Biełarusy raskazali pra siamiejny biudžet i vydatki na ipateku ŭ Polščy

U Biełarusi Hanna šmat hadoŭ pracavała ŭ adździele kadraŭ. Pierajechaŭšy ŭ Polšču, jana amal adrazu zarehistravała IP i pačała dapamahać zamiežnikam z pracaŭładkavańniem. Taksama žančyna pastupiła va ŭniviersitet i atrymała dypłom bakałaŭra pa napramku «kiravańnie čałaviečym kapitałam».

Na pačatku hetaha hoda Hańnie prapanavali miesca ŭ adździele kadraŭ — i jana pahadziłasia, vyrašyŭšy sumiaščać pracu pa najmie z pryvatnaj dziejnaściu.

Za poŭnuju staŭku Hanna atrymlivaje 5 tys. złotych ($1317) na miesiac. Dachod ad pradprymalnickaj dziejnaści ciapier niepastajanny. U siarednim IP prynosić dadatkova 1,5—2 tys. złotych ($395—527) na miesiac.

Siamiejny biudžet u Hanny z mužam supolny. Mužčyna zarablaje na miesiac kala 6,5 tys. złotych ($1712).

Akramia taho, siamja štomiesiac atrymlivaje dapamohu na dačku sumaj 800 złotych ($211).

Takim čynam, sukupny dachod siamji składaje kala 14 tys. złotych ($3 687) na miesiac.

Vydatki

• Ipateka, kamunalnyja pasłuhi i ramont — 4 100 złotych ($1 080).
• Inšyja vydatki, źviazanyja z kuplaj kvatery, — kala 3,5 tys. złotych ($922).
• Charčavańnie i bytavaja chimija — kala 3 tys. złotych ($790).
• Transpart — 380 złotych ($100).
• Dohlad siabie i zdaroŭje — 1 010 złotych ($266).
• Adzieńnie i abutak — 200 złotych ($53).
• Škoła i zachapleńni dački — 760 złotych ($200).
• Zabavy — 1 tys. złotych ($263).
• Inšyja vydatki — 120 złotych ($32).

Kvatera

Siamja Hanny žyvie va ŭłasnaj kvatery, nabytaj zusim niadaŭna ŭ ipateku.

— Stareńkaje druhasnaje žyllo ŭ stareńkim domie. 50 kvadratnych mietraŭ, try pakoi, — apisvaje Hanna.

Štomiesiačny płaciež za ipateku składaje 2 tys. złotych ($527). Jašče 1 100 złotych ($290) idzie na apłatu kamunalnych pasłuh. Vysoki košt Hanna źviazvaje jakraz z tym, što kvatera znachodzicca ŭ starym domie.

Za internet siamja pakul nie płacić. Pry jaho padklučeńni pieršyja šeść miesiacaŭ jon biaspłatny. Paśla zakančeńnia hetaha času treba budzie płacić 70 złotych ($18).

Kožny miesiac Hanna z mužam imknucca vydzialać kala 1 tys. złotych ($263) na ramont.

— Pieraroblivajem patrochu pad siabie, — kaža biełaruska. — Adrazu jak zajechali — pamianiali padłohu ŭ vitalni, potym adšlifavali aŭtentyčnuju padłohu ŭ zali — zrabili jaje bolš sučasnaj. Farbavali ścieny.

Charčavańnie

Hanna nikoli nie viała strohi ŭlik vydatkaŭ na pradukty. Usie siamiejniki biaruć u kramach toje, što chočuć, ni ŭ čym sabie nie admaŭlajučy.

— Pajeści my lubim, — uśmichajecca žančyna.

Prykładna raz na tydzień siamja vybirajecca paabiedać pa-za domam.

— Možam vyjści na špacyr — i zavitać na abied u bar mlečny (farmat niedarahich kaviarniaŭ. — Zaŭv. MOST). Tam za traich vychodzić prykładna 80 złotych ($21), — raskazvaje Hanna. — A byvaje, chodzim u piceryju, restaran ci kaviarniu. Apošni raz płacili 125 złotych ($33).

Ahułam na pradukty, pachody ŭ kaviarniu i restarany, a taksama bytavuju chimiju, jakuju kuplajuć zaadno z praduktami, siamja tracić kala 3 tys. złotych ($790) na miesiac.

