Moža, vam treba 12‑pakajovaja kvatera ŭ Minsku? Majem taki varyjant
U starym katedžnym rajonie Minska pradajuć kvateru na 546 kvadrataŭ z basiejnam i biljardnaj. A pa fasadzie i nie skažaš.
Vulica Ilmienskaja — adzin z tych kutkoŭ Minska, pra isnavańnie jakich mnohija haradžanie navat nie viedajuć. Miž Sievastopalskim parkam i vulicaj Vatucina zachavaŭsia ceły kvartał katedžnaj zabudovy z sadami abapał vuzkich vułak i amal zaharadnaj atmaśfieraj. Pobač niama ščylnaj šmatpaviarchovaj zabudovy, tamu ciažka pavieryć, što da praśpiekta Niezaležnaści i stancyi mietro «Maskoŭskaja» adsiul možna datupać za 20 chvilin.
Mienavita tut, na Ilmienskaj, 14, na prodaž vystavili nu vielmi niezvyčajny abjekt. U abviestcy na Realt.by jon paznačany jak kvatera, ale na samoj spravie heta čatyrochuzroŭnievy taŭnchaus 2011 hoda pabudovy. Ahulnaja płošča składaje 545,8 kvadratnaha mietra, a pavodle budaŭničych normaŭ Biełarusi — amal 639 kvadratnych mietraŭ. Da abjekta taksama adnosicca działka ziamli płoščaj 8,46 sotki.
Usiaho tut naličvajecca 12 pakojaŭ, raźmierkavanych na čatyroch uzroŭniach.
Na pieršym paviersie — bankietnaja zała, haraž, saŭna, basiejn z dušavoj, pakoj adpačynku i sanvuzieł.
Druhi pavierch adviedzieny pad žyłuju častku. Tut raźmieščanyja kuchnia, try pakoi, try sanvuzły, dźvie dušavyja kabiny i asobny pakoj dla prasavańnia.
Treci pavierch zajmajuć kaminnaja zała, jašče dva pakoi i vialikaja prastora, jakaja spałučaje funkcyi haścioŭni, stałovaj i kuchni. Tut ža znachodzicca sanvuzieł z džakuzi, dušavoj kabinaj i pralna-sušylnaj technikaj.
Mansardny pavierch vyhladaje najbolš klimatyčna. Jon azdobleny naturalnym drevam, tut jość biljardnaja, barnaja zona z kamiennaj stojkaj, niekalki pakojaŭ, asobnaja spalnia, harderobnaja i jašče adzin sanvuzieł. U apisańni asobna zhadvajucca kanapy sa skury bujvała, vialiki televizar i viełatrenažor.
Praŭda, fotazdymki navodziać na dumku, što pierad nami nie zusim zvyčajny siamiejny dom. Na roznych pavierchach možna zaŭvažyć niekalki kuchniaŭ, asobnyja zony adpačynku, šmat sanvuzłoŭ i dušavych, a taksama pamiaškańni, jakija vyhladajuć jak samastojnyja žyłyja błoki.
Ahulnaja leśvica taksama bolš nahadvaje ŭnutrany padjezd, čym pryvatnuju leśvicu ŭ adnasiamiejnym domie.
Tamu abjekt vyhladaje chutčej jak niekalki amal aŭtanomnych prastoraŭ, abjadnanych pad adnym dacham. U takim farmacie jon moža padyści nie tolki vialikaj siamji ź niekalkich pakaleńniaŭ, ale i dla arendnaha biznesu, haściavoha doma ci nievialikaha apart-hatela. Jak atrymałasia vyśvietlić, raniej tut sapraŭdy raźmiaščaŭsia haściničny abjekt «Katedž na Ilmienskaj».
Turysty, vialikija kampanii i biźniesmieny mahli arandavać jak uvieś katedž, tak i asobnyja numary-apartamienty. Budynak časta zdavali ŭ karotkaterminovuju arendu viečaryny, bankiety, pryjomy ci karparatyvy.
Pra toj čas nahadvajuć vielmi roznyja pa nastroi i ŭzroŭni azdableńnia interjery. Pobač z basiejnam, saŭnaj, biljardnaj i kaminnaj załaj možna ŭbačyć davoli prostyja kuchni, standartnyja dušavyja kabiny, ružovyja ścieny i zvyčajnuju meblu.
Hałoŭnaja kaštoŭnaść abjekta — nie ŭ dyzajnierskim ramoncie, a ŭ redkim spałučeńni łakacyi, ułasnaha ŭčastka i abjomaŭ.
Z techničnaha punktu hledžańnia heta sapraŭdy narmalna abstalavany dom. Tut jość ułasnaja hazavaja kacielnia, aŭtanomnaje aciapleńnie, ciopłyja vadzianyja padłohi, sistema kandycyjanavańnia, videanazirańnie i optavałakonny internet.
Na zakrytaj terytoryi praduhledžana parkoŭka na čatyry aŭtamabili. U dvary taksama raźmieščana altanka z naturalnaha zruba płoščaj kala 15 kvadratnych mietraŭ.
Za hety abjekt prosiać 4,15 miljona rubloŭ, abo prykładna 1,5 miljona dalaraŭ. Košt kvadratnaha mietra składaje kala 2348 dalaraŭ.
Ale što z domam zrabić u ideale, nie vidavočna. Moža być, ukłaści jašče trochi hrošaj u sučasny ramont i meblu i znoŭ ekspłuatavać jak apart-hatel?
Kamientary