Jak adbyvajecca sačeńnie

U ŚMI źjaŭlajucca źviestki pra čarhovuju kanfiskacyju infarmacyjnych materyjałaŭ. Studenta Jaŭhiena Skrabutana 12 studzienia milicyjanty spynili na vakzale ŭ Mastach, jak tolki jon vyjšaŭ z elektryčki. Z sumki zabrali 5000 kalandarykaŭ z vyjavaj Milinkieviča. Nie dapamahło navat zastupnictva deputata rajsavietu Alesia Zarambiuka, jaki zajaviŭ milicyjantam, što sumka jahonaja.

Adkul milicyja viedała, u kaho šukać materyjały? Zarambiuk miarkuje, što milicyja prasłuchoŭvała jaho telefonnyja razmovy z Skrabutanam.

Takija ž pieraściarohi vykazvaje kiraŭnik homielskaha vybarčaha štabu adzinaha Ŭładzimier Kacora: «Pa mabilniku čałavieka možna adsačyć z dakładnaściu da 1 m». Jon raspaviadaje, jak Andrej Kara vioz 20 tys. kalendaroŭ z partretam Milinkieviča. Padjaždžajučy da Homielu, pa mabilniku paviedamiŭ Kacoru, što viazie dva pački, spytaŭ, na jaki adras pryvieźci. Kacora nazvaŭ adras — na hetaj vulicy aŭtamabil Kary i zatrymali. Paśla adnaho telefanavańnia zatrymali z kalandarykami j jašče adnaho homielskaha aktyvista — Valera Rybčanku.

Aŭtamabil Kacory nieadnarazova zatrymlivali padčas pieravozki kalandarykaŭ — štoraz la Žłobina. Jon ličyć, što za im admysłova sočać. Kab pravieryć versiju, Kacora demanstracyjna vynies z ofisu ŭ mašynu dźvie skrynki z padšyŭkaj «Sovietskoj Biełoruśsii», zajechaŭ u inšy ofis, dzie jamu pieradali vopratku z humanitarnaj dapamohi. «Mianie zatrymali, ja zapatrabavaŭ, kab aficyjna skłali pratakoł. Ale ž jany nia stali kanfiskoŭvać «Sovietskuju Biełoruśsiju» dy pančochi», — kpić Kacora.

Apošnim razam za Kacoram sačyli 16 studzienia. I znoŭ-taki kala Žłobina. Hetym razam čyrvony «mersedes»: «Kali ja zajechaŭ na zapraŭku, to demanstratyŭna adkryŭ bahažnik. Jany pabačyli, što ničoha nie viazu, i nia stali zatrymlivać».

Aŭtamabil kiraŭnika viciebskaha vybarčaha štabu Chrystafora Žalapava zatrymali, kali jon jechaŭ ź Milinkievičam u Navapołacak i vioz instrukcyi dla źbiralnikaŭ podpisaŭ: «U supracoŭnika DAI byŭ zapisany na ruce numar aŭtamabila». Žalapaŭ kaža, što milicyjanty nie abciažarvajuć siabie admysłovym «chvastom». «Aŭtamabil zatrymlivajuć u Viciebsku dla dahladu kožny dzień adzin-dva razy». Toje samaje nieadnarazova rabili z aŭtamabilem adkaznaha za zbor podpisaŭ Kastusia Smolikava, pokul jahonaja mašyna nie złamałasia. «Tamu ciapier my nia vozim z saboj nijakich materyjałaŭ», — kaža viciebski aktyvist.

Ułady pilnujuć demakratyčnych aktyvistaŭ. Ale j tyja pilnujucca, kab špieham na premiju nie zarabić. Prynamsi, u krainie kanfiskoŭvajecca tolki małaja častka samadrukaŭ.

• 0
• 0
• 0
• 0
• 0
• 0
• 0
• 0