Aŭtobus, aŭtamabil abo spadarožnaja mašyna. Kolki ciapier kaštuje daroha ź Biełarusi ŭ Polšču

Most pahladzieŭ, kolki ciapier kaštujuć roznyja varyjanty pajezdki ź Biełarusi ŭ Polšču — aŭtobus, asabisty aŭtamabil i spadarožnaja mašyna.

Aŭtobus: ad 130 rubloŭ i da 27 hadzin u darozie

Adzin z samych papularnych sposabaŭ dabracca da Polščy — aŭtobus. Heta rejsy pa fiksavanych maršrutach z zrazumiełymi cenami, adnak čas u darozie časta niepradkazalny i mocna zaležyć ad čerhaŭ na miažy.

Pavodle danych pieravozčykaŭ, bilety kaštujuć prykładna ad 134 da 195 rubloŭ, abo kala 175—255 złotych, u zaležnaści ad napramku.

Raskidańnie pa maršrutach istotnaje: pajezdka z Hrodna ŭ Varšavu kaštuje prykładna 170—180 rubloŭ, abo kala 220—235 złotych, i zajmaje kala šaści hadzin, a z Hrodna ŭ Biełastok — kala 100 rubloŭ. Ź Minska da Biełastoka bilet kaštuje prykładna 160 rubloŭ.

Jość i inšyja napramki. Naprykład, z Bresta ŭ Varšavu bilet budzie kaštavać kala 138—167 rubloŭ, z Baranavičaŭ — prykładna 117 rubloŭ, z Babrujska — kala 135 rubloŭ. Pajezdka z Babrujska zajmaje prykładna 12 hadzin biez uliku miažy.

Z Homiela ŭ Varšavu bilet u siarednim kaštuje 150 rubloŭ. Samy doŭhi maršrut — z Mahilova ŭ Ščecin: kala 27 hadzin u darozie ź pierasadkami.

Pry hetym pieravozčyki ŭdakładniajuć: ahulny čas u darozie zaležyć ad prachodžańnia miažy.

Tyja, chto vielmi śpiašajecca, mohuć pierasadžvacca na miažy ŭ aŭtobusy, jakija stajać bližej da šłahbauma. Rascenki roznyja: čym bližej da miažy, tym daražej. U siarednim pierasadka kaštuje 50 jeŭra.

Mašyna: paliva, strachoŭka i rehistracyja

Pajezdka na aŭtamabili dla mnohich dazvalaje skaracić čas u darozie. Zvyčajna čerhi na aŭtamabilnych punktach propusku mienšyja, i ŭ spakojny čas miažu možna prajści za paŭtary-dźvie hadziny. Na «čyrvonym» kalidory i pry afarmleńni VAT heta zajmaje bolš času.

Pajezdka ź Minska ŭ Varšavu pa maršrucie praz Brest i Terespal składaje prykładna 560—600 kiłamietraŭ. Pry siarednim raschodzie 8 litraŭ na 100 kiłamietraŭ spatrebicca kala 45—48 litraŭ paliva. Pry košcie AI-95 u Biełarusi kala 2,68 rubla za litr vydatki na bienzin składuć prykładna 120—130 rubloŭ.

Taksama nieabchodna apłacić rehistracyju ŭ elektronnaj čarzie — 22,5 rubla.

Pajezdka z Hrodna ŭ Varšavu praz punkt propusku «Bruzhi — Kuźnica» i Biełastok składaje prykładna 380—420 kiłamietraŭ. Pry tym ža raschodzie heta kala 30—34 litraŭ paliva, abo prykładna 80—95 rubloŭ. Čas u darozie — kala šaści hadzin biez uliku čarhi na miažy, ale ŭ zahružanyja dni abo ŭ vychadnyja daroha moža zaniać značna bolš času.

Pajezdka z Hrodna ŭ Biełastok na bienzin abychodzicca prykładna ŭ 13—16 rubloŭ. Maršrut praz punkt propusku «Bruzhi — Kuźnica» składaje kala 70 kiłamietraŭ.

Pry hetym u Polščy nieabchodna aformić strachoŭku na aŭtamabil — kala 900 złotych u hod (700 rubloŭ) abo prykładna 150 złotych u miesiac (115 rubloŭ).

Paputki. «Možna navat tarhavacca»

Jašče adzin sposab — pajezdki z paputnikami. U pamiežnych čatach jość asobnyja raździeły, dzie vadzicieli i pasažyry damaŭlajucca naŭprost.

— Dastatkova raźmiaścić abjavu z maršrutam i dataj — vadzicieli zvyčajna sami adhukajucca ŭ asabistyja paviedamleńni, — raskazvaje Illa.

Prapanoŭ, jak praviła, jość niekalki, i ŭsie — z roznym koštam.

Illa byŭ ździŭleny vynikam: daroha ad padjezda ŭ Hrodnie da padjezda ŭ Biełastoku abyšłasia prykładna ŭ 50 rubloŭ (65 złotych), a sama pajezdka zaniała kala dźviuch hadzin. «Jak byccam taksi vyklikaŭ», — kaža jon.

Z Varšavy da Hrodna daroha abydziecca daražej — kala 80—120 rubloŭ, abo kala 105—160 złotych.

Časam sustrakajucca i inšyja varyjanty: vadziciel moža ŭziać paputnika biaspłatna, ale z umovaj, što toj voźmie častku hruzu, jaki pieravozicca.

Pavodle aficyjnych normaŭ, z Polščy ŭ Biełaruś možna ŭvozić da 25 kiłahramaŭ tavaraŭ na sumu da 500 jeŭra na čałavieka. Pry hetym, pa słovach udzielnikaŭ takich pajezdak, častku bahažu časam raźmierkoŭvajuć pamiž pasažyrami.

— U abjavach časam prosta pišuć: «Vaźmu biaspłatna za kiłahramy». Kali ty jedzieš bieź vialikaha bahažu, možaš uziać častku tavaru na siabie — i tady tabie źniziać apłatu za prajezd

• 2
• 0
• 3
• 0
• 0
• 0
• 0
• 0