Cichanoŭskaja: Ja zvaniła Siarhieju ŭ ZŠA kožny viečar, praviarała chatnija zadańni dziaciej. Ale ž jon małajčynka, spraviŭsia
Śviatłana Cichanoŭskaja ŭ efiry «Biełsata» raskazała pra dziaciej, jak lačyła Karnieja, i jakaja Ahnija vielmi kamunikacyjnaja i paŭsiul adaptujecca.
Hałoŭnaj asabistaj pieramohaj da prychodu ŭ palityku Śviatłana Cichanoŭskaja ličyć dziesiać hadoŭ, układzienych u reabilitacyju syna: Karniej, jaki naradziŭsia biez słychu i pačuŭ pieršyja huki tolki ŭ dva z pałovaj hady, zmoh pajści ŭ zvyčajnuju škołu, a ciapier «biez prypynku havoryć».
U «Ranicy z «Biełsatam» lidarka demsiłaŭ ščyra adkazała na asabistyja pytańni: pra ŭltymatum u CVK «albo vyjazdžaješ, albo ŭ turmu», pra toje, jak Siarhiej paśla vyzvaleńnia davaŭ rady ź dziećmi, i čym jana achviaruje dziela palityki.
Prapahanda maluje Śviatłanu Cichanoŭskuju «zvyčajnaj chatniaj haspadyniaj», jakaja vypadkova apynułasia ŭ palitycy. Vypadkova — tak, pahadžajecca jana, ale asabistyja pieramohi da 2020 hoda byli: kala dziesiaci hadoŭ jana ŭkłała ŭ reabilitacyju syna Karnieja, jaki naradziŭsia biez słychu.
«Jość užo takija sistemy kachlearnaj impłantacyi — taki štučny słych.
I zrabili majmu synu takuju apieracyju dosyć pozna, u dva z pałovaj hady. Zvyčajna takuju apieracyju robiać u pieršyja try-čatyry miesiacy žyćcia niemaŭlatki, i tady reabilitacyja idzie jak u zvyčajnaha čałavieka. A kali moj syn pačuŭ pieršyja huki tolki ŭ dva z pałovaj hady — my zhubili vielmi šmat času. Kožny dzień my chadzili da śpiecyjalistaŭ, kožny dzień zajmalisia doma. Śviet hukaŭ adkryvali», — raskazvaje Cichanoŭskaja.
Adnaho momantu pieramohi, kaža jana, nie było: pieramohaj byli pieršyja huki, pieršaje słova, pieršy skaz. A vynik — syn zmoh pajści ŭ zvyčajnuju škołu, nie ŭ śpiecyjalnuju. Ciapier Karnieju 16, i jon «biez prypynku havoryć».
«I heta dla mianie takoje ščaście! Ja pamiataju, jak my hetaha dabivalisia. Jość ciažkaści, ale ž my spravimsia z usim», — kaža Cichanoŭskaja.
Na pačatku 2020‑ha Śviatłana vyrašyła, što zrabiła ŭsio, što mahła: «Nu ŭsio, ja budu zajmacca saboj». Pajšła nastaŭnicaj u anłajn-škołu, ale, jak jana kaža, tut «zdaryŭsia dvaccaty hod».
Śviatłana taksama adznačaje, što ŭsie tyja hady, kali jana zajmałasia dziećmi, siamju materyjalna zabiaśpiečvaŭ Siarhiej, bo pracavać jana nie mahła. «Vialikaja ŭdziačnaść u mianie da Siarhieja», — kaža Cichanoŭskaja.
Pra dačku: «Duša tak nie balić»
Małodšaja, Ahnija, rasła zusim inačaj — «vielmi kamunikacyjnaja», paŭsiul adaptujecca.
