Červień i lipień u Zachodniaj Jeŭropie stali samymi haračymi za ŭsiu historyju nazirańniaŭ
Pieršyja dva miesiacy leta 2026 hoda ŭ Zachodniaj Jeŭropie stali samymi haračymi za ŭvieś pieryjad nazirańniaŭ. Daśledčyki zafiksavali rekordna vysokuju siaredniuju tempieraturu pavietra — 21,6°C, što prykładna na 2,8°C vyšej za siaredni pakazčyk, paviedamlaje CNN.
Papiaredni rekord byŭ ustanoŭleny ŭ 2022 hodzie. Pry hetym lipień 2026 hoda staŭ taksama samym haračym lipieniem za ŭsiu historyju nazirańniaŭ za tempieraturaj pavierchni Suśvietnaha akijana za miežami palarnych rehijonaŭ. Siaredniaja tempieratura vady skłała 20,96°C. Heta vyšej za papiaredni lipieński rekord 2023 hoda, kali siaredniaja tempieratura dasiahnuła 20,89°C.
Asabliva vysokaja tempieratura vady nazirałasia ŭ Atłantyčnym akijanie i zachodniaj častcy Mižziemnaha mora. Na ŭmovy nadvorja častkova paŭpłyvaŭ tak zvany «supier-El-Nińjo» — klimatyčny fienomien, jaki farmirujecca ŭ Cichim akijanie.
Adnačasova ŭ Francyi, Ispanii, a taksama ŭ niekatorych rehijonach Hiermanii i Vialikabrytanii navukoŭcy zafiksavali nadzvyčajny deficyt apadkaŭ i vilhaci ŭ hlebie. U lipieni 2026 hoda vilhotnaść vierchniaha słoja hleby ŭ Zachodniaj Jeŭropie była značna nižejšaj, čym u lipieni 2022 hoda, kali rehijon taksama pieražyvaŭ mocnuju zasuchu.
Ekstremalnaja śpiakota i zasucha spryjali ŭźniknieńniu maštabnych lasnych pažaraŭ. Pavodle acenak jeŭrapiejskich śpiecyjalistaŭ, ahniom było źniščana bolš za 1,23 miljona akraŭ, abo kala 498 tysiač hiektaraŭ, terytoryi. Najbolš paciarpieli Ispanija, Francyja i Italija.
Pažary pryviali i da rostu vykidaŭ u atmaśfieru, a taksama pahoršyli jakaść pavietra ŭ roznych rehijonach Jeŭropy. Čym maštabniejšy pažar, tym bolš dymu ŭtvarajecca i tym vyšej jon padymajecca ŭ atmaśfieru. U vyniku zabrudžvańnie moža raspaŭsiudžvacca na značnyja adlehłaści i ŭpłyvać na jakaść pavietra nie tolki niepasredna kala miesca pažaru.
Navukoŭcy adznačajuć, što vysokaja tempieratura i praciahłaja zasucha ŭ červieni i lipieni ŭzajemna ŭzmacniali adna adnu. Pa miery vysychańnia hleba tracić zdolnaść zabiaśpiečvać naturalnaje astudžeńnie pavierchni, tamu ciapło nazapašvajecca jašče chutčej. Tak farmirujecca svojeasablivaje zamknionaje koła, jakoje ŭzmacniaje ekstremalnuju śpiakotu.
Raniej taksama paviedamlałasia, što ŭ race Rejn byŭ zafiksavany najnižejšy za ŭsiu historyju nazirańniaŭ uzrovień vady. Na asobnych učastkach sudnachodnaja hłybinia źniziłasia da ŭsiaho 25 santymietraŭ.
Kamientary