Квартал на вуліцы Язмінавай у Мінску — адзін з самых прэстыжных раёнаў сталіцы з малапавярховай забудовай, закрытымі дварамі побач са Сляпянскай воднай сістэмай. Цяпер там можна набыць чатырохпакаёвую кватэру плошчай 172,5 квадрата.
Яшчэ паўтара дзясятка гадоў таму на месцы цяперашняй элітнай забудовы паміж лесам і Сляпянскай воднай сістэмай пасвіліся козы і каровы. Сітуацыя змянілася ў пачатку 2010-х, калі кампанія «Тапас» узвяла тут жылыя комплексы «Язмінавая-1» і «Язмінавая-2».
Праўда, у першыя гады жыхарам раёна не ставала звыклай гарадской інфраструктуры. Будаўніцтва па суседстве квартала «Маяк Мінска» вырашыла гэтую праблему.
Цяпер побач ёсць усё для жыцця: ад школ і садкоў да гандлёвых цэнтраў Dana Mall і «Аляксандраў пасаж». Да метро «Усход» — хвілін 15 пешшу. Пры гэтым сам квартал захаваў адасобленасць, ён размешчаны каля лесу і Сляпянскага струменя.
Менавіта ў ім цяпер шукаюць купца на чатырохпакаёўку ў доме на вуліцы Язмінавай, 2Б. Яе плошча складае 172,5 квадратнага метра. Вышыня столяў — 3 метры.
Кватэру апісвае сайт Realt.by, яна размешчаная на трэцім паверсе шасціпавярховага дома, пабудаванага ў 2010 годзе. На кожным паверсе тут усяго па дзве кватэры, што забяспечвае дадатковую прыватнасць. Дом каркасна-блочны, з закрытай тэрыторыяй і сістэмай відэаназірання.
Паводле плана, кватэра мае чатыры жылыя пакоі агульнай плошчай 114,5 квадратнага метра і асобную кухню плошчай 16,5 квадратнага метра. Аднак уладальнікі адмовіліся ад часткі перагародак, таму кухня фактычна з'яднаная з гасцёўняй і сталовай зонай. У выніку цэнтрам кватэры стала адкрытая агульная прастора плошчай больш за 60 квадратных метраў.
Асаблівую ўвагу прыцягвае паўкруглая эркерная частка гасцёўні, якая робіць памяшканне больш светлым і візуальна павялічвае яго. З вокнаў адкрываецца від на зялёную зону і Нацыянальную бібліятэку.
На апублікаваным плане пазначаны толькі адзін санвузел плошчай 8 квадратных метраў.
Аднак на фотаздымках відаць як мінімум два асобныя санвузлы: адзін з душавой кабінай, другі — з ваннай і душам.
Таксама ў кватэры ёсць асобныя пральня і гардэробная, якіх у такім выглядзе на плане няма.
Інтэр'ер вытрыманы ў класічным стылі. У кватэры шмат дэкаратыўнай ляпніны, масіўных карнізаў, крыштальных люстраў і мэблі са светлымі фасадамі.
Кухня выкананая ў класічным дызайне з фрэзераванымі фасадамі і дэкаратыўнымі элементамі пад золата.
Інтэр'ер пабудаваны на кантрасце светлых і цёмных адценняў. Светлыя шпалеры з расліннымі ўзорамі, класічная мэбля і цяжкія шторы спалучаюцца з цёмнай падлогай пад дрэва.
Дзіцячы пакой аформлены ў больш спакойнай пастэльнай гаме.
У кватэры ёсць гаспадарская спальня з выхадам на лоджыю і яшчэ два асобныя спальныя пакоі.
У апісанні таксама згадваецца асобная каморка ў падвале.
За кватэру просяць 2,175 мільёна рублёў (каля 775 тысяч даляраў), што адпавядае прыкладна 4494 далярам за квадратны метр. Аднак канчатковая сума можа аказацца ніжэйшай: прадавец адзначае, што гатовы таргавацца.
Цяпер чытаюць
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень8
Каментары