Chakiery źlili pierapiski Ksienii Sabčak — pra cenzuru i pierajezd napačatku vajny. Jość i razmovy ź Jermakom

8 lipienia Ksienija Sabčak zajaviła, što chakiery ŭzłamali jaje poštu i na niekatory čas atrymali dostup da jaje telehram-kanałaŭ. Chakierskaja hrupa Black Mirror i prajekt «VČK-OHPU» vykłali šmat skrynšotaŭ i hałasavych paviedamleńniaŭ Sabčak (ale sama jana nie pryznavała ich sapraŭdnaść).

Z hetych pierapisak vynikaje, što cenzuru kanałaŭ Sabčak (heta jutub-kanał «Ostorožno, Sobčak» i telehram-kanały «Ostorožno, novosti», «Ostorožno, Moskva», «Sobčak», «Krovavaja barynia») kuryrujuć vice-mer Maskvy Alaksiej Niemiaruk i hiendyrektar arhanizacyi «Dyjałoh» Uładzimir Tabak (źviazany z administracyjaj Pucina), jaki pieradaje ŭkazańni namieśnika kiraŭnika Administracyi Siarhieja Kiryjenki.

Sabčak prylatała, naprykład, pa intervju ź Illom Ramiasłom — hety praŭładny błohier raptam vykazaŭsia suprać Pucina i trapiŭ u psichijatryčnuju balnicu. Sabčak spačatku abaraniajecca: «Ja ščyra liču, što taki mudak z hetymi tezisami vyhadny zaraz SVK (tak šyfrujuć Kiryjenku, pa pieršych inicyjałach. — NN)». Tabak złujecca: «Chaču, kab ty žyła ŭ adčuvańni, što ja mahu tabie nie prabačyć». 

Administracyja prezidenta Rasii i meryja Maskvy zastalisia niezadavoleny pastami kanałaŭ Sobčak pra ataku dronaŭ na Maskvu. Jana dasyłaje Tabaku hałasavoje: «Kali ja*uć, chaču razumieć za što».

Sabčak tady pisała redaktaru jaje navinavych prajektaŭ Siarhieju Citovu, kab daŭ spravazdaču pra aśviatleńnie ataki dronaŭ na Maskvu. Toj piša: «Prapanuju vam zručnuju ščylinu, jak było šmat razoŭ — skažycie, što ŭ vas niekiravalny durań siadzić, i zvolnicie mianie, heta zdymie ich niehatyŭ».

«Siarož, b**ć, a možna nie stvarać niehatyŭ? Ja nie źbirajusia stanavicca inaahientam praź ciabie i pastajannyja vyja*ony», — adkazvaje Sabčak.

Citoŭ piša: «U vas usia kraina ŭ ahni, ja nie mahu nie pisać praŭdu. I chłusić ja nie źbirajusia». «B**ć, dziela čaho? Čamu ty pastajanna padstaŭlaješ tych, chto prykryvaje tvaju dupu?» — aburałasia Sabčak. Paźniej jana adkazvaje, što chłusić i nie prosiać.

U pierapiskach z Tabakom abmiarkoŭvali taksama śvieckuju lvicu Viktoryju Boniu, jakaja zapisvała zvarot da Pucina, dzie kazała pra prablemy ŭ hramadstvie i strach pierad uładaj. Tabak kaža, što paŭviečara abmiarkoŭvaŭ heta z Kiryjenkam i što Bonia prosta chajpuje. Sabčak nie vieryć i kaža: «Vielmi hramatna ŭsio zroblena — nibyta bajary drennyja, a Pucin zaŭsiody dobry».

Asobnuju aŭdyjaspravazdaču Sabčak dasyłaje Niemieruku, kali ŭ Maskvie pačalisia prablemy ź bienzinam. Jana kaža: «U nas jość damoŭlenaści, my ich usie vykonvajem, ale z taho boku nam dyktujuć kožnuju reč… Tak, u nas papiery padpisanyja, my sa svajho boku ŭsio robim, a ŭ adkaz niama ekskluzivu, abiacanych historyj», — i prosić u Niemieruka sustrečy.

Na pačatku vajny Sabčak pierapisvałasia z Andrejem Jermakom (tady kiraŭnikom ofisa Zialenskaha), pryvodzić detali «Mieduza». Toj nazyvaŭ žurnalistku razumnaj i kazaŭ, što ŭ ich šmat ahulnych znajomych. Sabčak apisvaje, jak jaje redakcyja pierajazdžaje paśla pačatku vajny.

«Nu pakul ja źjechała z krainy ź dziciom. Ale tam mama i muž. Redakcyja pierajazdžaje i budzie pracavać tut. Na žal, rachunkaŭ i hramadzianstva tut nijakich niama, tak što vyrašajem. Najbližejšymi dniami skončym pierajezd redakcyi, budziem štości vyrašać. Pakul pišam pravieranuju infarmacyju i starajemsia sumlenna vykonvać naš prafiesijny abaviazak. Ale stan najciažejšy, kali ščyra. I ŭmovy taksama.»

Sabčak, vynikaje ź inšych pierapisak, vyjazdžała ŭ Izrail. Raniej paviedamlałasia, što jana atrymała tam hramadzianstva.

• 2
• 1
• 15
• 6
• 1
• 0
• 1
• 0