Mužu viadomaj biełaruskaj advakatki dali ŭ Rasii 9 hadoŭ kałonii za chabary. A ich sumiesnuju kvateru ŭ Vybarhu ciškom pradali

Hanna Kieler — viadomaja minskaja advakatka. Jana pracuje z 2000 hoda i pieradusim śpiecyjalizavałasia na siamiejnych spravach, zajmałasia razvodami. U 2016 hodzie Kieler bałatavałasia ŭ deputaty Pałaty pradstaŭnikoŭ ad partyi Hajdukieviča, ale ŭrešcie źniałasia z vybaraŭ. Kandydatkaj tady zapisali i jaje dačku Milenu, jakoj tady było 22 hady.

Pavialičyć

Jak akazałasia, u žyćci samoj Hanny Kieler razyhrałasia siamiejnaja drama. U červieni 2020 hoda biełaruskaja advakatka vyjšła zamuž za rasijskaha mytnika Uładzimira Hramyku. Toj zajmaŭ chlebnuju pasadu načalnika adździeła Vybarhskaj mytni Rasii — na miažy ź Finlandyjaj.

Šlub aformili ŭ Biełarusi. Praź niekalki miesiacaŭ para nabyła adnapakajovuju kvateru ŭ Vybarhu płoščaj 42,3 kv. m. Žyli jany ŭ roznych haradach: Kieler pracavała ŭ Biełarusi i pieryjadyčna naviedvała muža, jany razam płanavali ramont i budučy pierajezd u hetuju kvateru.

Prykładna z 2021 hoda ŭ Hramyki skłalisia blizkija adnosiny ź niejkaj Śviatłanaj Filenka (Siańko). U 2023 hodzie ŭ mytnika ŭźnikli prablemy pa słužbie, jon pačaŭ vypivać, a Filenka z červienia pa śniežań 2023‑ha časta byvała ŭ jaho kvatery, dzie jany abmiarkoŭvali situacyju na pracy. Urešcie Hramyka vyjechaŭ žyć pa roznych adrasach u znajomych, a klučy ad vybarhskaj kvatery pakinuŭ Śviatłanie — «pryhladać» za žyllom.

25 śniežnia 2023 hoda jon zvolniŭsia z mytni na piensiju, a na nastupny dzień aformiŭ na Filenka hienieralnuju davieranaść — farmalna, kab jana zajmałasia jaho piensijnymi spravami, pakul jon sam nie źbiraŭsia być u Vybarhu.

10 studzienia 2024 hoda Filenka, dziejničajučy pa hetaj davieranaści ad imia Hramyki, «pradała» jaho sumiesnuju z Kieler kvateru svajoj maci — piensijaniercy Maryi Siańko. U dahavory była farmuloŭka, što na momant prodažu Hramyka ŭ šlubie nie byŭ — što nie adpaviadała rečaisnaści.

18 sakavika 2024 hoda Hramyku zatrymali siłaviki — u ramkach kryminalnaj spravy za atrymańnie chabaraŭ, — i jamu abrali mieru strymańnia ŭ vyhladzie chatniaha aryštu. Mienavita ŭ hety pieryjad, pakul jon znachodziŭsia pad śledstvam i aryštam, i vyjaviłasia, što kvatera ŭciakaje z ruk siamji. Nieŭzabavie pra heta daviedałasia i Hanna Kieler — z telefonnaj razmovy z mužam.

Hramyka i Kieler padali ŭ sud, nastojvajučy, što nijakaj zhody na prodaž nie davali, a Filenka skarystałasia davieranaściu ŭ svaich intaresach.

Ale Filenka i jaje maci vystavili sustrečny pazoŭ z zusim inšaj viersijaj: maŭlaŭ, uvosień 2023‑ha Hramyka, pabojvajučysia kryminalnaj adkaznaści, sam paprasiŭ Filenka aformić dźvie fiktyŭnyja ździełki — pa hetaj kvatery (na maci Filenka) i pa jašče adnoj, trochpakajovaj kvatery (na svaju siastru Łarysu), kab farmalna vyvieści majomaść z-pad mahčymaha aryštu ŭ kryminalnaj spravie. Pavodle ich słoŭ, siastra Hramyki była ŭ kursie i navat dziakavała Filenka za «dapamohu».

Sud vyvučyŭ abiedźvie viersii i pryjšoŭ da pramiežkavaj vysnovy. Ździełku pa sprečnaj kvatery (maci Filenka) sud pryznaŭ fiktyŭnaj. Hetuju ździełku pryznali niesapraŭdnaj, a prava ŭłasnaści adnavili za Uładzimiram Hramykam.

A voś pa druhoj kvatery — toj, što pierajšła siastry Hramyki, Łarysie, — dokazaŭ fiktyŭnaści nie znajšli. Kvatera zastałasia va ŭłasnaści Łarysy Hramyka.

Što da samoha byłoha mytnika, to jamu prysudzili 9 hadoŭ kałonii strohaha režymu. Sud vyrašyŭ, što Uładzimir Hramyka braŭ chabary ad kiroŭcaŭ za toje, kab nie dahladać ich aŭtamabili. Ci zastaŭsia jon u šlubie z Hannaj Kieler, nieviadoma.

• 0
• 1
• 6
• 3
• 0
• 0
• 0
• 0