Tekst datyčany apošnich bujnych padziejaŭ u mižnarodnym futbolnym žyćci Biełarusi. Nastaŭniki našych zbornych nie źjavilisia na paślamatčavuju pres-kanferencyju ŭ Halandyi j Čechii. Čamu? Sproba adkazu na pytańnie ŭ artykule...
Pavodziny hałoŭnych treneraŭ našych nacyjanalnaj i moładzievaj zbornych, jakija ŭ sieradu kiravali hulniami svaich kamandaŭ u Halandyi j Čechii, stali nietypovymi dla publičnych asobaŭ padobnaha kštałtu. Abodva trenery nie źjavilisia na paślamatčavych pres-kanferencyjach (!) u dvuch roznych krainach Eŭropy. Vypadkovaść? Nie. Zakanamiernaść? Tak. Čym tłumačycca adnačasovaje ihnaravańnie trenerami abodvuch našych kamandaŭ zvyčajnaj paślamatčavaj razmovy z žurnalistami? Jakim by nie padaŭsia banalnym adkaz, ale sprava ŭ tym, što biełaruskija ŭłady pierapałochalisia mahčymych adkrytych akcyjaŭ z boku mižnarodnaj hramadskaj supolnaści padčas pres-kanferencyjaŭ. Jany napužalisia taho, što českija j halanskija žurnalisty pačnuć zadavać našym treneram patańni, jakija, nia vyklučana, datyčylisia b u tym liku j palityčnaj sytuacyi ŭ krainie. Bo stanovicca vidavočnym niepaźbiežnaje: “biełaruskaje pytańnie” nabyvaje ŭsio bolšaje hučańnie ŭ eŭrapiejskaj supolnaści.
U biełaruskaj ułady byli surjoznyja padstavy, kab spužacca mahčymaha mižnarodnaha razhałosu. Napiaredadni matču lider Libieralnaj partyi Parlamantu Niderlandaŭ zaklikaŭ kamandu "aranžavych" da bajkotu hulni ź biełaruskaj zbornaj. Bajkatavańnie matču, na zadumu aŭtaru zakliku, musiła stać palityčnaj akcyjaj pryznačanaj dziela źviartańnia ŭvahi śvietu da sytuacyi z pravami čałavieka ŭ Biełarusi, a taksama demanstravańniem biełarusaj hramadskaści salidarnaści Eŭropy z tymi siłami ŭ krainie, što vystupajuć za demakratyčnyja źmieny. Pa sutnaści, tolki ŭmiašalnictva Staršyni PASE Sp. Rene Van der Lindena praduchiliła mahčymaje bajkatavańnie halancami matču ź biełaruskaj zbornaj. Pahroza vyklučeńnia biełaruskich spartovych kamandaŭ z udziełu ŭ mižnarodnych spabornictvaŭ stanovicca ŭsio bolš najaŭnaj. Sproba ŭładaŭ pierajhrać krytyčna aryjentavanych eŭrapiejcaŭ da sytuacyi ŭ biełaruskaj dziaržavie praz sklikańnie hałoŭnym treneram našaj nacyjanalnaj zbornaj raptoŭnaj pieradmatčavaj (!) pres-kanferencyi supiarečyła ŭsielakamu zdarovamu sensu. Ale chto j kali ŭ Biełarusi dbaŭ pra zdarovy sens, kali havorka išła pra abaronu pravoŭ čałavieka? Toje, što niečakanaja pierad matčam pres-kanferencyja ŭ Ejndchovienu była sklikana pa zahadu “źvierchu” vydajuć dźvie nastupnyja akaličnaści: prysutnaść ažno troch žurnalistaŭ (!), dvoje ź jakich byli biełaruskija, a taksama źmiest samich zajavaŭ, što zrabiŭ hałoŭny trener Biełarusi - ničoha nadzvyčajnaha (!).
Biełaruskija ŭłady dobra zrazumieli hety vyrazny syhnał z boku demakratyčnaj hramadskaści Eŭropy. Bo daterminovaje adklikańnie svajoj zajavy na praviadzieńnie čempijanatu śvietu pa chakieju ŭ Biełarusi - śviedčańnie niaŭpeŭnienaj, nervovaj reakcyi ŭładaŭ na prahnazavańnie raźvićcia padziejaŭ: sproba praduchilić čarhovuju publičnuju parazu.
Biezumoŭna, što stvorany ŭ svoj čas precedent, źviazany z vyklučeńniem SFRIU (byłaja Sacyjalistyčnaja Federatyŭnaja Respublika Juhasłavija) z udziełu ŭ mižnarodnych spabornictvach, nasamreč moža stacca dla sučasnaj Biełarusi realnaściu.
Kamientary