Kolki budzie kaštavać navučańnie u biełaruskich VNU ŭ novym navučalnym hodzie
Mnohija biełaruskija VNU ŭžo zaćvierdzili košt navučańnia na płatnych adździaleńniach u 2026/2027 navučalnym hodzie.
Na praciahu dvuch papiarednich hadoŭ płata za navučańnie nie pavyšałasia. Ciapier, pavodle danych Myfin, u niekatorych ustanovach vyšejšaj adukacyi jana prykmietna vyrasła ŭ paraŭnańni z uzroŭniem trochhadovaj daŭnaści.
Tak, u Biełaruskim dziaržaŭnym univiersitecie infarmatyki i radyjoelektroniki (BDUIR) za navučańnie na dzionnaj formie ŭ nastupnym navučalnym hodzie, u zaležnaści ad fakulteta, studentam-płatnikam daviadziecca zapłacić ad 4600 da 5250 rubloŭ. Naprykład, na fakultecie infarmacyjnych technałohij i kiravańnia košt navučańnia składzie 5250 rubloŭ, što prykładna na 20 % bolš, čym u 2023 hodzie.
U Akademii kiravańnia na dzionnaj formie košt navučańnia pa asnoŭnych śpiecyjalnaściach («dziaržaŭnaje kiravańnie i prava», «dziaržaŭnaje kiravańnie i ekanomika», «kiravańnie infarmacyjnymi resursami») ustanoŭleny na ŭzroŭni 5900 rubloŭ. Heta bolš čym na tracinu pieravyšaje rascenki trochhadovaj daŭnaści.
U Biełaruskim dziaržaŭnym miedycynskim univiersitecie pa samych zapatrabavanych śpiecyjalnaściach — «lačebnaja sprava» i «piedyjatryja» — hod navučańnia budzie kaštavać 5 tysiač rubloŭ, a dla budučych stamatołahaŭ — 5,9 tysiačy rubloŭ. U paraŭnańni z 2023 hodam košt pavialičyŭsia prykładna na 13 %.
Nahadajem, što z hetaha hoda ŭ miedycynskich VNU Biełarusi skasavany nabor na płatnaje navučańnie na dzionnuju formu. Jon zastaŭsia tolki dla zavočnaj formy pa śpiecyjalnaści «farmacyja». Tamu havorka idzie pra studentaŭ, jakija pastupili va ŭniviersitety raniej.
Biełaruski dziaržaŭny technałahičny ŭniviersitet dla bolšaści śpiecyjalnaściej ustanaviŭ košt płatnaha navučańnia na ŭzroŭni 5036 rubloŭ. Tolki na fakultecie infarmacyjnych technałohij jon budzie vyšejšy — 5164 rubli.
U Biełaruskim dziaržaŭnym linhvistyčnym univiersitecie hod navučańnia dla studentaŭ-płatnikaŭ dzionnaj formy budzie kaštavać 4515 rubloŭ. Dla paraŭnańnia: u 2023 hodzie jon składaŭ 3948 rubloŭ.
U Biełaruskim dziaržaŭnym ekanamičnym univiersitecie pa ŭsich śpiecyjalnaściach navučańnie abydziecca ŭ 3896,4 rubla.
Kamientary