Staršy śledčy pa asabliva važnych spravach Hienieralnaj prakuratury Biełarusi Śviatłana Bajkova, jakaja znachodzicca pad vartaj z 25 lutaha, i jaje abarona padrychtavali prašeńnie na imia prezidenta.
Jak skazaŭ advakat Michaił Vołčak, u zvarocie da kiraŭnika dziaržavy jak haranta Kanstytucyi idzie havorka pra nieabchodnaść abarony kanstytucyjnych pravoŭ Bajkovaj, utrymlivajecca patrabavańnie ab vyzvaleńni jaje z‑pad varty, ukazańnie na niezakonnaść dziejańniaŭ niekatorych słužbovych asob Kamiteta dziaržaŭnaj biaśpieki. Płanujecca, što prašeńnie budzie nakiravana prezidentu na nastupnym tydni.
Michaił Vołčak taksama paviedamiŭ, što z 31 maja Śviatłana Bajkova abjaviła haładoŭku i praciahvaje jaje ciapier. Vynikam hetaha stała surjoznaje, pavodle jaho infarmacyi, paharšeńnie stanu zdaroŭja padabaronnaj, pačalisia prablemy z nahami. Uračy ŭhavorvajuć žančynu, jakaja ŭtrymlivajecca ŭ SIZA KDB, spynić haładoŭku, ale pakul biezvynikova. 10 červienia sa Śviatłanaj Bajkovaj sustrakałasia jaje maci. Ahulny stan zdaroŭja Bajkovaj abaronca kvalifikuje jak «ciažki».
Nahadajem, Śviatłana Bajkova była zatrymana supracoŭnikami KDB 25 lutaha. Joj inkryminujecca niekalki sastavaŭ złačynstvaŭ, u tym liku pieravyšeńnie ŭłady. 3 sakavika hienprakuror zajaviŭ žurnalistam, što ŭ jaho niama infarmacyi pra karyślivyja ci majomasnyja niezakonnyja dziejańni padnačalenaj. Pry hetym jon dapuściŭ, što Bajkova mahła zrabić niejkija parušeńni pracesualnaha charaktaru.
Ni Hienprakuratura, ni KDB chod rasśledavańnia nie kamientujuć. Pavodle nieaficyjnaj infarmacyi, paśla taho jak hienprakuror Ryhor Vasilevič admoviŭsia ŭ kancy krasavika pradaŭžać termin utrymańnia svajoj padnačalenaj pad vartaj paśla zaviaršeńnia dvuch miesiacaŭ z momantu jaje zatrymańnia, u KDB u dačynieńni da Bajkovaj była raspačata jašče adna kryminalnaja sprava. Termin jaje rasśledavańnia zaviaršajecca 24 červienia.
Hienprakuror dvojčy sprabavaŭ u sudzie abskardzić rašeńnie ab źmiaščeńni Bajkovaj pad vartu, adnak sud pahadziŭsia z dovadami KDB, a nie Ryhora Vasileviča.
Alimpijski čempijon Aramnaŭ: Nam vyhadnaja praciahłaja vajna, i Vova dy Saša ŭ joj pieramohuć24
Kamientary