncam prosta ničoha nie viadoma.
Kamientary