Pucin prybyŭ u Brest, sustreniecca ź Sidorskim

Bolš za 20 pytańniaŭ uklučana ŭ paradak dnia pasiadžeńnia Savieta ministraŭ Sajuznaj dziaržavy Biełarusi i Rasii, jakoje projdzie siońnia ŭ Breście.

Rasijskuju delehacyju na pieramovach uznačalić premjer‑ministr Uładzimir Pucin. Čakajecca, što jon prybudzie śpiecrejsam u aeraport Bresta ŭ 12.40.

U 13.00 kiraŭnik urada RF i jaho biełaruski kaleha Siarhiej Sidorski naviedajuć punkt mytnaha nadhladu hruzavoha aŭtatranspartu «Kazłovičy‑2».

Z 14.15 da 15.30 zapłanavana dvuchbakovaja sustreča Pucina ź Sidorskim, paśla čaho biełaruska‑rasijskija pieramovy praciahnucca ŭ pašyranym składzie.

Pavodle infarmacyi aficyjnaha partała Sajuznaj dziaržavy (SD), Saviet ministraŭ padsumuje asnoŭnyja vyniki handlova‑ekanamičnaha supracoŭnictva ŭ 2009 hodzie i razhledzić bolš za 20 aktualnych pytańniaŭ.

U pryvatnaści, baki abmiarkujuć vykanańnie sumiesnaha mižuradavaha płana pa minimizacyi nastupstvaŭ finansavaha kryzisu, prahramu supracoŭnictva ŭ paliŭna‑enierhietyčnym kompleksie (PEK) i prahnoznyja bałansy paliŭna‑enierhietyčnych resursaŭ SD na 2010 hod.

Płanujecca abmierkavać chod realizacyi dvuchbakovych pahadnieńniaŭ u ekanamičnaj śfiery, stan handlova‑ekanamičnaha supracoŭnictva, bałansy popytu i prapanovy pa najvažniejšych vidach pradukcyi.

Udzielniki pasiadžeńnia razhledziać vykanańnie miždziaržaŭnaha dahavora ab supracoŭnictvie ŭ śfiery sacyjalnaha zabieśpiačeńnia, płana mierapryjemstvaŭ pa farmiravańni i funkcyjanavańni abjadnanaj transpartnaj sistemy, a taksama mierapryjemstvaŭ pa spraščeńni pieramiaščeńnia tavaraŭ i transpartnych srodkaŭ na terytoryi SD.

Płanujecca zaćvierdzić hrafik sumiesnych kalehij u 2010 hodzie, asnoŭnyja pytańni da pasiadžeńniaŭ Saŭmina na hety hod i prajekt paradku čarhovaha pasiadžeńnia sajuznaha ŭrada.

Nahadajem, 4 sakavika namieśnik dziaržsakratara SD Vasil Chroł zajaviŭ žurnalistam, što prahrama biełaruska‑rasijskaha supracoŭnictva ŭ PEK pakul nie da kanca ŭzhodniena i razhladać jaje na pasiadžeńni sajuznaha ŭrada ŭ Breście rana.

«Rabočaja hrupa pad staršynstvom pieršaha vice‑premjera Biełarusi Uładzimira Siamaški i vice‑premjera Rasii Ihara Siečyna nie zdoleła dasiahnuć kampramisu, — paviedamiŭ Chroł. — Na paradku dnia hetaje pytańnie staić, ale jano nie padrychtavana. Na ŭzroŭni minułaha hoda, akramia padpisańnia pratakoła da pahadnieńnia ab handlu ŭ śfiery nafty, ničoha nie źmianiłasia. Jość niekalki pryncypovych pazicyj, jakija patrebna vyrašać nie na ŭzroŭni ekśpiertaŭ, a na ŭzroŭni vice‑premjeraŭ».

Apošniaje pasiadžeńnie Saŭmina SD adbyłosia 28 kastryčnika 2009 hoda ŭ Maskvie.

Andrej Kažamiakin, BiełaPAN.

• 0
• 0
• 0
• 0
• 0
• 0
• 0
• 0