Zialenski dabivajecca, kab Mask dazvoliŭ Ukrainie vykarystoŭvać Starlink dla naviadzieńnia dronaŭ na terytoryi Rasii

Zialenski chacieŭ, kab amierykanski pradprymalnik Iłan Mask dazvoliŭ vykarystoŭvać Starlink dla naviadzieńnia ŭkrainskich bieśpiłotnikaŭ pry ŭdarach pa celach na terytoryi Rasii. Ciapier vykarystańnie Starlink Ukrainaj abmiežavanaje, a kampanija SpaceX nie dazvalaje pracavać sistemie na rasijskaj terytoryi.

Dla dalokich udaraŭ pa Rasii Ukraina vykarystoŭvaje inšyja sposaby naviadzieńnia bieśpiłotnikaŭ, u tym liku bartavyja kampjutary z navihacyjnymi sistemami na asnovie štučnaha intelektu. Jany dazvalajuć atakavać bujnyja abjekty, naprykład naftapierapracoŭčyja zavody i składy. Adnak dla nievialikich i ruchomych celaŭ taki sposab mienš nadziejny.

Pavodle infarmacyi The Atlantic, Zialenski tłumačyŭ Trampu, što Ukrainie nieabchodnyja bolš dakładnyja srodki dla baraćby z mabilnymi rasijskimi rakietnymi ŭstanoŭkami, u tym liku z puskavymi ŭstanoŭkami balistyčnych rakiet, jakimi Rasija abstrelvaje Ukrainu.

Padčas pajezdki ŭ ZŠA Zialenski taksama chacieŭ asabista sustrecca z Maskam i abmierkavać ź im hety płan. Adnak, pavodle adnoj z krynic vydańnia, Mask admoviŭsia ad sustrečy.

Ukrainski prezident ličyć, što pašyreńnie vykarystańnia Starlink mahło b častkova stać alternatyvaj pastaŭkam dadatkovych rakiet-pierachopnikaŭ dla amierykanskich sistem supraćpavietranaj abarony Patriot.

Tramp paabiacaŭ razhledzieć prośbu Zialenskaha i zajaviŭ, što pahavoryć z Maskam. Adnak amierykanski prezident pakul nie paviedamiŭ, ci padtrymaje hetuju inicyjatyvu i kali moža adbycca heta razmova.

Pavodle krynicy The Atlantic, rašeńnie Trampa moža zaležać ad taho, ci dapamoža pašyreńnie vykarystańnia Starlink chutčej spynić vajnu. Kali amierykanski prezident paličyć, što heta moža prymusić Uładzimira Pucina pajści na pieramovy, jon moža padtrymać prapanovu. Kali ž takoj pierśpiektyvy jon nie ŭbačyć, to, vierahodna, admović.

28 lipienia Zialenski naviedaŭ Vašynhton i sustreŭsia z Trampam u Biełym domie. Razmova prachodziła za začynienymi dźviaryma i praciahvałasia krychu bolš za hadzinu. Paśla sustrečy Zialenski paviedamiŭ, što baki abmierkavali, u pryvatnaści, licenzii na vytvorčaść rakiet-pierachopnikaŭ dla Patriot, a taksama inšyja prapanovy i mahčymaści aktyvizacyi dypłamatyčnych namahańniaŭ dla zaviaršeńnia vajny.

Tramp paśla sustrečy taksama zajaviŭ, što razmova z ukrainskim prezidentam prajšła dobra, ale nie raskryŭ padrabiaznaściaŭ abmierkavańnia.

• 3
• 0
• 0
• 0
• 0
• 0
• 0
• 0