U Muziej volnaj Biełarusi pieradali vybarčyja biuleteni-2020, jakija nie paśpieli da kanca spalić u kacielni
Ich i inšyja śviedčańni supracivu z 9 pa 26 červienia možna pabačyć u Muziei volnaj Biełarusi ŭ Varšavie na vystavie «Depatryjacyja».
Raskazvajem padrabiaźniej pra niekalki ekspanataŭ.
Kamanda muzieja na praciahu niekalkich miesiacaŭ pracavała, kab biaśpiečna vyvieźci i zachavać u svajoj kalekcyi rečy, što stali śviedkami vybaraŭ-2020, pratestaŭ 90‑ch i nulavych, zatrymańniaŭ, źniavoleńnia, hvałtu, dvarovych sustreč, salidarnaści i supracivu.
U sumie muziej na siońnia sabraŭ kala 170 artefaktaŭ i niekalki tysiač fotazdymkaŭ i videazapisaŭ.
Ź mierkavańniaŭ biaśpieki mnohija rečy pakul nie demanstrujucca ŭ stałaj ekspazicyi. Častka ž ź ich — ananimizavanaja.
Acalełyja biuleteni, na jakich možna pabačyć hałasy ludziej, pieradała muzieju byłaja palitźniavolenaja, aktyvistka «Jeŭrapiejskaj Biełarusi» Palina Šarenda-Panasiuk.
Kamplekt z 20 biuleteniaŭ uručyli joj žychary Bresta, uratavaŭšy ich ad poŭnaha spaleńnia ŭ piečy haradskoj kacielni.
Addanym hałasam za Śviatłanu Cichanoŭskuju papiaredničała jaje rehistracyja kandydatkaj u prezidenty. Na vystavie možna pabačyć toje samaje paśviedčańnie ab rehistracyi.
A hetaja čornaja bajka naležyć žurnalistu i błohieru Alaksandru Ivulinu. U jaje jon byŭ apranuty padčas sudovych pasiadžeńniaŭ 2021‑2022 hadoŭ.
Siarod pradmietaŭ, jakija byli evakujavanyja ŭ miežach prajekta, šmat śviedčańniaŭ i z 1990-ch. Naprykład, zaprašeńnie na akcyju «Čarnobylski šlach — 1996»; brašura «Šlach u nikudy, albo Dva hady prezidenctva A. Łukašenki», vydadzienaja ŭ 1996 hodzie; pieradvybarčaja ŭlotka Stanisłava Šuškieviča z prezidenckaj kampanii 1994 hoda.
Supracoŭniki muzieja praciahnuć źbirać rečy-dokazy złačynstvaŭ i salidarnaści, achviarnaści i niazłomnaści biełarusaŭ. Kamanda vieryć, što adnojčy ŭsie pradmiety zojmuć hanarovaje miesca ŭ muziei ŭžo na biełaruskaj vulicy.
Ciapier čytajuć
Hieroja telefonnych źlivaŭ pałkoŭnika Kisiala, jaki zaklikaŭ kalečyć demanstrantaŭ, raptoŭna apuścili na rajonny ŭzrovień10
Kamientary