Dziŭnaja historyja z karšerynham. U servisu i klijenta — absalutna roznyja viersii

— Ja sumlennaja kiroŭca ź vialikim stažam, — napisała Hanna. — 26 maja chacieła skarystacca karšerynham Anytime, ale pry ruchu zadnim chodam ujechała ŭ mašynu, jakaja zaparkavałasia tam padčas majoj pasadki ŭ aŭto. Z chłopcam pytańnie vyrašyli na miescy, jon źjechaŭ. Ja zakončyła pajezdku i pajšła ŭ mietro. Praz chvilin 30 napisała ŭ techpadtrymku, paviedamlajučy, što paškodziła aŭto. U vyniku była vyklikana DAI. Karšerynh jašče vystaviŭ štraf za toje, što ja sprabavała źjechać.

Naturalna, situacyja niepryjemnaja. Žurnalisty ŭdakładnili ŭ Hanny, ci paśpieli joj vystavić rachunak za paškodžańni.

Jana adkazała, što joj papiarednie ahučyli sumu — 3000 rubloŭ.

Rachunak niemaleńki, asabliva z ulikam taho, što kampanija admianiła štrafy za DTZ i kampiensacyju škody pry paškodžańni aŭtamabilaŭ, pra što raskazvała i ŭ ŚMI, i ŭ svaich sacyjalnych sietkach… To ŭ čym prablema? Pierš čym słuchać pradstaŭnikoŭ servisu, čytajem pierapisku klijenta z techpadtrymkaj Anytime, jakuju pradstaviła Hanna.

Pavialičyć

Zhodna ź pierapiskaj, pieršapačatkova Hanna napisała, što prablema nie ŭ DTZ (prynamsi, tak moža zdacca z skrynšotaŭ), a ŭ tym, što jana «zaŭvažyła paškodžańni paśla zdačy aŭto».

Pavialičyć

Pradstaŭniki słužby padtrymki Anytime u pierapiscy pytajucca ŭ dziaŭčyny: «Čamu nie paviedamili pra toje, što zdaryłasia, a vyrašyli schavać?»

Taja nastojvaje: śpiecyjalna schavać avaryju dakładna nie chacieła. I paviedamiła ŭ padtrymku pra toje, što zdaryłasia, da taho, jak pradstaŭniki karšerynhu vyklikali DAI, jakaja i viarnuła Hannu na miesca avaryi.

Pavialičyć

I tut treba ŭspomnić praviły, pry jakich «padstrachoŭka» ad servisu dziejničaje (na žal, mnohija nie čytajuć anłajn-damovu): hałoŭnaja ŭmova, pry jakoj vam nie vystaviać rachunak za paškodžańnie, — kali da zaviaršeńnia arendy vy paviedamili pra DTZ u słužbu padtrymki i vykonvali ŭsie instrukcyi śpiecyjalistaŭ.

Pry hetym u kampanii papiaredžvali, što «padstrachoŭka» z poŭnym pahašeńniem škody nie budzie pracavać u vypadkach hrubych parušeńniaŭ pravił darožnaha ruchu abo ŭmoŭ dahavora servisu. Naprykład:

• kiravańnie aŭtamabilem u stanie ałkaholnaha abo narkatyčnaha apjanieńnia;
• pieradača kiravańnia inšaj asobie;
• pakidańnie miesca DTZ;
• vykarystańnie aŭtamabila z parušeńniem pravił servisu.

— Sutnaść u tym, što ja nie chavałasia i była hatovy pieršapačatkova zapłacić škodu za bampier. A jany mnie kažuć, što ja źjechała. Jak tolki mnie patelefanavali z DAI, ja adrazu viarnułasia na miesca avaryi, i chłopiec, ź jakim my ŭsio vyrašyli na miescy, viarnuŭsia taksama i napisaŭ, što pretenzij u jaho niama. Ale DAI skłała dva pratakoły, i mnie pahražaje pazbaŭleńnie da dvuch hadoŭ. U DAI ja pakazvała pierapisku z Anytime, — dadaje Hanna.

Kamientar Anytime

Pa kamientar žurnalisty źviarnulisia ŭ kampaniju Anytime. Tam raskazali svaju viersiju taho, što zdaryłasia.

