Abiełarda de ła Espryelja, jaki vystupaje za vajnu sa złačynnaściu i partyzanami, pavodle aficyjnych danych ź nievialikaj pieravahaj pieramahaje ŭ druhim tury prezidenckich vybaraŭ. Jaho supiernik Ivan Siepieda, adnak, zajaviŭ, što zapatrabuje pieraliku, piša Bi-bi-si.
Pa vynikach padliku bolš čym 99% biuleteniaŭ de ła Espryelja nabiraje 49,65% hałasoŭ, a jaho levy sapiernik Siepieda — 48,70%. U absalutnych ličbach ich raździalaje kala 246 tys. hałasoŭ, pieradaje Reuters.
Adnak Siepieda zajaviŭ, što jaho pieradvybarčy štab zapatrabuje pieraliku biuleteniaŭ z 33 tys. vybarčych skryniaŭ.
Prezident ZŠA Donald Tramp da vybaraŭ vykazaŭ poŭnuju padtrymku kandydatury de ła Espryelji. ZŠA akazvajuć Kałumbii vajskovuju dapamohu koštam na miljardy dalaraŭ, pieravažna dla baraćby z narkotykami. U levaha prezidenta Hustava Pietra adnosiny z Trampam časam byli napružanyja.
Dziaržsakratar ZŠA Marka Rubia ŭžo pavinšavaŭ ź pieramohaj na vybarach de ła Espryelju. «Hety vynik adlustroŭvaje volu kałumbijskaha naroda i jaho prychilnaść demakratyi», — zajaviŭ Dziarždepartamient ZŠA.
De ła Espryelja, 47‑hadovy advakat, jaki maje hramadzianstva jak Kałumbii, tak i ZŠA, da niadaŭniaha času byŭ daloki ad kałumbijskaha palityčnaha isteblišmientu.
Jon zarabiŭ miljony na svajoj advakackaj dziejnaści; siarod jaho klijentaŭ byli bosy ŭzbrojenych hrup, što handlujuć narkotykami, machlary i futbolnyja zorki.
Palityk, jaki achvotna nazyvaje siabie «Tyhram» (El Tigre), vystupaje za svabodnaje našeńnie zbroi, dazvoł na frekinh nafty, budaŭnictva miehaturmaŭ i dalaryzacyju ekanomiki (pa anałohii z Salvadoram). Jaho pieramoha praciahvaje tendencyju pośpiechu ultrapravych palitykaŭ, što simpatyzujuć Donaldu Trampu, u krainach Łacinskaj Amieryki.
Najbolšyja nastupstvy pieramohi de ła Espryelji moža mieć dla šmathadovaha mirnaha pracesu ŭ Kałumbii. U 2016 hodzie było padpisana mirnaje pahadnieńnie z rucham FARC. Vajna ź im zabrała ŭ krainie čverć miljona žyćciaŭ. Adnak uzbrojenyja hrupoŭki, što adkałolisia ad paŭstancaŭ, a taksama narkakarteli pa-raniejšamu kantralujuć častku terytoryi krainy.
Ekspart kakainu dasiahnuŭ histaryčnaha rekordu, adznačaje AFP.
Za 10 hadoŭ miru Kałumbija pieražyła prykmietny rost dabrabytu, ale jaho vyniki raźmierkavalisia vielmi nieraŭnamierna.
De ła Espryelja abiacaŭ nieadkładna spynić pieramovy z hrupami, jakija admovilisia razzbrojvacca, i pačać suprać ich 90‑dzionnuju kampaniju bambardzirovak pry padtrymcy ZŠA.
Ciapier čytajuć
Jakija retranślatary na miažy maje na ŭvazie Ukraina?10
Kamientary