Jakija praduktovyja sietki źjavilisia i źnikli ŭ Biełarusi ŭ apošnija hady? Takich niamała
Dniami pa sacsietkach pajšli čutki, što kramy papularnaj sietki dyskaŭntaraŭ «Chit!» u Biełarusi pacichu zakryvajucca. Ci tak heta i jak apošnim časam raźvivajucca sietki kram u krainie? Vydańnie Blizko.by vyvučyła ŭsio samaje cikavaje.
Što tam z «Chitom»?
Niadaŭna ŭ sacsietcy Threads zaŭvažyli, što niejkija kramy sietki «Chit!» (jaje raźvivaje kampanija «Jeŭrahandal») stali zakryvacca. Naprykład, u Minsku i ŭ Dziaržynsku, pavodle zaŭvah vidavočcaŭ, byŭ «Chit!» — staŭ «Jeŭraopt». I heta nibyta nie adzinkavyja prykłady.
Vydańniu «Anłajnier» u sietcy paćvierdzili, što častku kram pad hetym brendam sapraŭdy zakryvajuć i pastupova pieravodziać u inšyja farmaty, u tym liku ŭ «Jeŭraopt». Tak, za apošnija try hady cełych 140 kram voś tak źmianili farmat. Ale bolš za 200 «Chitoŭ» pa-raniejšamu pracujuć, i choć niejkija jašče, napeŭna, pamianiajuć šyldy, usie kramy «Chit!» zakryvać nie buduć. Ale i novyja adkryvać bolš nie stanuć.
Uvohule ž sietki kram vajujuć za kupcoŭ i pastajanna transfarmujucca. Niejkija rastuć, niejkija ŭciskajucca. Adnyja zakryvajucca, na ich miesca prychodziać novyja. Kamuści ŭdajecca chutka vyraści i stać bujnoj sietkaj, inšyja tak i zastajucca mikrasietkami na niekalki kram. Niekatoryja ž kramy zastajucca hordymi adzinočkami.
U hetym artykule havorka pra tyja novyja šyldy, jakija źjavilisia ŭ Biełarusi apošnim časam, a taksama tyja staryja, jakija pakinuli ci abmiežavali rynak.
Novyja adkryćci
«UNISTORE opt&roźnica»
Sietku raźvivaje kampanija «JuniStor Hrup», jana ž viadzie sietki kram «Vožyk» i «Siem piatnic». Pieršaja minskaja krama adkryłasia ŭ mai 2021 hoda, dakładniej, administracyjna jana znachodzicca pa-za stalicaj, u rajonie vioski Baravaja ŭ Baraŭlanskim sielsaviecie, na vyjeździe ź Minska pa Łahojskim trakcie.
Ciapier u sietcy 8 kram: pa adnoj u Breście, Viciebsku, Homieli, Hrodnie, Salihorsku. Taksama farmalna ŭsiaho adna krama ŭ Minsku (u Kamiennaj Horcy) i jašče dźvie pad Minskam: užo zhadanaja ŭ Baravoj i ŭ Sienickim sielsaviecie, adrazu za MKAD u handlovym centry «Sienica» (pryčym na sajcie kampanii markier na karcie staić nie na svaim miescy).
«Razumny vybar»
Sietku «Razumny vybar» zapuściła kampanija «Libretyk» — taja samaja, što raźvivaje sietku «Susiedzi». Pieršyja dźvie kramy adkrylisia ŭ Baranavičach u studzieni 2022 hoda.
Ciapier u sietcy jość 26 kram u 13 haradach krainy (pieravažna ŭ rajcentrach). Ź ich u Minsku ŭsiaho 3 punkty (i jašče adzin u pasiołku Jubilejny za Sienicaj). Sietka pazicyjanuje siabie jak novy farmat štodzionnych kuplaŭ: usio samaje patrebnaje, pobač i pa nizkich cenach.
«Biełka»
Krama «Biełka» adkryłasia ŭ staličnaj Łošycy na pačatku 2022 hoda — TAA «100rytejł» zapuściła punkt na vulicy Uładzisłava Syrakomli. Z taho času taja krama začyniłasia, ale ciapier u Minsku pracujuć jašče try: dźvie na praśpiekcie Dziaržynskaha i adna na vulicy Cimirazieva.
