«Najhoršy va ŭsioj Biełarusi». Žychary Słonima raskrytykavali adkaz rajvykankama pra čyhunačny pierajezd
Žychary Słonima zastalisia niezadavolenyja aficyjnym adkazam rajvykankama na skarhu pra stan čyhunačnaha pierajezda na vulicy Minski trakt. Na ich dumku, čynoŭniki nie zrazumieli sutnaści prablemy, bo ludzi prasili nie prosta załatać jamy asfaltam, a całkam zamianić raźbity naścił pamiž rejkami, piša BGmedia.
Paśla taho jak miascovy žychar nazvaŭ pierajezd «vyprabavalnym stendam dla padvieski» i źviarnuŭ uvahu na vykarystańnie ŭ inšych haradach sučasnych humavych naściłaŭ, u čat-bocie rajvykankama paviedamili, što ŭ žniŭni—vieraśni tut zapłanavany zvyčajny jamačny ramont.
Hety adkaz vyklikaŭ novuju chvalu abureńnia.
Słonimcy padkreślivajuć, što łatańnie dzirak nie vyrašyć šmathadovuju prablemu, i nazyvajuć abjekt najhoršym čyhunačnym pierajezdam va ŭsioj Biełarusi.
Vadzicielam davodzicca litaralna paŭźci, kab nie paškodzić mašyny, albo vyjazdžać na sustrečnuju pałasu dziela abjezdu vielizarnaj jamy, a matacyklisty časam uvohule viaduć transpart u rukach. Žychary adznačajuć nieefiektyŭnaść čarhovych łatak, jakija chutka razburajucca, a ŭ śpiakotu płaviacca na kołach.
Da taho ž ludzi skardziacca na praciahłyja pierakryćci ruchu, kali stajać pierad šłahbaumam davodzicca pa 15—30 chvilin jašče da źjaŭleńnia ciahnika.
U vyniku haradžanie sychodziacca ŭ mierkavańni, što zamiest kaśmietyčnaha ramontu nieabchodna pravieści kapitalnuju rekanstrukcyju i zamianić staroje bietonnaje pakryćcio sučasnym humavym. Mienavita hetaha jany i patrabavali ŭ zvarocie, adnak u adkaz atrymali rašeńnie zusim inšaha kštałtu.
Kamientary