«Zaraz my šukajem škołu dla dzietak: Karnieju ŭsio roŭna jość patreba asablivaja, a ŭžo Ahnija kudy pojdzie, tudy pojdzie. Jana paŭsiul adaptujecca. Tak, moža, nielha kazać, ale za jaje voś duša tak nie balić, bo, viedajecie, kali pytajuć maci, jakoha dzicionka ty bolš za ŭsio lubiš, to adkaz — taho, jakomu zaraz najhorš», — tłumačyć Śviatłana.
Pra miedycynu ŭ Biełarusi: «siem kołaŭ piekła» kamisij
Nasamreč na biełaruskuju miedycynu ŭ svaim vypadku Cichanoŭskaja šmat skardzicca nie moža: kachlearny impłant byŭ zakupleny za košt dziaržavy (praŭda, adzin — u Polščy i Litvie robiać adrazu na dva vuchi), reabilitacyja taksama była zabiaśpiečanaja. Ale sistema atrymańnia invalidnaści — zusim inšaja sprava.
«U Litvie ŭ mianie adzin pachod da doktara i ŭ sacbiaśpieku — usio. A ja pamiataju ŭ Biełarusi hetyja kamisii biaskoncyja: byccam słych moža viarnucca, ty pavinien hetyja kamisii znoŭ prachodzić. Heta vielmi prynižaje», — kaža Cichanoŭskaja i spadziajecca, što reformy, jakija zaraz pišucca, vypraviać hetuju situacyju.
Samaje ciažkaje rašeńnie: źjechać ci zastacca
U razmovie Śviatłana ŭzhadała, jak u žniŭni 2020-ha, paśla sustrečy ŭ Centrvybarkamie, jaje pastavili pierad vybaram. «Ty z hetaha kabinieta albo vyjazdžaješ, albo ŭ turmu», — skazali joj. I dadali pra dziaciej, jakija ŭžo na toj momant znachodzilisia za miažoj: «My viedajem, dzie vašyja dzieci, nie dumajcie…»
«Ja dumaju, što heta było samym ciažkim rašeńniem za ŭsiu pieradvybarnuju kampaniju — źjechać ci zastacca. Heta była ciažkaja ŭnutranaja baraćba», — pryznajecca Śviatłana.
Čamu źjechała? Kali b Siarhiej nie byŭ u turmie i za dziećmi było kamu hladzieć — mahčyma, rašeńnie było b inšym.
«Heta była ŭnutranaja baraćba pamiž mamaj i aktyvistkaj na toj čas. I, moža, mužčyna na maim miescy vybraŭ by aktyvizm, ale ž majo serca naležała dzieciam, i ja razumieła, što pavinna była ich dahladać», — kaža Cichanoŭskaja.
Pry hetym jana padkreślivaje: u toj čas kožny prymaŭ ciažkija rašeńni — i Maryja Kaleśnikava, jakaja ŭklučyłasia ŭ kampaniju zamiest Viktara Babaryki, i supracoŭniki dziaržaŭnaha telebačańnia, jakija skazali «nie». «Ja bačyła, što vakoł mianie ludzi taksama prymajuć ciažkija rašeńni. Heta było maralna lahčej zrabić, bo ty viedaješ, što ty nie adzin», — uzhadvaje Śviatłana.
Jak Siarhiej davaŭ rady ź dziećmi
Paśla vyzvaleńnia Siarhiej Cichanoŭski zabraŭ dziaciej z saboj u Amieryku. Ci spraviŭsia baćka, jaki da turmy «nie šmat zajmaŭsia dziećmi, bolš pracavaŭ»?
«Nie, nu słuchajcie, ja zvaniła kožny viečar, kaniečnie, praviarała chatnija zadańni. Ale ž jon małajčynka. Jon spraviŭsia. Piacihadovy pierapynak — i vielmi dobra jon vytrymaŭ heta ŭsio. I tolki skardziŭsia, što treba hatavać pastajanna, niešta prybirać, a jany niepasłuchmianyja», — śmiajecca Śviatłana.
