«Treba razvaročvać aŭtobusy». Pieravozčyki damovilisia zmahacca ź ludźmi, jakija pierasadžvajucca na miažy
Biełarusy aktyŭna vykarystoŭvajuć łajfchak, jak prachodzić miažu chutčej. Ale transpartnaj inśpiekcyi i pieravozčykam heta vielmi nie padabajecca.
Pieravozčyki i transpartnaja inśpiekcyja chočuć aktyŭniej zmahacca z papularnym łajfchakom pa chutkim prachodžańni miažy. Hetaje pytańnie jany abmierkavali na sustrečy ŭ Hrodnie.
Šmatlikija pasažyry ŭ čerhach pierasadžvajucca ŭ aŭtobusy, jakija stajać bližej da šłahbaŭma. Pasłuha hetaja płatnaja, jak ličać pieravozčyki, časta kiroŭcy zabirajuć hrošy sabie «mima kasy».
Pradstaŭniki transpartnaj inśpiekcyi kažuć, što heta parušeńnie pravił. Čarha na miažy — heta nie aŭtavakzał, i pasadka pasažyraŭ tam zabaronienaja, piša Mižrehijanalnaja asacyjacyja pieravozčykaŭ.
Pieravozčykaŭ padsadki taksama nie zadavalniajuć. Pierš za ŭsio, pasažyry nie śpiašajucca kuplać bilety, naprykład, z Hrodna da Varšavy, a sprabujuć znajści spadarožny transpart užo ŭ punkcie propusku. A heta strata vyručki, i navat straty ad pajezdak z pustymi sałonami. Pa-druhoje, pieravozčyki ličać, što padsadki taksama ŭskosna ŭpłyvajuć na ŭźniknieńnie čerhaŭ.
«U čarhu zahoniać pusty aŭtobus, jaki pad vyhladam turystyčnaha kursiruje tolki ad Bresta, naprykład, da Terespala. I jon prosta «źbiraje» pasažyraŭ užo kala samaha šłahbaŭma. I moža nie kranacca, pakul nie źbiare poŭny sałon, a astatnija vymušanyja čakać», — skardziacca pieravozčyki na kankurentaŭ.
Pieravozčyki znajšli, jak im zdajecca, lohkaje i tannaje rašeńnie prablemy. Jany prapanavali inśpiekcyi praviarać, kab kolkaść pasažyraŭ u sałonie pa dakumientach adpaviadała toj kolkaści ludziej, što sieli ŭ transpart na aŭtavakzale. U vypadku pieravyšeńnia — razvaročvać aŭtobus. Tut jany spasyłajucca na praviły: pasadka pasažyraŭ u mižnarodny aŭtobus dapuskajecca tolki na aŭtavakzałach abo aŭtastancyjach.
«Padsadki» — dastatkova papularnaja praktyka na miažy, kali čarha raściahvajecca na dziesiatki aŭtobusaŭ. A zdarajecca takoje časta. Niekatoryja pieravozčyki mohuć dazvalać pierasadžvacca biaspłatna, ale tolki ŭ svaje ž aŭtobusy, jakija stajać bližej da šłahbaŭma. U inšych vypadkach daviadziecca płacić. Taksa byvaje roznaja, u siarednim — 40 jeŭra. Niekatoryja mohuć brać 100-150 rubloŭ. Adnak padčas rejdaŭ transpartnaj inśpiekcyi kiroŭcy brać novych pasažyraŭ admaŭlajucca.
U dakumientach pa «spravie Epštejna» znajšli ślady bujnych hrašovych pieravodaŭ u Minsk. Znoŭ uspłyło imia Karyny Šulak44
Kamientary