U chostele na 50 čałaviek zabraniravali 440 miescaŭ. U Polščy sudziać vizavych pasiarednikaŭ, jakich kaardynavaŭ biełarus

Na hety raz z pakazańniaŭ stała viadoma, jak dla ich reziervavałasia fiktyŭnaje žyllo. Kaardynavaŭ hrupu hrodzieniec Aleh M., piša Most.

Prakuratura vystaviła abvinavačańni ŭ sadziejničańni niezakonnamu pierasiačeńniu polskaj miažy 98 hramadzianam Polščy, Biełarusi, Ukrainy i Kazachstana. Bolšaść ź ich jašče da pačatku sudovaha pracesu pahadziłasia dobraachvotna adbyvać pakarańnie. U Polščy heta mahčyma ŭ vypadkach, kali vina i abstaviny ździajśnieńnia złačynstva nie vyklikajuć sumnieńniaŭ. Časta takaja zhoda pryvodzić da bolš miakkaha pakarańnia. Na łavie padsudnych u asnoŭnym pracesie apynulisia 11 čałaviek.

Na pasiadžeńni 26 žniŭnia daŭ pakazańni Vilus B. ź Litvy, jaki kiruje ŭ Varšavie tryma chostełami. Imi karystalisia zamiežniki, jakija pryjechali ŭ Polšču na zarobki. Płata składała ad 800 da 950 złotych u miesiac (185—220 jeŭra). Litoviec nie pryznaŭ siabie vinavatym i zapeŭniŭ, što vioŭ dziejnaść u adpaviednaści z zakonam.

Ź jaho pakazańniaŭ vynikaje, što jaho padstaviŭ dziełavy partnior — Siarhiej z Ukrainy, jakomu jon pieradaŭ piačatku firmy. Toj staviŭ piačatki na paćvierdžańniach braniravańnia miescaŭ u chostełach — hety dakumient byŭ nieabchodny kampanijam, jakija najmali zamiežnikaŭ. U vyniku atrymałasia tak, što ŭ chostełach litoŭca było kala 50 svabodnych miescaŭ, a ŭkrainiec vydaŭ 440 paćvierdžańniaŭ braniravańnia. Praŭda, nichto pa ich tak i nie pryjechaŭ.

Čatyry vidy viz

Rasśledavańnie pačałosia z paviedamleńnia konsuła Polščy ŭ Hrodnie. Jon źviarnuŭ uvahu na iłžyvyja dekłaracyi ab pracaŭładkavańni, jakija vykarystoŭvalisia dla atrymańnia pracoŭnych viz.

U chodzie śledstva vyśvietliłasia, što hrupa dapamahała atrymać čatyry vidy viz. Pracoŭnyja byli tolki adnym ź ich — kab ich aformić, «lehalizatary» dasyłali dakumienty ab daručeńni pracy, vydadzienyja ad imia nieisnujučych kampanij.

Druhi vid — haściavyja vizy. Pavodle praviłaŭ, zaprašalny bok pavinien viedać zaprošanaha zamiežnika, abaviazany zabiaśpiečyć jaho žyllom i mieć srodki, kab harantavać hościu hodnyja ŭmovy pražyvańnia. Ale ludzi, jakija nibyta sami zaprašali zamiežnikaŭ, ich nie viedali i nie mahli b utrymlivać.

Treciaj formaj lehalizacyi ŭjezdu zamiežnikaŭ u Polšču byli kulturnyja abo adukacyjnyja vizy. Pad heta na papiery stvaralisia škoły, jakija nasamreč nie akazvali adukacyjnych pasłuh, i muziei.

Polskaja viza, aformlenaja z dapamohaj pasiarednikaŭ, kaštavała kala 1 tys. złotych. Apłata adbyvałasia ŭ dołarach. Arhanizatary schiemy atrymlivali z adnoj vizy kala 700 złotych prybytku (160 jeŭra).

• 0
• 0
• 0
• 1
• 0
• 0
• 0
• 0