«Usio adno što zub mudraści vydalić». Biełarus raskazaŭ, jak zrabiŭ vazektamiju ŭ Polščy
Na čaćviorty hod žyćcia ŭ Polščy biełarus Jahor advažyŭsia na vazektamiju. Da hetaha jaho padšturchnuli stomlenaść ad małodšaha dziciaci i strach niezapłanavanaj ciažarnaści ŭ krainie, dzie aborty mocna abmiežavanyja. Jon raskazaŭ vydańniu Most, jak zapisaŭsia na praceduru ŭ Biełastoku, čamu doktar nie sprabavaŭ jaho adhavaryć i jaki «suvienir» atrymaŭ paśla apieracyi.
Vazektamija — heta apieracyja pa mužčynskaj sterylizacyi. Padčas pracedury błakujuć abo pierarazajuć siemiavynosiačyja pratoki, z-za čaho śpiermatazoidy bolš nie traplajuć u siemiannuju vadkaść. Paśla vazektamii mužčyna moža ejakulavać, ale ŭ vadkaści nie pavinna być śpiermatazoidaŭ.
«Małodšy śpinahryz zanadta mocna treple niervy»
U Jahora jość dzieci 4 i 11 hadoŭ. Upieršyniu pra vazektamiju, apieracyju pa mužčynskaj sterylizacyi, jon zadumaŭsia dva hady tamu. Ale tady zadumanaje nie realizavaŭ: dumaŭ, što takija apieracyi robiać tolki ŭ Varšavie. Niadaŭna biełarus znajšoŭ kliniku ŭ Biełastoku, horadzie, dzie zaraz žyvie.
«Małodšy śpinahryz nie daje volnaha času i zanadta mocna treple niervy. Voka tuzajecca ad vierahodnaści, što padobnych śpinahryzaŭ moža być bolš», — tłumačyć hałoŭnuju pryčynu svajoj vazektamii Jahor.
Dadatkovym arhumientam na karyść vazektamii stała i toje, što ŭ Polščy žančynam vielmi składana zrabić abort. Abmierkavaŭšy heta z žonkaj, biełarusy pryjšli da ahulnaj dumki, što apieracyju treba rabić.
«Usio adno što zub mudraści vydalić: bieź jaho žyćcio budzie praściejšym. Navošta lišni raz tuzacca? Pahnali», — apisvaje svaje emocyi pierad apieracyjaj mužčyna.
«Doktar daŭ mnie kułačok»
Zapisacca na praceduru Jahoru było nieskładana. Na adnoj z anłajn-płatformaŭ biełarus vybraŭ patrebnaha lekara i adpaviednuju datu. Na momant zapisu da lekara ŭ mužčyny nie było polskaha hramadzianstva, ale chapiła numara PESEL.
Paśla hetaha z mužčynam źviazalisia supracoŭniki kliniki i paprasili zdać analiz na zhortvalnaść kryvi. Za hetuju pasłuhu Jahor zapłaciŭ 120 złotych (kala 32 dalaraŭ).
Z užo atrymanymi analizami jon pryjšoŭ na pryjom da doktara. Biełarusu spadabałasia, što z boku doktara jon nie sutyknuŭsia ni z asudžeńniem, ni z prośbami jašče raz dobra padumać.
«Doktar pačaŭ hutarku maksimalna družalubna — z «Siema» (razmoŭnaje «pryvitańnie» na polskaj movie. — Most) i daŭ mnie kułačok. Znosiny byli takimi, kab rastapić lod i paźbiehnuć lutaha napružańnia», — kaža Jahor.
Pavodle słoŭ mužčyny, «pravierka na adekvatnaść» doŭžyłasia kala troch chvilin. U Jahora pravieryli dakumienty i ŭdakładnili, kolki ŭ jaho dziaciej.
«Kali ja razmaŭlaŭ z doktaram, nie było ni siekundy, kab jon sprabavaŭ mianie adhavorvać. Kali ja skazaŭ, kolki ŭ mienia dziaciej, jon naohuł nijak nie adreahavaŭ: jak zapaŭniaŭ dakumient, tak i praciahnuŭ. Dva dyk dva [dziciaci]», — paciskaje plačyma biełarus.
Pierad apieracyjaj mužčynie zrabili UHD, kab pravieryć, ci jość adchileńni i anamalii, a taksama paraili pić bolš vady.
