Prakuratura Hruzii paviedamiła pra pačatak kryminalnaha pieraśledu vaśmi viadomych apazicyjnych palitykaŭ i ŭ tym liku byłoha prezidenta krainy Michaiła Saakašvili, jaki znachodzicca ŭ źniavoleńni. Ich abvinavačvajuć u złačynstvach suprać dziaržavy, piša Rasijskaja słužba Radyjo Svaboda.
Akramia Saakašvili, abvinavačanymi stali jašče piaciora źniavolenych apazicyjanieraŭ: lidar prazachodniaj partyi «Stratehija Ahmašeniebieli» Hieorhi Vašadze, były ministr justycyi i adukacyi Nika Hvaramija, były lidar partyi, što kiravała pry Saakašvili, «Adziny nacyjanalny ruch» Nika Mielija, lidar libiertaryjanskaj partyi «Novy palityčny centr — Hirčy» Zurab Džaparydze i lidar apazicyjnaha abjadnańnia «Kaalicyja za pieramieny» Elene Chaštaryja.
Akramia taho, abvinavačvajucca niadaŭna pamiłavanyja lidary apazicyjnaj partyi «Leła» Mamuka Chazaradze i Badry Džaparydze.
Jak zajaviŭ hienieralny prakuror Hruzii Hieorhi Hvarakidze, sprava zaviedzienaja sumiesna prakuraturaj, Słužbaj dziaržaŭnaj biaśpieki i Ministerstvam unutranych spraŭ. Apazicyjanieraŭ zapadozryli ŭ sabatažy, sadziejničańni varožaj dziejnaści zamiežnaj dziaržavy, finansavańni dziejańniaŭ, nakiravanych suprać kanstytucyjnaha ładu i nacyjanalnaj biaśpieki, u zaklikach da hvałtoŭnaha źmianieńnia kanstytucyjnaha paradku i źviaržeńnia ŭłady.
U tym liku ich abvinavačvajuć u dapamozie zachodnim krainam va ŭviadzieńni sankcyj suprać miascovych biznesmienaŭ i čynoŭnikaŭ, u pieradačy infarmacyi ab handli naftapraduktami i ab stanoviščy ŭ hruzinskim vajennym siektary. Usio heta źviazali z admovaj dziejnaha hruzinskaha ŭrada ŭvodzić sankcyi suprać Rasii paśla pačatku ŭkrainskaj vajny.
Najbolšy turemny termin pa hetych abvinavačańniach pahražaje Zurabu Džaparydze, Hieorhiju Vašadze i Elenie Chaštaryja. U pryvatnaści, im inkryminujuć akazańnie dapamohi zamiežnaj dziaržavie ŭ varožaj dziejnaści, hety artykuł praduhledžvaje pazbaŭleńnie voli na termin ad siami da piatnaccaci hadoŭ.
Ciapier čytajuć
U dakumientach pa «spravie Epštejna» znajšli ślady bujnych hrašovych pieravodaŭ u Minsk. Znoŭ uspłyło imia Karyny Šulak44
Kamientary