«Ja ž prybirajusia sama, nie chvalujciesia»
Nasupierak čutkam pra toje, što Cichanoŭskuju absłuhoŭvaje šmat słuhaŭ, pobyt lidarki demsiłaŭ vyhladaje całkam zvyčajna: jość niania, jakaja zajmajecca dziećmi, kali maci ŭ raźjezdach: «advieźci-pryvieźci i ŭroki pavučyć». Astatniaje — sama.
«Ja ž prybirajusia sama, nie chvalujciesia. Chadžu ŭ kramy i hatuju», — kaža Cichanoŭskaja.
Jak jana ŭsio paśpiavaje pamiž mižnarodnymi sustrečami? «Jak lubaja inšaja žančyna. My — žančyny, i hetym usio skazana», — adznačaje Śviatłana i dadaje biez dramatyzacyi: praz tyja ž vyprabavańni prajšli tysiačy vymušanych źjechać biełarusaŭ.
«Ludzi dumajuć pra siabie, što jany našmat słabiejšyja, čym jany na samoj spravie źjaŭlajucca. I kali žyćcio stavić ciabie voś u hetyja abstaviny, ty prosta vykaraskvaješsia», — ličyć Śviatłana.
«Ja achviaravała svajoj rollu maci»
Ci davodziłasia prymać rašeńni na karyść Biełarusi, a nie dziaciej? Tak jana žyvie z 2020 hoda, pryznajecca Cichanoŭskaja.
«Ja navat zabyvajusia, u jakim kłasie maje dzieci. Ja takaja maci: pryjazdžaju na vychadnych, kab pravieści čas ź imi — jak byccam ja dahaniaju toje, što nie zmahła za tydzień zrabić ź imi. I tak, ja dumaju, što ja zaraz achviaravała svajoj rollu maci na karyść roli palityka», — kaža jana.
Śviatłana šmat razmaŭlała ź dziećmi pra heta: čamu tata za kratami, čamu daviałosia źjechać. «Taki vam vypaŭ los, i ja spadziajusia, što vy bačycie tyja achviary», — kaža maci dzieciam, jakija sumujuć pa rodnych, letnikach i svaich kvaterach. A dumka pra viartańnie na Radzimu «prysutničaje ŭ žyćci našaj siamji» pastajanna, adznačaje biełaruskaja demakratyčnaja lidarka.
Pra pahrozy dzieciam: «Heta było ŭpieršyniu ŭ takim farmacie»
Niadaŭna ŚMI ablacieła historyja pra nibyta padrychtoŭku napadu na Cichanoŭskuju i jaje dziaciej u Varšavie. Zvanki i dziŭnyja paviedamleńni ŭ Telegram byli i raniej, kaža palityk, ale pahrozy mienavita dzieciam — upieršyniu.
«Ja viedaju, što hetym kiejsam zajmajucca prafiesijanały. Ale ž ty razumieješ, što ja siabie nie staŭlu ŭ niejkaje asobnaje stanovišča. Ja takaja ž biełaruska, jak i šmatlikija biełarusy, jakim taksama pahražajuć. Tamu ja spakojna da hetaha staŭlusia», — kaža Cichanoŭskaja.
I dadaje: toje, što takija kiejsy vykryvajucca, — dobra, bo dazvalaje zrazumieć, da čaho rychtavacca
«Dbajcie, kaniečnie, pra biaśpieku. Bo toje, što my, biełarusy, abjadnanyja, toje, što my vystajali, toje, što my ŭzmacnilisia, toje, što my praciahvajem našu pracu — heta, kaniečnie, vielmi pieraškadžaje niejkim płanam režymu», — zaklikaje lidarka demsiłaŭ.
Kamientary
Ihrała rol, a zritielem był ja.
V dušie jejo tainstviennoj miriliś łoż i istina
Aktrisy nieprostoho riemiesła.
Jemu jedinstvienno vierna chotieła byť ona. (s)
Čytajcie na NN!