«Zajšoŭ, zrabiŭ i ŭsio — rełaks»
Mužčyna pryznajecca, što pierad apieracyjaj adčuvaŭ lohkaje chvalavańnie. Pavodle jaho słoŭ, heta možna paraŭnać z pachodam da zubnoha. Samu apieracyju robiać pad miascovym narkozam. Pa adčuvańniach heta nahadała Jahoru nabivańnie tatuiroŭki.
«Krojać nievialiki nadrez, potym adčuvaješ lohkaje pakołvańnie. Zajšoŭ, zrabiŭ i ŭsio — rełaks».
Pracedura zaniała kala paŭhadziny i abyšłasia mužčynu ŭ 2,5 tysiačy złotych (kala 665 dalaraŭ). Na raźvitańnie Jahoru paraili sačyć za vodnym bałansam. Z momantu zapisu da doktara da vychadu z kabinieta paśla vazektamii ŭ biełarusa prajšło try dni.
«Absalutna pryziemlenaje, družalubnaje staŭleńnie», — apisvaje Jahor uzajemadziejańnie ź miedykam paśla apieracyi.
Na pamiać biełarusu padaryli stykier z vyjavaj pałavoha člena i podpisam «Chrabry pacyjent».
«Prosta jak dziaciej chvalać paśla naviedvańnia doktara — zabaŭna. Mikra-ačyŭka», — žartuje Jahor.
«Pieršy dzień chadziŭ jak pinhvinčyk»
Jahor pieranios apieracyju čatyry dni tamu.
«Pieršy dzień chadziŭ jak pinhvinčyk. Było adčuvańnie, niby pierakatvaješsia na draŭlanych nahach. A tak — nijakich fizijałahičnych adchileńniaŭ niama», — apisvaje svoj stan mužčyna.
Najbližejšy tydzień biełarusu daviadziecca paźbiahać fizičnych nahruzak: nie padymać ciažkija torby i nie chadzić u sportzału. taksama mužčynu treba sačyć za hihijenaj i akuratna apracoŭvać zonu, dzie było chirurhičnaje ŭmiašańnie.
Kab pacyjenty nie błytalisia ŭ paśladoŭnaści dziejańniaŭ, na raźvitańnie im vydajuć nievialiki buklet ź instrukcyjaj. Jahora paradavała, što rekamiendacyi tam napisanyja zrazumiełaj movaj.
Praz dva tydni biełarusu treba budzie zdać śpiermahramu.
«Kab pravieryć, ci nie zastałosia hetych biełych pacanoŭ u vadkaści», — tłumačyć mužčyna.
Za hetuju opcyju jamu taksama pryjdziecca zapłacić, ale košt pracedury jon pakul nie daviedvaŭsia.
«Kali zamaročycca, heta abaračalna»
Jašče pierad apieracyjaj Jahor viedaŭ, što vazektamija moža być jak abaračalnaj, kali mužčynam paśla viartajuć fiertylnaść, tak i nieabaračalnaj. Ale sam biełarus u padrabiaznaści nie ŭdavaŭsia.
«Vidać, apošnija varyjanty [vazektamii] abaračalnyja. Viedaju, što takaja mahčymaść jość. Kali mocna zachacieć i zamaročycca, to možna [usio viarnuć]», — kaža mužčyna.
Tym nie mienš, u ahladnaj budučyni Jahor nie bačyć sensu viartać sabie fiertylnaść.
«Dobra, što jość mahčymaść vyklučyć spantannyja niepryjemnaści, jakija mohuć być u darosłym uzroście», — reziumuje biełarus.
Što takoje mužčynskaja kantracepcyja ciapier? Navukoŭcy navučylisia vyklučać i ŭklučać vypracoŭku śpiermatazoidaŭ
Anarchist Dziadok vykazaŭsia suprać dazvołu na aborty. Ale ličyć, što zakanadaŭčaja zabarona ničoha nie daść
Navukoŭcy prydumali supraćzačatkavyja tabletki dla mužčyn. Jany realna dziejničajuć
Biełaruska pastaviła impłant u ruku dla kantracepcyi. Što heta takoje?
U tvitary piarepałach: łatvijski błohier zrabiŭ vazektamiju
Ciapier čytajuć
Kola Łukašenka skončyŭ univiersitet — ci trapić jon pad bližejšy pryzyŭ u armiju ci zmoža adkasić?18
Kamientary