На вайне супраць Украіны загінуў адзін з самых высокапастаўленых перабежчыкаў — генерал-маёр, былы начальнік дэпартамента СБУ

Генерал-маёр Уладзімір Ляпкін займаў у СБУ пасаду начальніка дэпартамента аператыўнага дакументавання. Як піша прарасейскі палітычны дзеяч Алег Цароў, у яго сферу адказнасці ўваходзіў «нябачны бок працы СБУ — праслухоўванне, вонкавае назіранне, збор інфармацыі».

Званне генерал-маёра Ляпкін атрымаў у 2013 годзе. Тады ж ён асабіста ўдзельнічаў у разгоне пратэстаў на Майдане, сцвярджае Цароў.

«У самыя вострыя моманты пратэстаў яму даводзілася ўступаць у прамыя фізічныя сутыкненні, і ў такіх сітуацыях ён не хаваўся за спінамі падначаленых, а ішоў наперад сам, паказваючы прыклад», — напісаў ён.

У лютым 2014 года, адразу пасля перамогі пратэстуючых, Уладзімір Ляпкін быў звольнены з СБУ ў ліку іншых высокапастаўленых афіцэраў.

Былы афіцэр уцёк у Расію і пасяліўся ў анексаваным Крыме.

Пасля пачатку вайны і акупацыі Херсона Уладзімір Ляпкін атрымаў пасаду намесніка кіраўніка «Дзяржаўнай службы бяспекі Херсонскай вобласці» — па форме ўласнасці гэта была «дзяржаўная казённая ўстанова» і займала будынак Гаспадарчага суда Херсонскай вобласці. Заснавальнікам «Дзяржбяспекі» стаў былы начальнік Ляпкіна па СБУ — Аляксандр Якіменка, кіраўнік украінскай спецслужбы са студзеня 2013 па люты 2014 года, які таксама ўцёк у Расію.

У 2025 годзе СБУ паведаміла пра падазрэнне ў калабарацыйнай дзейнасці ў дачыненні да Уладзіміра Ляпкіна. Паводле версіі следства, ён у якасці намесніка начальніка і в.а. начальніка «Дзяржаўнай службы бяспекі» займаўся «фільтрацыйнымі мерапрыемствамі» і рэпрэсіямі супраць мірнага насельніцтва. СБУ лічыць, што пасля фармальнай ліквідацыі «Дзяржаўнай службы бяспекі» яе правапераемніцай стала ўпраўленне ФСБ па акупаванай Херсонскай вобласці.

Алег Цароў сцвярджае, што генеральскае званне Ляпкіна «дэ-факта захавалася: ён так і заставаўся для ўсіх генерал-маёрам ужо расійскіх спецслужбаў».

У публічных указах «Медыязона» не знайшла згадак пра прысваенне Уладзіміру Ляпкіну звання генерал-маёра ФСБ ці якой-небудзь іншай сілавой структуры.

Уладзімір Ляпкін загінуў 17 сакавіка 2026 года. У посце Алега Царова гаворыцца, што ён служыў у атрадзе «Барс-33» пад пазыўным «Батый». Пра стварэнне добраахвотніцкага «батальёна ім. Васіля Маргелава» абвясціў акупацыйны кіраўнік Херсонскай вобласці Уладзімір Сальда ў 2023 годзе.

4 красавіка 2026 года ў падмаскоўным Нахабіне прайшло пахаванне 59‑гадовага экс-палкоўніка МНС Эдуарда Малава. На жалобных стужках было напісана «ад камандзіра і асабовага складу «Барс-33». Малаў, як і Ляпкін, загінуў 17 сакавіка 2026 года.

У «УКантакце» таксама быў апублікаваны некралог, прысвечаны смерці дваіх выпускнікоў Ташкенцкага вышэйшага агульнавайсковага каманднага вучылішча — Эдуарда Малава і Уладзіміра Ляпкіна, абодва скончылі вучылішча ў 1989 годзе.

• 28
• 0
• 6
• 0
• 0
• 0
• 0
• 0