200 čałaviek za dzień. Što viadoma pra straty Rasii va Ukrainie da kanca lipienia?
Ahułam realnaja kolkaść zahinułych rasijskich vajskoŭcaŭ za amal čatyry z pałovaj hady moža składać ad 450 204 da 547 571 vajskoŭca.
Bi-bi-si sumiesna z «Miedyjazonaj» i kamandaj vałancioraŭ vyśvietliła imiony 234 795 rasijskich vajskoŭcaŭ, jakija zahinuli z pačatku poŭnamaštabnaha ŭvarvańnia va Ukrainu. 56% usich zahinułych — heta ludzi, jakija mieli hramadzianskija prafiesii i padpisali kantrakt z rasijskaj armijaj užo paśla pačatku vajny.
Apošnija dva hady kolkaść paćvierdžanych zahinułych, jakich udałosia ŭstanavić, nie apuskajecca nižej za 200 čałaviek u sutki. Heta tolki tyja vypadki, śmierć jakich možna pravieryć na padstavie adkrytych krynic. Realnaja kolkaść strat, vierahodna, značna bolšaja.
Asnoŭnyja tendencyi
Analiz tysiač niekrałohaŭ dazvalaje prasačyć, jak źmianiaŭsia charaktar bajavych dziejańniaŭ. U pieršyja paŭtara hoda hrafik strat byŭ chvalepadobnym: paśla pikaŭ — naprykład, padčas šturmu Bachmuta i zachopu Aŭdziejeŭki, kali štodnia hinuła pa 100—150 čałaviek, — kolkaść zahinułych źnižałasia da 50—60 čałaviek u sutki.
Z kastryčnika 2023 hoda štodzionnyja straty zamacavalisia na stabilna vysokim uzroŭni — kala 120 čałaviek za dzień.
Ź lipienia 2024 hoda hety pakazčyk pavialičyŭsia da 200 sałdat i aficeraŭ štodnia i amal nie źmianšajecca da hetaha času. U asobnyja tydni 2025 hoda kolkaść zahinułych dasiahała 400—450 čałaviek u sutki. Heta moža być źviazana z dvuma faktarami: imknieńniem rasijskaj armii prasoŭvacca napierad navat koštam vialikich strat, a taksama masavym vykarystańniem abodvuma bakami bieśpiłotnikaŭ dla ŭdaraŭ pa žyvoj sile.
Źnižeńnie pakazčykaŭ na apošniaj častcy hrafikaŭ nie aznačaje realnaha pamianšeńnia strat. Jano tłumačycca zatrymkaj pamiž hibiellu vajskoŭca i publikacyjaj niekrałoha, a taksama časam, nieabchodnym dla pravierki novych paviedamleńniaŭ.
Chto niasie najbolšyja straty
Raźmierkavańnie strat pa rehijonach pakazvaje, što ciapier kantrakty čaściej za ŭsio zaklučajuć žychary nievialikich haradoŭ i viosak, dzie składaniej znajści stabilnuju i dobra apłatnuju pracu, a ahitacyja miascovych uładaŭ bolš aktyŭnaja.
Najbolšyja straty ŭ raźliku na kolkaść nasielnictva prypadajuć na rehijony Zachodniaj Sibiry. Śpis uznačalvaje Tyva, za joj iduć Buracija i Respublika Ałtaj. Najmienšyja adnosnyja straty — u Maskvie i Sankt-Pieciarburhu, dzie jany ŭ 25—30 razoŭ nižejšyja.
Pa ahulnaj kolkaści zahinułych lidzirujuć Baškartastan i Tatarstan, adnak heta častkova źviazana z tym, što ŭ hetych rehijonach vałanciory najbolš aktyŭna źbirajuć infarmacyju.
Dobraachvotniki, mabilizavanyja i źniavolenyja
Samaj šmatlikaj katehoryjaj zahinułych zastajucca dobraachvotniki — ludzi, jakija da vajny žyli i pracavali na hramadziancy, a kantrakt ź Ministerstvam abarony Rasii padpisali ŭžo paśla pačatku poŭnamaštabnaha ŭvarvańnia.
Da hetaj ža katehoryi adnosiać padazravanych i abvinavačanych u kryminalnych złačynstvach, jakija adpravilisia na front da zaviaršeńnia suda.
Źniavolenyja składajuć 11% paćvierdžanych strat, jašče 8% prypadaje na mabilizavanych.
Straty aficerskaha składu
Rasija praciahvaje hublać i padrychtavanych vajskoŭcaŭ. Z pačatku ŭvarvańnia viadoma pra hibiel 7524 aficeraŭ, pryčym 77% ź ich — kamandziry małodšaha źviana.
Vajennyja vučyliščy nie paśpiavajuć rychtavać patrebnuju kolkaść aficeraŭ, bo padrychtoŭka adnaho kamandzira zajmaje kala čatyroch hadoŭ. Tamu Ministerstva abarony ŭsio čaściej prysvojvaje aficerskija zvańni byłym radavym, jakija nabyli bajavy dośvied i prajšli karotkaterminovyja kursy.
Siarod paćvierdžanych zahinułych — 520 padpałkoŭnikaŭ, 169 pałkoŭnikaŭ i 15 hienierałaŭ.
Jakija realnyja maštaby strat?
Pavodle acenak vajennych ekśpiertaŭ, analiz moh achapić tolki 45—55% realnaj kolkaści zahinułych.
Nie pra ŭsie śmierci paviedamlajecca publična. Akramia taho, cieły mnohich vajskoŭcaŭ, jakija zahinuli ŭ apošnija miesiacy, dahetul zastajucca na poli boju, bo ich evakuacyja źviazanaja ź vialikaj ryzykaj praz pahrozu ŭdaraŭ bieśpiłotnikaŭ.
Zychodziačy z hetych acenak, realnaja kolkaść zahinułych rasijskich vajskoŭcaŭ moža składać ad 426 900 da 521 767 čałaviek.
Kali ž uličyć taksama ŭdzielnikaŭ uzbrojenych farmiravańniaŭ tak zvanych «DNR» i «ŁNR», a taksama straty paŭnočnakarejskich padraździaleńniaŭ, jakija ŭdzielničali ŭ bajavych dziejańniach na terytoryi Kurskaj vobłaści Rasii, to ahulnyja straty prarasijskich sił mohuć składać ad 450 204 da 547 571 vajskoŭca.
Kamientary