Vy myjecie hetyja chatnija rečy zanadta redka

Štory i firanki

Jak tłumačać ekśpierty Amierykanskaha fondu baraćby z astmaj i alerhijaj, ź jakimi razmaŭlali žurnalisty Washington Post, adnym z samych vialikich pyłazbornikaŭ u domie źjaŭlajucca štory i firanki. Hetyja elemienty dekoru pracujuć jak svojeasablivyja filtry, zatrymlivajučy vuličny pył i pachi, ale mienavita pra ich my zabyvajemsia čaściej za ŭsio.

Ekśpierty rajać nie abmiažoŭvacca tolki myćciom: štotydniovaja apracoŭka štor pyłasosam sa śpiecyjalnaj nasadkaj dapamoža pamienšyć kancentracyju alerhienaŭ, a paŭnavartasnaje myćcio varta pravodzić nie radziej za raz na try miesiacy. Kali ž firanki visiać na kuchni ci ŭ vannaj, dzie jany pastajanna sutykajucca z tłuščam, paraj abo ryzykaj źjaŭleńnia ćvili, hety intervał pavinien być jašče mienšym.

Pledy i miakkaja mebla

Asobnuju ŭvahu varta nadać zonie adpačynku, asabliva kali ŭ vas jość chatnija hadavancy. Pledy i dekaratyŭnyja paduški, jakija znachodziacca na kanapach i kresłach, vielmi chutka ŭbirajuć skurny tłušč i poŭść žyvioł.

Śpiecyjalisty rajać myć pledy, jakija lažać na kanapach, kresłach i łožkach, kožnyja adzin-dva tydni, u zaležnaści ad intensiŭnaści vykarystańnia, čachły dekaratyŭnych padušak — kožnyja dva-čatyry tydni, a sami paduški — prykładna raz na dva-try miesiacy.

Što tyčycca miakkaj mebli, to jaje abiŭku treba pyłasosić štotydzień, a zdymnyja čachły prać pa miery zabrudžvańnia. Hłybokaja ž čystka ŭsioj mebli z vykarystańniem śpiecyjalnaha abstalavańnia pavinna stać abaviazkovaj praceduraj kožnyja paŭhoda.

Kuchonnyja ručniki, survetki, rukavicy i prychvatki

Kuchonnyja ručniki ličacca adnymi z samych brudnych pradmietaŭ u domie, bo ludzi časta vykarystoŭvajuć ich dla samych roznych patreb — ad vycirańnia ruk da prybirańnia pavierchniaŭ.

Kab paźbiehnuć raspaŭsiudžvańnia bakteryj, ich treba mianiać kožnyja dzień-dva, asabliva paśla kantaktu z syrym miasam, rybaj abo ptuškaj. Pry hetym nie rekamiendujecca vykarystoŭvać kandycyjaniery dla bializny, jakija paharšajuć zdolnaść tkaniny ŭbirać vilhać.

Navat takija drobnyja rečy, jak kuchonnyja prychvatki i rukavicy, jakija pastupova ŭbirajuć tłušč i pachi ad pryhatavańnia ježy, patrabujuć rehularnaha myćcia raz na adzin-dva tydni.

Prykładna z takoj ža pieryjadyčnaściu varta myć i tkankavyja survetki dy darožki na stoł. Jak adznačajuć ekśpierty, hetyja pradmiety źbirajuć bolš krošak, tłušču, pyłu i vałasoŭ, čym ludzi sabie ŭjaŭlajuć.

Ručniki, dyvanki i štorki ŭ vannaj

Vanny pakoj z-za vysokaj vilhotnaści stvaraje idealnyja ŭmovy dla rostu ćvili. Tkankavyja dyvanki dla noh treba myć u haračaj vadzie minimum raz na miesiac, a paśla kožnaha vykarystańnia ich varta staranna prasušvać.

Heta ž tyčycca i ručnikoŭ dla duša: zdarovamu čałavieku dapuščalna karystacca ručnikom dva-try razy, ale pry najaŭnaści ekzemy abo inšych paškodžańniaŭ skury myćcio pavinna być štodzionnym.

Uvahi patrabujuć i štorki dla duša. Kab pamienšyć ryzyku źjaŭleńnia hrybka, ich rekamiendujecca pakidać raspraŭlenymi paśla vodnych pracedur, a vanny pakoj pravietryvać abo ŭklučać vyciažnuju vientylacyju.

Dla rehularnaj čystki śpiecyjalisty rajać vykarystoŭvać miakkija srodki, naprykład mylnuju vadu abo słaby rastvor vocatu i paźbiahać adbielvalnikaŭ dy inšych ahresiŭnych srodkaŭ, jakija mohuć spravakavać simptomy astmy.

Bolšaść tkankavych i płastykavych štorak taksama možna pieryjadyčna myć u pralnaj mašynie ŭ chałodnaj vadzie, ale varta papiarednie aznajomicca z rekamiendacyjami vytvorcy.

Paduški i namatraśniki

Asobnaj uvahi patrabuje i spalnaje miesca. Paduški rekamiendujecca myć kožnyja try—šeść miesiacaŭ, a taksama paśla chvaroby. Padčas suški možna vykarystoŭvać śpiecyjalnyja šaryki, kab napaŭnialnik raŭnamierna raźmierkavaŭsia.

Namatraśniki ludziam z alerhijaj varta myć raz na tydzień, a ŭładalnikam chatnich žyvioł — raz na miesiac, a kali ŭ domie niama ni žyvioł, ni alerhikaŭ — raz na try—čatyry miesiacy.

Namatraśniki jak i paścielnyja prynaležnaści rekamiendujecca myć u haračaj vadzie i sušyć pry vysokaj tempieratury, kab źniščyć i vydalić pyłavych klaščoŭ. Kali čachoł matraca ciažka źniać, jaho nieabchodna rehularna čyścić pyłasosam.

Miakkija cacki

Miakkija cacki taksama mohuć być krynicaj pyłavych klaščoŭ. Ich rekamiendujecca myć nie radziej za adzin raz na miesiac, źmiaściŭšy ŭ śpiecyjalny miašok abo navałačku. Dla cacak, jakija składana myć abo jakija nie vytrymlivajuć haračaj vady, ekśpierty rajać vykarystoŭvać pyłasos z nasadkaj dla abiŭki, kab vydalić klaščoŭ i pradukty ich žyćciadziejnaści.

Lažanki dla žyvioł

Narešcie, varta pamiatać pra lažanki dla chatnich žyvioł. Miescy adpačynku sabak i katoŭ źjaŭlajucca adnymi z samych prablemnych punktaŭ u domie z punktu hledžańnia hihijeny, tamu ich zdymnyja elemienty ekśpierty rajać myć nie radziej za raz u tydzień.

Pavialičyć

• 0
• 0
• 0
• 0
• 0
• 0
• 0
• 0