U Polščy vykryli hrupu, jakaja dapamahała niezakonna lehalizavacca inšaziemcam. Siarod abvinavačanych i biełarusy
U vyniku sumiesnaj apieracyi polskaj Pamiežnaj słužby i palicyi była vykrytaja arhanizavanaja złačynnaja hrupa, jakaja zajmałasia tym, što niezakonna «aficyjna» afarmlała znachodžańnie inšaziemcaŭ u Polščy i inšych krainach Jeŭrapiejskaha Sajuza.
Śledčyja vyśvietlili, što z 2020 da 2024 hoda ŭdzielniki hrupy vykarystoŭvali padroblenyja dakumienty — u tym liku fiktyŭnyja zajavy ab najmańni na pracu i niesapraŭdnyja adrasy pražyvańnia. Takim čynam jany padmanvali dziaržaŭnyja orhany i atrymlivali dla inšaziemcaŭ polskija dazvoły na znachodžańnie.
Karystalnikami hetaj schiemy mahli stać kala 1500 čałaviek z krain Centralnaj Azii, Biełarusi, Hruzii, Turcyi i niekatorych afrykanskich dziaržaŭ. Za svaje «pasłuhi» arhanizatary brali ad 3 da 5 tysiač złotych z čałavieka.
Pry dapamozie Jeŭrapołu stała viadoma, što jak minimum 20 lehalizavanych takim sposabam inšaziemcaŭ paźniej učynili złačynstvy ŭ roznych krainach ES, u tym liku dziejničali ŭ tamtejšych arhanizavanych hrupach.
Apieracyja achapiła try rehijony Polščy — Mazaviecki, Łodzinski i Nižniesilezski. Usiaho zatrymali 24 čałavieki — hramadzian Ukrainy, Polščy, Biełarusi, Uźbiekistana, Pakistana i Filipin. Siarod ich — dva mierkavanyja kiraŭniki hrupy: 52‑hadovy palak i 39‑hadovy ŭkrainiec.
Padčas šmatlikich pieratrusaŭ pravaachoŭniki kanfiskavali telefony, noŭtbuki, piačatki, vialiki abjom dakumientaŭ, a taksama hrošy ŭ roznych valutach (kala 40 tysiač złotych) i lehkavy aŭtamabil canoj prykładna 120 tysiač złotych. Usio heta aryštavana pad zabieśpiačeńnie budučych štrafaŭ i pakarańniaŭ.
U prakuratury 20 zatrymanym pradjavili abvinavačvańni va ŭdziele ŭ arhanizavanaj hrupie. Jašče čatyroch abvinavacili ŭ dziejnaści «supolna i ŭ zmovie». Im inkryminujuć niezakonnaje sadziejničańnie inšaziemcam u atrymańni prava na znachodžańnie, padrobku dakumientaŭ i daču chłuślivych źviestak. Usiaho pa spravie vystaŭlena kala 1500 abvinavačvańniaŭ.
Sud na prośbu prakurora aryštavaŭ dvuch asnoŭnych padazravanych. Astatnim pryznačyli bolš miakkija miery — abaviazak adznačacca ŭ palicyi, zabaronu vyjezdu z krainy i hrašovyja harantyi.
«Mihranty zaleźli ŭ pryčep, pakul kaleha zajazdžaŭ na parom». Biełaruski dalnabojščyk raskazaŭ pra ryzyki pracy ŭ Jeŭropie
Žančyna dapamahła biełaruskamu ŭciekaču niezakonna pierajści miažu — praz heta joj admovili ŭ polskim hramadzianstvie. Što vyrašyŭ sud
Polšča, Litva i Łatvija za čatyry hady nie ŭpuścili 200 000 nielehalnych mihrantaŭ ź Biełarusi
Ciapier čytajuć
«Dźvie Biełarusi. Abiedźvie jeduć na aŭtobusach MAZ. Adzin narod — taki rozny los»9
Kamientary