Transpart

U siamji jość aŭtamabil, jakim u asnoŭnym karystajecca muž Hanny: kožny dzień jon jeździć na im na pracu. Pa patrebie mašynu taksama vykarystoŭvajuć dla siamiejnych pajezdak.

Poŭny bak zapraŭlajuć raz na miesiac. Na paliva idzie kala 300 złotych ($79).

Hanna i dačka rehularna karystajucca hramadskim transpartam. Dla dziaŭčynki-školnicy prajezd biaspłatny.

— Ja žyvu niedaloka ad pracy. Na aŭtobusie dabirajusia ranicaj, a paśla pracy idu pieššu, kali dobraje nadvorje, — kaža jana. — Prajezd abychodzicca prykładna na 80 złotych ($21) za miesiac.

Dohlad za saboj i zdaroŭje

Štomiesiac Hanna z dačkoj robiać manikiur. Na dvaich jon kaštuje 150 złotych ($39).

Dadatkova siamja rehularna kuplaje kaśmietyku: śpiecyjalnyja dermatałahičnyja šampuni, a taksama kremy dla tvaru i toniki. Na hetyja srodki idzie kala 300 złotych ($79) na miesiac.

Raz na try miesiacy Hanna naviedvaje sałon pryhažości, dzie robić stryžku i farbavańnie vałasoŭ. Heta abychodzicca na 300 złotych ($79). Muž žančyny chodzić da cyrulnika štomiesiac i płacić za stryžku 60 złotych ($16).

Akramia taho, siamja apłačvaje pašyrany miedycynski pakiet koštam 250 złotych ($66) za miesiac, a taksama spartyŭny abaniemient — jašče 150 złotych ($39).

Vopratka i abutak

Vopratku i abutak siamja kuplaje pa miery patreby, ale jana ŭźnikaje amal kožny miesiac. U siarednim na heta idzie 200 złotych ($53).

— Prosta pieraborliva hladzim u šafu i praviarajem, što nam treba abnavić. U adnym miesiacy kuplajem adnamu, u nastupnym — inšamu, — kaža Hanna. — Usio vielmi dastupna. Niama takoha, jak u Biełarusi, što treba płanavać biudžet, kab štości sabie kupić.

Škoła i zachapleńni dački

Dačka Hanny zajmajecca tenisam dvojčy na tydzień. Zaniatki kaštujuć 280 złotych ($74) za miesiac. Jašče stolki ž baćki płaciać za kursy malavańnia.

Charčavańnie ŭ škole abychodzicca siamji na 100 złotych ($26). Dziaŭčynka taksama časam jeździć u pajezdki z kłasam.

— Byvaje 50 złotych ($13), a byvaje i 800 ($211) za miesiac, — aceńvaje Hanna hety artykuł vydatkaŭ. — Dumaju, kali brać u siarednim, to heta minimum 100 złotych ($26).

Zabavy

U ciopły čas hoda, kali dazvalaje nadvorje, siamja addaje pieravahu bavić volny čas na prahułkach abo katacca na viełasipiedach.

Časam jany vybirajucca ŭ kino. Taki pachod zvyčajna abychodzicca prykładna na 100 złotych ($26) — heta kvitki i papkorn.

Akramia taho, siamja imkniecca rehularna padarožničać: jeździć u susiednija harady i ŭ bolš praciahłyja pajezdki na vychodnyja. Sumy atrymlivajucca roznyja, ale heta zaŭsiody minimum 1 tys. złotych ($263): dzieści bolš davodzicca tracić na kvitki, a dzieści — na pražyvańnie.

— Voś niadaŭna jeździli na sustreču ź siabrami, spynialisia ŭ hateli. Za kvitki ŭ abodva baki zapłacili 400 złotych ($105), a za noč u hateli — 600 ($158), — uspaminaje biełaruska.

Inšyja vydatki

Dadatkovych vydatkaŭ, akramia mabilnaj suviazi, u siamji praktyčna niama. Za telefonnuju suviaź kožny siamiejnik płacić pa 35 złotych ($9) za miesiac. Akramia taho, Hanna asobna apłačvaje pracoŭny numar — heta jašče 15 złotych ($4) štomiesiac.

Hanna kaža, što ŭsio, što ŭdavałasia adkładvać u apošnija miesiacy, całkam išło na patreby, źviazanyja z kuplaj kvatery.

• 2
• 0
• 0
• 0
• 0
• 1
• 0
• 0