Jamu vystaŭlena abvinavačańnie ŭ naŭmysnym zabojstvie ŭ suviazi sa śmierciu jahonaj žonki Lindy Styviensan, daviedaŭsia NBC News.
Byłoha muža eks-pieršaj łedzi ZŠA Džył Bajden Uiljama Styviensana aryštavali i abvinavacili ŭ zabojstvie svajoj ciapierašniaj žonki, paviedamili telekanału NBC News aficyjnyja asoby.
Jamu vystaŭlena abvinavačvańnie ŭ naŭmysnym zabojstvie pieršaj stupieni ŭ suviazi sa śmierciu jaho žonki Lindy Styviensan. Pra heta havorycca ŭ abvinavaŭčym zaklučeńni, padadzienym u štacie Dełaver. Pa dadzienych palicyi, zaklučeńnie stała vynikam «maštabnaha rasśledavańnia, jakoje praciahvałasia niekalki tydniaŭ».
Styviensan zaraz znachodzicca pad vartaj va ŭstanovie vypraŭleńnia Howard Young.
Palicyja akruhi Ńju-Kasł nie raskryła padrabiaznaściej śmierci, udakładniŭ NBC News. Adnak, jak piša telekanał, 28 śniežnia aficery vyjechali na vyklik z-za siamiejnaha kanfliktu ŭ domie ŭ rajonie Uiłminhtana. Lindu Styviensan znajšli biez prytomnaści ŭ haścinaj. Jaje sprabavali vyratavać, adnak biespaśpiachova.
Cieła pieradali ŭ Dełaverskaje ŭpraŭleńnie sudova-miedycynskaj ekśpiertyzy dla praviadzieńnia ŭskryćcia. Pryčyna śmierci ŭ paviedamleńni ab aryšcie Uiljama Styviensana nie nazvana.
Džył vyjšła zamuž za Uiljama Styviensana ŭ lutym 1970 hoda, kali joj było 18 hadoŭ. Na toj momant jana vučyłasia va Univiersitecie Dełavera, a Styviensanu było 23 hady.
Nieŭzabavie Styviensan adkryŭ kłub The Stone Balloon pobač z kampusam Univiersiteta Dełavera ŭ Ńjuarku. Tam vystupali, u pryvatnaści, amierykanski rok-vykanaŭca Brus Sprynhścin, muzykant Dejv Mećjuz i amierykanskaja rok-hrupa The Allman Brothers Band.
Šlub Džył i Styviensana praciahnuŭsia piać hadoŭ. U sakaviku 1975 hoda jana paznajomiłasia ź sienataram ad Dełavera Džo Bajdenam. U mai 1975‑ha sud aformiŭ hramadzianskaje raźviadzieńnie Džył i Uiljama Styviensana. Jana vyjšła zamuž za Bajdena 17 červienia 1977 hoda.
Kamientary