Źnik u SIZA pa spravie ab padatkach, a znajšoŭsia ŭ śpisie «ekstremistaŭ». Što viadoma pra biznesmiena z Žodzina Siarhieja Pako
U lipieni 2026 hoda ŭ pieraliku MUS «datyčnych da ekstremisckaj dziejnaści» źjaviłasia novaje imia — 51‑hadovy ŭradženiec Žodzina Siarhiej Pako. Dva hady tamu jon, paśpiachovy ŭładalnik smalenskaj handlovaj firmy, źnik u minskim SIZA jak fihurant padatkovaj spravy. Ciapier vyśvietliłasia: Minski abłasny sud vynies jamu žorstki prysud nie za padatki, a pa «pratesnych» artykułach i za chabar.
Siarhiej Pako naradziŭsia 30 studzienia 1975 hoda ŭ horadzie mašynabudaŭnikoŭ — Žodzinie. Jašče ŭ siaredzinie 90‑ch jon sprabavaŭ siabie ŭ biznesie i rehistravaŭsia jak indyvidualny pradprymalnik.
Ale paźniej svaju asnoŭnuju dziejnaść ščylna źviazaŭ z Rasijaj. U 2005 hodzie Siarhiej zasnavaŭ u rasijskim Smalensku TAA «Promsnab».
Biznes-madel kampanii była davoli prostaj. Firma zakuplała ŭ Biełarusi roznyja mietałavyraby — fłancy, pakoŭki dy inšyja detali, paśla čaho pierapradavała ich rasijskim pradpryjemstvam. Z adkrytych danych viadoma, što asnoŭnym pastaŭščykom dla «Promsnaba» (kala 64% ad usich pastavak) byŭ žodzinski Kuźniečny zavod ciažkich štampovak (KZCŠ). Jašče kala 16% pradukcyi išło z Baranavickaha stankabudaŭničaha zavoda, jaki źjaŭlajecca filijałam «Atłanta».
Amal usie prodažy pradpryjemstva — 99,87% — prypadali vyklučna na rasijski rynak. Biznes išoŭ uharu.
Ale ŭsio abrynułasia ŭ siaredzinie maja 2024 hoda, kali na terytoryi Biełarusi byŭ niečakana zatrymany transpart «Promsnaba». Barysaŭski mižrajonny adździeł Departamienta finansavych rasśledavańniaŭ KDK zavioŭ suprać Siarhieja Pako kryminalnuju spravu pa ekanamičnym artykule — častcy 3 artykuła 243 KK (uchileńnie ad vypłaty padatkaŭ). A sam uładalnik prybytkovaha biznesu adpraviŭsia ŭ SIZA.
Pakolki Siarhieju naležała pamiaškańnie ŭ rodnym Žodzinie, DFR paličyŭ jaho niezarehistravanym «pastajannym pradstaŭnictvam» rasijskaj firmy ŭ Biełarusi. Abapirajučysia na hety fakt, śledčyja zaličyli ŭsiu vyručku kampanii za 13 hadoŭ u biełaruskuju padatkovuju bazu. U kastryčniku 2024 hoda kantralory vystavili kałasalny rachunak: bolš za 2,8 miljona biełaruskich rubloŭ danaličeńniaŭ i pieni.
Jurysty kampanii sprabavali davieści poŭnuju absurdnaść takich pretenzij. Jany spasyłalisia na mižuradavaje pahadnieńnie 1995 hoda ab paźbiahańni padvojnaha padatkaabkładańnia, bo pamiaškańnie vykarystoŭvałasia vyklučna dla zakupak i pa zakonie nie mahło ličycca pradstaŭnictvam.
A ŭ listapadzie 2024 hoda śledčyja rasijskaha SK pa Smalenskaj vobłaści razam ź biełaruskim DFR praviali pieratrus u ofisie «Promsnaba». Była aryštavana majomaść firmy. Biez svajho zasnavalnika firma vielmi chutka pajšła na dno.
Nieŭzabavie dyrektaram staŭ inšy čałaviek, a finansavyja pakazčyki abvalilisia ŭ niekalki razoŭ. Užo ŭ 2025 hodzie čysty prybytak skaraciŭsia z 73 miljonaŭ rasijskich rubloŭ da 1,2 miljona.
Paśla publikacyj advakataŭ u studzieni 2025 hoda pra los biznesmiena ničoha nie było čuvać amal paŭtara hoda. Tolki 6 lipienia 2026 hoda jahonaje proźvišča ŭspłyło ŭ abnoŭlenych śpisach MUS.
U prysudzie niama taho samaha padatkovaha artykuła, ale niajasna, ci to Pako kampiensavaŭ škodu, a tamu artykuł advaliŭsia, ci to prosta abvinavačvańnie pierakvalifikavali, ci to za padatki sudzili asobna.
Adnak Siarhieja Pako asudzili pa cełym bukiecie palityčnych artykułaŭ. U vynikovym prysudzie fihurujuć «raspalvańnie varožaści» (č. 1 art. 130), «zakliki da dziejańniaŭ na škodu nacyjanalnaj biaśpiecy» (č. 3 art. 361) i ŭdzieł u pratestach (č. 1 art. 342). Dadaŭsia tudy i artykuł za daču chabaru ŭ vialikim pamiery (č. 3 art. 431 KK).
Pa adnym tolki karupcyjnym artykule minimalnaje pakarańnie — 5 hadoŭ kałonii, a z ulikam palityki termin maje być našmat bolšym. Siarhiej Pako pryznany palitviaźniem.
«Naša Niva» — bastyjon biełaruščyny
PADTRYMAĆ
Kamientary