Sajta ŭ kramy niama, prosta jašče adna nievialikaja sietka. Nahadvaje sietku «Zialony klon», adna z kram jakoj, da słova, taksama jość u Łošycy (ale kiruje joj inšaja kampanija).
«Kvasoŭski»
Pra hetuju sietku vy napeŭna nie čuli, choć pra kampaniju, jakaja staić za joj, čuć mahli. Prynamsi, kali vy žyviacie ŭ Hrodzienskaj vobłaści. U vioscy Kvasoŭka pad Hrodnam pracuje znakamity vytvorčy kaapieratyŭ imia Vitala Kramko, jaki vyras z kałhasa «Kastryčnik» i viadzie svaju historyju z 1949 hoda. Kałhas, a paśla i kaapieratyŭ nieadnarazova ŭdastojvalisia dziaržaŭnych uznaharod.
Svaju pradukcyju pradpryjemstva realizuje ŭ tym liku praz ułasnuju sietku «Kvasoŭski». Usiaho ŭ joj 5 kram: čatyry ŭ Hrodnie i rajonie i adna ŭ Minsku — šukajcie jaje ŭ mikrarajonie Brylevičy. Staličnaja krama adkryłasia ŭ śniežni 2022-ha.
«Sputnik»
Kramy «Sputnik» (amal z takim ža łahatypam, jaki byŭ u zakrytaj adnajmiennaj rasijskaj pošukavaj sistemy) źjavilisia ŭ vieraśni 2023 hoda: tak pieranazvali hipiermarkiety hipierdyskaŭntara «Śviatłafor». Tady kupcam abiacali, što ceny ŭ abiedźviuch sietkach buduć adnolkavymi.
Staronka sa śpisam kram na sajcie novaj sietki złamanaja, a pošukaviki pakazvajuć, što ŭ Minsku «Sputnik» tolki adzin — na vulicy Karžanieŭskaha — plus jašče adzin adrazu za MKAD, u handlovym centry DiaMond City. Taksama «Sputniki» znajšlisia ŭ abłasnych centrach (akramia Bresta), Babrujsku, Barysavie, Žłobinie, Lidzie, Mazyry i Oršy — razam 12 punktaŭ.
«Vyhada»
Dyskaŭntar «Vyhada!» — heta ŭtvareńnie ZAT «Junifud», jakoje raźvivaje sietku «Ałmi», mienavita tak nazyvajecca źnižkavaja prahrama ŭ hetaj sietcy. Dyk voś, pieršaja krama «Vyhada!» adkryłasia ŭ lutym 2024‑ha ŭ Hrodnie (znoŭ Hrodna!) z banerami «Nizkija ceny! Kožnaja kupla z vyhadaj!».
Tady, dva ź lišnim hady tamu, ŚMI raskazvali, što «Vyhada!» stanie novaj sietkaj, u jakuju moža pierajści častka kram «Ałmi». Na toje, što ŭsio ž taki płanujecca sietka, pakazvaje i zahałovak «Adrasy kram» na novym sajcie. Voś tolki adras tak da hetaha času i zastaŭsia adnym-adzinym.
«Miestnoje iźviestnoje»
Sietku «Miestnoje iźviestnoje» zapuściła kampanija «Hrynroźnica» — taja samaja, jakaja kiruje sietkaj supier– i hipiermarkietaŭ Green. Jak paviedamlaje sajt sietki, «Miestnoje iźviestnoje» — heta handlovaja marka pravilnaha charčavańnia, usia pradukcyja naturalnaja, vyraščanaja ŭ ekałahična čystych miascovaściach jak u Biełarusi, tak i za jaje miežami.
Pieršyja piać kram adkrylisia ŭ Minsku 21 červienia 2024 hoda, ale voś asobnaha sajta ŭ novaj sietki znajści nie zmahli (ci choć by śpisa kram na sajcie Green). «Jandeks.Karty» pakazvajuć, što ciapier u sietcy 4 kramy: try pa starych adrasach i adna novaja. A voś jašče dva punkty pa starych adrasach, u Hrušaŭcy i Uruččy, z studzienia 2025‑ha zakrytyja.
