U aŭtorak va ŭpravie Partyi BNF prajšła pres-kanferencyja z udziełam Alaksandra Šałajki i Eniry Branickaj dy rodnych Mikoły Astrejki i Cimocha Drančuka.
U aŭtorak va ŭpravie Partyi BNF prajšła pres-kanferencyja z udziełam Alaksandra Šałajki i Eniry Branickaj dy rodnych Mikoły Astrejki i Cimocha Drančuka.
Nahadajem, što 21 lutaha specsłužby aryštavali hetych čatyroch siabroŭ niezarehistravanaj arhanizacyi «Partnerstva». Z ekrana televizii im było zakinuta abvinavačańnie ŭ padrychtoŭcy terarystyčnych aktaŭ i sfalšavańnia vynikaŭ vybaraŭ. Na sudovym pracesie, jaki skončyŭsia ŭ pačatku žniŭnia, hetyja abvinavačvańni byli źniatyja, a aktyvistaŭ «Pratnerstva» asudzili za dziejnaść ad imia niezarehistravanaj arhanizacyi. 21 žniŭnia z turmy na Vaładarcy vyjšli Alaksandar Šałajka i Enira Branickaja. Cimochu Drančuku siadzieć za kratami jašče paŭhodu, a Mikołu Astrejku – paŭtary.
Alaksandar Šałajka zajaviŭ, što asnoŭnaj metaj pres-kanferencyi źjaŭlajecca padtrymka M. Astrejki i C. Drančuka i ich siemjaŭ. Kasacyjnuju skarhu M. Astrejki i C. Drančuka musić razhledzieć Mienski haradzki sud.
Pavodle słoŭ Šałajki, na sudovym pracesie nad aktyvistami «Partnerstva» byli hruba parušanaje kryminalna-pracesualnaje zakanadaŭstva i byŭ vyniesieny praźmierna žorstki vyrak.
«Tak atrymałasia, što ludzi jakija nikoli nie byli pryciahnutyja da kryminalnaj adkaznaści, pry najaŭnaści źmiakčalnych abstavinaŭ, sa stanoŭčymi charaktarystykami, z małymi dziećmi adrazu atrymlivajuć takija vialikija terminy, a Mikałaj uvohule maksymalny – 2 hady, – skazaŭ Alaksandar. – Navat dla biełaruskaha zakanadaŭstva – heta vyklučnyja vypadki. Kali ja siadzieŭ na Vaładarcy šmat u kaho z sukamiernikaŭ za plačami było pa piać-šeść sudzimaściaŭ i mnohija nikoli nie adbyvali pakarańnie za kratami. Tym bolej dziejańnie aktyvistaŭ «Partnerstva» nia nieśli nijakaj škody. Nazirańnie za vybarami – reč karysnaja i abaviazkovaja. Moža być nia ŭsio ŭ našych siłach, ale my budziem rabić maksymum, kab Mikałaj i Cimoch akazalisia na voli».
Alaksandar zaznačyŭ, što isnavali try dokazy «viny». «Heta try dakumenty. Adzin byŭ zrobleny na blanku «Gallup» ź nibyta vynikami prezydenckich vybaraŭ. Jon uvohule nie razhladaŭsia śledztvam. Druhi – blank z vynikami jaŭki na papiaredniaje hałasavańnie padčas referendumu 2004 h., da hetaha blanku było prosta dapisana «19 sakavika 2006 h. Hramadzkaje abjadnańnie «Partnerstva». Sud pryznaŭ, što heta sapraŭdny dakument i nijakaha padmanu być nia moža. Treci – blank CVK z podpisam Jarmošynaj, ale jaho ja ŭvohule bačyŭ tolki pa televizary, na śledztvie jon nie fihuravaŭ. Nie było dokazaŭ, tamu abvinavačvańnie źniali, pakinuŭšy tolki ŭdzieł u niezarehistravanaj hramadzkaj arhanizacyi».
«Inšymi słovami, my b mahli pajści prybirać drevy, nazvaŭšysia hrupa «Soniejka», i nas taksama mahli b pasadzić u turmu», – reziumavaŭ A. Šałajka.
Žonka Mikałaja Astrejki Palina adznačyła, što joj vielmi ciažka da niadaŭniaha było ŭjavić, što takija padziei, jakija zdarylisia ź jaje mužam mohuć adbyvacca ŭ XXI st. u centry Eŭropy. «Mnie baluča i kryŭdna, što my ź Mikałajem vymušany pačynać svajo maładoje siamiejnaje žyćcio z takich niepryjemnych padziejaŭ».
Maci Mikoły Jaŭhienija Astrejka skazała, što paśla vyniasieńnia prysudu joj z dazvołu sudździ Leanida Jasinoviča štotydzień dazvalali sustrakacca z synam, ale ŭčora hety dazvoł skasavali. Sa słovaŭ Jaŭhienii Astrejki jaje syn nia skardzicca na ŭmovy ŭtrymańnia na Vaładarcy, choć u jahonaj kamery navat niama šybaŭ, tolki kraty, pieršyja ž ustaloŭvajuć paśla pačatku aciaplalnaha sezonu. Mikoła navat krychu prastyŭ.
Baćka Cimocha Drančuka Valer skazaŭ, što taja «vybuchoŭka», jakaja była pakazanaja pa telebačańni paśla aryštu «partneraŭcaŭ» musić viarnucca tudy adkul sychodziła. – My pavinny pakazać praŭdu, kab pieramahčy chłuśniu, što liłasia ź dziaržaŭnych medyjaŭ na našych dziaciej. Sprava «Partnerstva» nia skončyłasia – sprava tolki pačynajecca ciapier. Hetaja «vybuchoŭka» syhraje na ruku nam. Siońnia spaŭniajecca piać miesiacaŭ Cimochavu synu, jakoha jon bačyŭ tolki adnojčy, padčas vyniasieńnia prysudu, heta vielmi žorstka i biaźlitasna. Vialiki dziakuj hazecie «Našaj Nivie» za toje, što jana pastajanna drukuje adrasy dla listavańnia palitviaźniaŭ».
Darečy, Cimoch Drančuk praciahvaje navučańnie ŭ EHU dziakujučy dobramu staŭleńni kiraŭnictva hetaj VNU, piša ŭ źniavoleńni kantrolnyja raboty, a taksama štodnia dasyłaje da svaich rodnych listy. Hetkim čynam jon sprabuje vieści narmalnaje žyćcio.
Fota Julii Daraškievič
Kamientary