— My ŭ Anytime z sakavika źmianili padychod da DTZ: siońnia klijentam nie treba apłačvać paškodžańni aŭtamabila, kali jany traplajuć u avaryju. My śviadoma pajšli na heta, kab zrabić servis praściejšym i spakajniejšym dla karystalnikaŭ. Ale jość adna bazavaja i vielmi važnaja ŭmova: pra DTZ treba adrazu paviedamić u padtrymku i zafiksavać jaho naležnym čynam.

U hetaj situacyi prablema jakraz nie ŭ samim DTZ, a ŭ tym, jak klijentka paviała siabie paśla jaho.

Pavodle našaj infarmacyi, paśla sutyknieńnia jana nie źviazałasia sa słužbaj padtrymki, zaviaršyła arendu i syšła ź miesca zdareńnia. Pryčym paškodžańnie było dastatkova zaŭvažnym, kab dakładna jaho adčuć. Bolš za toje, fota pry zaviaršeńni arendy byli zrobleny tak, kab paškodžanaja častka aŭtamabila nie trapiła ŭ kadr.

Jašče adzin važny niuans: na miescy DTZ dziaŭčyna vyrašyła nie zastacca i schavać jaho. Jaje viarnuŭ vidavočca zdareńnia, jaki taksama paźniej źviazaŭsia z nami i paviedamiŭ pra situacyju. Mienavita paśla zvarotu vidavočca supracoŭniki Anytime inicyjavali vyklik DAI. To-bok servis daviedaŭsia pra DTZ nie ad klijenta.

Klijentka samastojna źviazałasia z druhim udzielnikam DTZ i, pa jaje słovach, urehulavała pytańnie z uładalnikam druhoha aŭtamabila. Adnak ni jeŭrapratakoł, ni afarmleńnie DTZ supracoŭnikami DAI na toj momant nie byli praviedzienyja. Pry hetym u padtrymku Anytime klijentka ŭsio jašče nie źviartałasia.

Kali paźniej jana ŭsio ž patelefanavała ŭ padtrymku (paśla taho, jak my sami vyklikali DAI), razmova była padadziena tak, byccam jana prosta vyjaviła paškodžańnie aŭtamabila. Pra toje, što DTZ adbyłosia pa jaje vinie, skazana nie było.

29 maja aŭtamabil prajšoŭ aficyjny ahlad, i ciapier servis čakaje vynikovuju acenku škody ad ekśpierta. Na hety momant klijentcy nie byli vystaŭlenyja nijakija aficyjnyja sumy. Ahučanyja raniej 3000 rubloŭ — heta praduhledžany dahavoram štraf za pakidańnie miesca DTZ i parušeńnie pravił vykarystańnia servisu, a nie štraf za sam fakt avaryi. Pakul što jon nie vystaŭleny taksama. Prymać rašeńnie pra kančatkovuju sumu servis budzie paśla acenki ekśpierta z ulikam usich minułych i budučych dziejańniaŭ klijentki.

I samaje niezrazumiełaje ŭ hetaj situacyi dla nas jak dla servisu: kali b klijentka prosta paviedamiła pra zdareńnie, jak heta praduhledžana praviłami servisu i PDR, nijakich pytańniaŭ z kampiensacyjaj škody z boku Anytime nie ŭźnikła b. My sapraŭdy pakryvajem takija vypadki — užo bolš za 220 klijentaŭ byli całkam vyzvaleny ad vypłat pry DTZ z sakavika. Ale kali klijent sprabuje schavać fakt DTZ i nie vykonvaje praviły, padstrachoŭka pierastaje dziejničać.

Pradstaŭniki Anytime taksama vysyłali nam zdymki mašyny: «Heta fota, jakija zrabiła klijentka paśla arendy i DTZ (majucca na ŭvazie fota, zroblenyja pry zaviaršeńni pajezdki ŭ dadatku), — tut śviadoma tak vybrany rakursy, kab paškodžańnie nie trapiła ŭ kadr».

Pavialičyć

Pavialičyć

«A voś samo paškodžańnie», — pradstaŭniki Anytime dasłali jašče adno fota nižej. Adznačym, što, miarkujučy pa pierapiscy klijentki sa słužbaj padtrymki, mienavita jana zrabiła hety zdymak, kali paviedamlała pra paškodžańni.

Pavialičyć

• 0
• 0
• 0
• 6
• 0
• 0
• 0
• 0