Novy kiraŭnik brytanskaj dypłamatyčnaj misii ŭžo viedaje dva biełaruskija słovy

U svaim zvarocie dypłamat padziakavaŭ žycharam krainy za ciopły pryjom, dobryja pažadańni i parady pra toje, što varta pahladzieć i pasprabavać u Biełarusi. Pavodle jaho słoŭ, jon atrymaŭ značna bolš vodhukaŭ, čym čakaŭ, i ličyć heta śviedčańniem haścinnaści biełarusaŭ.

Łonhchiorst taksama pasprabavaŭ źviarnucca da hledačoŭ pa-biełarusku. Jon z uśmieškaj pryznaŭsia, što pakul viedaje tolki dva słovy — «pryvitańnie» i «dziakuj».

Dypłamat pažartavaŭ, što dziakujučy atrymanym paradam u jaho ŭžo naźbirałasia cełaja prahrama na try hady znachodžańnia ŭ Biełarusi.

Uiljam Džesi Łonhchiorst — dypłamat z bolš čym tryccacihadovym stažam pracy.

Jon pačaŭ dypłamatyčnuju karjeru ŭ 1990 hodzie, dałučyŭšysia da brytanskaha Ministerstva zamiežnych spraŭ i spraŭ Sadružnaści. Spačatku pracavaŭ pamočnikam supracoŭnika adździeła ekanamičnych adnosin.

U 1992—1995 hadach słužyŭ u pasolstvie Vialikabrytanii ŭ Sieule: byŭ trecim sakratarom pa ekanamičnych pytańniach, a paśla — druhim sakratarom pa palityčnych pytańniach i infarmacyi. U 1995—1998 hadach pracavaŭ pieršym sakratarom pa kamiercyjnych pytańniach u brytanskim pasolstvie ŭ Tokia.

U 1998—2001 hadach uznačalvaŭ adździeł ekspartu ŭ Japoniju ŭ Ministerstvie handlu i pramysłovaści Vialikabrytanii. Z 2001 pa 2006 hod zajmaŭ pasadu pieršaha sakratara ŭ Pastajannym pradstaŭnictvie Vialikabrytanii pry AAN u Ńju-Jorku, dzie adkazvaŭ za finansavyja pytańni i reformu kiravańnia.

U 2006—2007 hadach prachodziŭ poŭny kurs vyvučeńnia sierbskaj movy, paśla čaho ŭ 2007—2011 hadach byŭ namieśnikam kiraŭnika dypłamatyčnaj misii i hienieralnym konsułam Vialikabrytanii ŭ Białhradzie.

U 2011—2013 hadach zajmaŭ pasadu namieśnika kiraŭnika departamienta ASIEAN u Ministerstvie zamiežnych spraŭ. U 2014—2018 hadach byŭ Nadzvyčajnym i Paŭnamocnym Pasłom Vialikabrytanii ŭ Karaleŭstvie Kambodža.

U 2018 hodzie ŭznačalvaŭ kirunak Global Britain Task Force (Pracoŭnaja hrupa «Hłabalnaja Brytanija») u brytanskim MZS. U 2019 hodzie prachodziŭ intensiŭnuju moŭnuju padrychtoŭku pa niamieckaj movie, paśla čaho ŭ 2019—2024 hadach zajmaŭ pasadu namieśnika kiraŭnika misii i hienieralnaha konsuła Vialikabrytanii ŭ Šviejcaryi i Lichtenštejnie.

U 2024—2026 hadach prachodziŭ poŭnuju moŭnuju padrychtoŭku pa ruskaj movie ŭ Ministerstvie zamiežnych spraŭ, pa spravach Sadružnaści i raźvićcia Vialikabrytanii.

• 5
• 0
• 0
• 0
• 0
• 0
• 0
• 0