U Małarycie amal całkam vysachła miascovaje voziera. Što ź im stałasia?
U Małarycie amal całkam vysachła Vajskovaje voziera. Na miescy vadajoma zastalisia tolki nievialikija łužyny, hlej i aholenaje dno. Videa z vozieram miascovy žychar apublikavaŭ u TikTok, vyklikaŭšy ŭ haradžan uspaminy pra toje, jakim jano było raniej, i dyskusiju pra pryčyny źniknieńnia vady, piša BG.Media.
U kamientaryjach ludzi paraŭnoŭvali fatahrafii voziera za leta 2025 i 2026 hadoŭ. Na zdymkach minułaha hoda jašče bačny paŭnavartasny vadajom, a na sioletnich vady ŭ im amal nie zastałosia.
Mnohija małarytčanie z nastalhijaj uspaminajuć, jak u dziacinstvie kupalisia ŭ hetym voziery, hulali na bierazie i nazirali za lebiedziami. Niekatoryja spadziajucca, što vadajom udasca adnavić i ŭparadkavać terytoryju vakoł jaho. Ludzi prapanujuć rasčyścić i pahłybić voziera, prybrać nazapašany hlej i zrabić pobač nievialiki skvier.
Adnak pryčyny źniknieńnia vady vyklikajuć sprečki. Adny žychary źviazvajuć heta z praciahłaj zasuchaj i źmienami klimatu. Jany adznačajuć, što ŭ Biełarusi druhi hod zapar miełkavodździe nazirajecca ŭ sažałkach, aziorach i kałodziežach. Inšyja miarkujuć, što na situacyju mahli paŭpłyvać mielijaracyja, haspadarčaja dziejnaść i źniknieńnie krynic, jakija raniej papaŭniali voziera.
Adna ź miascovych žycharak raskazała, što raniej u lesie bili krynicy, ź jakich vada traplała ŭ voziera. Pavodle jaje słoŭ, u kryničnych jamach vadzilisia bujnyja karasi, ale paźniej krynicy zasypali, i vadajom pierastaŭ papaŭniacca vadoj ź ich. Jana dapuskaje, što heta mahło stać adnoj z pryčyn abmialeńnia.
Niekatoryja kamientatary taksama źviazvajuć źniknieńnie vady z budaŭnictvam miascovaha zavoda, śćviardžajučy, što pra mahčymyja nastupstvy dla voziera havaryli jašče tady. Adnak hetyja mierkavańni pakul nie paćvierdžanyja śpiecyjalnymi daśledavańniami.
Małarytčanie zhadvajuć i inšyja vadajomy, jakija mialejuć abo pierasychajuć. U kamientaryjach havorycca pra voziera Vizžar kala Žabinki, abmialeńnie Ołtušskaha voziera, a taksama prablemy z vadajomami ŭ Kobrynie. Padobnyja źjavy, pavodle paviedamleńniaŭ karystalnikaŭ, nazirajucca i ŭ Vałynskaj vobłaści Ukrainy.
Jašče letam 2025 hoda Vajskovaje voziera ŭ Małarycie było paŭnavartasnym vadajomam. U lipieni rajonnaja hazieta «Hołas času» paviedamlała pra pravierku paśla źjaŭleńnia ŭ sacyjalnych sietkach infarmacyi pra masavuju hibiel ryby.
Načalnik Małaryckaj rajonnaj inśpiekcyi pryrodnych resursaŭ i achovy navakolnaha asiarodździa Anatol Nikiciuk tady raskazaŭ, što śpiecyjalisty abśledavali voziera. Masavych zachvorvańniaŭ ryby nie vyjavili. Bresckaja abłasnaja łabaratoryja analityčnaha kantrolu ŭziała proby vady, a hidrachimičny analiz nie pakazaŭ pieravyšeńniaŭ utrymańnia zabrudžvalnych rečyvaŭ i taksičnych złučeńniaŭ. Jakaść vady pryznali adpaviednaj normam, a pahrozy dla ekasistemy pavodle vynikaŭ pravierki nie ŭstanavili.
U kancy lutaha 2026 hoda supracoŭniki Małaryckaha rajonnaha adździeła ŭnutranych spraŭ razam z pradstaŭnikami miascovaj žyllova-kamunalnaj haspadarki prybirali terytoryju kala voziera. Raboty pravodzilisia ŭ miežach rehularnych mierapryjemstvaŭ pa ŭparadkavańni haradskoj infrastruktury i miescaŭ adpačynku.
Padobnaja situacyja nazirałasia hetym letam i ŭ Bresckim rajonie. U žniŭni 2026 hoda ŭ sacyjalnych sietkach źjaviłasia videa całkam vysachłaha voziera kala vioski Černi, za niekalki kiłamietraŭ ad Bresta. Zamiest vady tam zastałosia aholenaje dno, jakoje vysachła i pakryłasia raskolinami. Pavodle kamientaryjaŭ karystalnikaŭ, vadajom pačaŭ mialeć jašče raniej: adzin ź ich uspaminaŭ, što zimoj na hetym miescy ŭžo zastavałasia tolki zamierzłaja łužyna.
U Bresckim abłasnym kamitecie pryrodnych resursaŭ i achovy navakolnaha asiarodździa ŭ žniŭni patłumačyli ahulnuju tendencyju da abmialeńnia vadajomaŭ rehijona praciahłym niedachopam apadkaŭ. Pavodle śpiecyjalistaŭ, deficyt daždžoŭ nazirajecca treci hod zapar, a na praciahu 2026 hoda niedachop vilhaci adčuvaŭsia amal pastajanna. Źnižeńnie ŭzroŭniu vady fiksavali nie tolki ŭ aziorach, ale i ŭ rekach, u tym liku ŭ Prypiaci i Jasieldzie, a taksama ŭ kałodziežach.
Ekałahičnyja śpiecyjalisty papiaredžvajuć, što prostaja rasčystka abo pahłybleńnie vadajoma nie abaviazkova vyrašyć prablemu. Kali ŭzrovień hruntavych vod nizki, umiašańnie ŭ dno moža parušyć vodaniepranikalny płast i pryvieści da taho, što reštki vady buduć sychodzić jašče chutčej. Tamu pierad pačatkam rabot nieabchodna vyśvietlić pryčyny abmialeńnia kankretnaha voziera.
«Biełaruś pieradusim». Što viadoma pra 23‑hadovaha aficera śpiecnaza, jakoha asudzili na 19 hadoŭ za «zdradu dziaržavie»8
Kamientary