U kłubnym domie na Jaźminavaj pradajuć vydatnuju čatyrochpakajoŭku
Kvartał na vulicy Jaźminavaj u Minsku — adzin z samych prestyžnych rajonaŭ stalicy z małapaviarchovaj zabudovaj, zakrytymi dvarami pobač sa Ślapianskaj vodnaj sistemaj. Ciapier tam možna nabyć čatyrochpakajovuju kvateru płoščaj 172,5 kvadrata.
Jašče paŭtara dziasiatka hadoŭ tamu na miescy ciapierašniaj elitnaj zabudovy pamiž lesam i Ślapianskaj vodnaj sistemaj paśvilisia kozy i karovy. Situacyja źmianiłasia ŭ pačatku 2010-ch, kali kampanija «Tapas» uźviała tut žyłyja kompleksy «Jaźminavaja-1» i «Jaźminavaja-2».
Praŭda, u pieršyja hady žycharam rajona nie stavała zvykłaj haradskoj infrastruktury. Budaŭnictva pa susiedstvie kvartała «Majak Minska» vyrašyła hetuju prablemu.
Ciapier pobač jość usio dla žyćcia: ad škoł i sadkoŭ da handlovych centraŭ Dana Mall i «Alaksandraŭ pasaž». Da mietro «Uschod» — chvilin 15 pieššu. Pry hetym sam kvartał zachavaŭ adasoblenaść, jon raźmieščany kala lesu i Ślapianskaha strumienia.
Mienavita ŭ im ciapier šukajuć kupca na čatyrochpakajoŭku ŭ domie na vulicy Jaźminavaj, 2B. Jaje płošča składaje 172,5 kvadratnaha mietra. Vyšynia stolaŭ — 3 mietry.
Kvateru apisvaje sajt Realt.by, jana raźmieščanaja na trecim paviersie šaścipaviarchovaha doma, pabudavanaha ŭ 2010 hodzie. Na kožnym paviersie tut usiaho pa dźvie kvatery, što zabiaśpiečvaje dadatkovuju pryvatnaść. Dom karkasna-błočny, z zakrytaj terytoryjaj i sistemaj videanazirańnia.
Pavodle płana, kvatera maje čatyry žyłyja pakoi ahulnaj płoščaj 114,5 kvadratnaha mietra i asobnuju kuchniu płoščaj 16,5 kvadratnaha mietra. Adnak uładalniki admovilisia ad častki pieraharodak, tamu kuchnia faktyčna źjadnanaja z haścioŭniaj i stałovaj zonaj. U vyniku centram kvatery stała adkrytaja ahulnaja prastora płoščaj bolš za 60 kvadratnych mietraŭ.
Asablivuju ŭvahu pryciahvaje paŭkruhłaja erkiernaja častka haścioŭni, jakaja robić pamiaškańnie bolš śvietłym i vizualna pavialičvaje jaho. Z voknaŭ adkryvajecca vid na zialonuju zonu i Nacyjanalnuju biblijateku.
Na apublikavanym płanie paznačany tolki adzin sanvuzieł płoščaj 8 kvadratnych mietraŭ.
Adnak na fotazdymkach vidać jak minimum dva asobnyja sanvuzły: adzin z dušavoj kabinaj, druhi — z vannaj i dušam.
Taksama ŭ kvatery jość asobnyja pralnia i harderobnaja, jakich u takim vyhladzie na płanie niama.
Interjer vytrymany ŭ kłasičnym styli. U kvatery šmat dekaratyŭnaj lapniny, masiŭnych karnizaŭ, kryštalnych lustraŭ i mebli sa śvietłymi fasadami.
Kuchnia vykananaja ŭ kłasičnym dyzajnie z frezieravanymi fasadami i dekaratyŭnymi elemientami pad zołata.
Interjer pabudavany na kantraście śvietłych i ciomnych adcieńniaŭ. Śvietłyja špalery z raślinnymi ŭzorami, kłasičnaja mebla i ciažkija štory spałučajucca ź ciomnaj padłohaj pad dreva.
Dziciačy pakoj aformleny ŭ bolš spakojnaj pastelnaj hamie.
U kvatery jość haspadarskaja spalnia z vychadam na łodžyju i jašče dva asobnyja spalnyja pakoi.
U apisańni taksama zhadvajecca asobnaja kamorka ŭ padvale.
Za kvateru prosiać 2,175 miljona rubloŭ (kala 775 tysiač dalaraŭ), što adpaviadaje prykładna 4494 dalaram za kvadratny mietr. Adnak kančatkovaja suma moža akazacca nižejšaj: pradaviec adznačaje, što hatovy tarhavacca.
Ciapier čytajuć
Biełarus zrabiŭ prapanovu kachanaj kala znakamitaha fantana Trevi ŭ Rymie — pad apładysmienty dziasiatkaŭ turystaŭ17
Kamientary