Šeść apazicyjnych partyj Paŭdniovaj Karei padrychtavali zakonaprajekt ab impičmiencie prezidentu
Dakumient płanujuć unieści ŭ parłamient zaŭtra.
Šeść apazicyjnych partyj Paŭdniovaj Karei padrychtavali zakonaprajekt ab impičmiencie prezidentu krainy Jun Sok Jelu, paviedamlaje ahienctva «Renchap».
Dakumient płanujuć unieści ŭ parłamient zaŭtra, 5 śniežnia, i ŭ nastupnyja dva dni pravieści pa im hałasavańnie. Dla pryniaćcia zakonaprajekta spatrebicca nie mienš za dźvie traciny, abo 200, hałasoŭ deputataŭ. U apazicyi, pradstaŭlenaj u parłamiencie siamju partyjami, jość tolki 192 mandaty.
Raniej paviedamlałasia, što apazicyjnyja partyi taksama źbirajucca abvinavacić Juna ŭ dziaržaŭnaj zdradzie. Na ich dumku, uviadzieńnie vajennaha stanovišča, padčas jakoha vajskoŭcy pasprabavali zachapić parłamient, raŭnaznačna miaciažu i vychodzić za ramki sudovaj niedatykalnaści prezidenta.
Ab uviadzieńni nadzvyčajnaha režymu było abvieščana ŭ aŭtorak viečaram. Ukaz, jaki dziejničaŭ šeść hadzin, zabaraniaŭ pracu palityčnych partyj, pratesty, zabastoŭki, uvodziŭ cenzuru i vajenna-palavyja trybunały z pravam na vyniasieńnie śmiarotnaha prysudu, paviedamlaje Radyjo Svaboda.
Pierad budynkam parłamienta sabralisia pratestoŭcy — bolš za piać tysiač, pavodle acenak apazicyi. Deputaty prosta padčas šturmu budynka vajskoŭcami prahałasavali za admienu rašeńnia prezidenta. Paśla hetaha jon pa zakonie byŭ vymušany admianić ukaz.
Minčanka pakinuła stanoŭčy vodhuk na sumku — i raptam vykryła zdradu čužoha muža20
Kamientary
A v Biełarusi strojat KNDR.