«Znajomy»
«Znajomy» — heta sietka, jakuju zapuściŭ Barysaŭski kambinat chlebapraduktaŭ. Pieršaja krama adkryłasia krychu bolš za hod tamu, u studzieni 2025-ha, u Barysavie. Ale pa stanie na červień 2026‑ha ŭ sietcy tak i zastałasia hetaja adna krama. Čamu tady havorycca pra sietku? Tamu što chlebakambinat sam tak i zajaŭlaŭ: «UP «Barysaŭski kambinat chlebapraduktaŭ» z honaram abviaščaje pra adkryćcio novaj roźničnaj sietki «Znajomy». Pieršaja krama adkryjecca ŭžo zaŭtra…»
Naohuł u kambinata jość užo minimum dźvie ŭłasnyja sietki: «Uładar» i «Turecki kumpiačok», a taksama asobnyja kramy «Mielnik», «Kałasok», «Miasny dom», «Piatačok», «Miasko», «Łahojčanka». Niachaj vas nie ździŭlajuć miasnyja kramy ŭ «chlebnaj» sietcy, tamu što Barysaŭski miasakambinat źjaŭlajecca filijałam kambinata chlebnaha. I pry takoj składanaj padparadkavanaści dy mnostvie brendaŭ zdajecca, što na raźvićcio «Znajomaha» prosta nie zastałosia resursaŭ.
A jakija sietki zakrylisia?
«Proviant'»
Sietka kram «Proviant'» (mienavita ŭ takim napisańni) ad TAA «PravijantHrup» była niemaleńkaj dla Minska: da vosieni 2021 hoda ŭ stalicy naličvałasia 35 jaje kram, jašče było 7 punktaŭ u Baranavičach i adna krama ŭ Niaśvižy.
U roznyja časy ŭ sietku «Proviant'» uvachodzili mahaziny «Saviecki» (u Baranavičach) i «Azareńnie». Ale ŭžo ŭ 2022‑m sietka prosta zakryłasia. Častku jaje kram vykupiła kampanija «Libretyk» (joj naležyć sietka «Susiedzi»). Pryčynaj zakryćcia sietki «Proviant'» nazyvajuć bankructva.
Spar
Spar — heta bujnaja niderłandskaja sietka kram z 90‑hadovaj historyjaj. Zaraz pa ŭsim śviecie pracujuć bolš za 13 800 kram u 48 krainach. Nazva, darečy, pierakładajecca jak «jełka» — jaje stylizavanaja vyjava jość na łahatypie kampanii.
U Minsku pieršaja krama sietki adkryłasia ŭ žniŭni 2017 hoda na Partyzanskim praśpiekcie, 40. Franšyzaj kiravała kampanija «Junifud», jakaja taksama raźvivała sietki «Ałmi» i Zakrama. Pradstaŭniki kampanii kazali, što da 2020 hoda płanujuć adkryć 60 kram u roznych haradach Biełarusi. Ale ŭ vyniku na ŭsiu krainu było ŭ 10 razoŭ mienš kram: try ŭ Minsku i pa adnoj u Breście, Hrodnie, Babrujsku, Pinsku, Kobrynie i Mazyry. Pry hetym častka ź ich mieła nazvy Eurospar i Interspar. A ŭ krasaviku 2024‑ha zakryłasia i apošniaja staličnaja krama hetaj sietki (ich pacichu pieraviali ŭ sietku «Ałmi»). Nakolki viadoma Blizko.by, heta samaja bujnaja suśvietnaja sietka kram, jakaja pracavała i ŭ Biełarusi.
«Jeŭrahandal» pierafarmatoŭvaje svaje kramy «Chit!» Što budzie zamiest ich?
Biełarusy skardziacca, što lubimyja syrki z pandaj užo «nie tyja». Ci źmianili recept paśla pieradačy «Savuškavamu praduktu»?
U Minsk-Śviecie adkryłasia krama, u jakoj možna zamović picu ŭ kasira. Zrobiać za try chviliny
«Tolki nie śpisvaj słova ŭ słova». U Hrodnie adkryvajuć kramu «Kuźniečik», padazrona padobnuju na polskuju «Žabku»
Hieroja telefonnych źlivaŭ pałkoŭnika Kisiala, jaki zaklikaŭ kalečyć demanstrantaŭ, raptoŭna apuścili na rajonny ŭzrovień12
Kamientary