Minčanka Anhielina, jakaja vyprasiła ŭ Łukašenki kvateru za trajniat, upieršyniu pakazała toj padarunak
Siamja, jakaja za raz stała šmatdzietnaj, budzie žyć niedaloka ad BT. Za kvateru Anhielina Kaminskaja z mužam nie zapłacili ni kapiejki.
Anhielina Kaminskaja zaprasiła ANT u svajo novaje žyllo. Raniej nie ahučvałasia, u jakim kankretna rajonie padaryli kvateru śmiełaj maładoj maci. U intervju «Anłajnieru» žančyna kazała tolki, što nieruchomaść znachodzicca niepadalok ad centra, pobač vialiki pryhožy park dla prahułak.
Miarkujučy pa tym, što vidać z voknaŭ, havorka idzie pra ŽK «Park Čaluskincaŭ», jaki znachodzicca amal što praz darohu ad Biełteleradyjokampanii.
Treba adznačyć, što heta daloka nie samy biudžetny varyjant u stalicy. Pamier kvatery i pavierch nieviadomy, tamu pra canu možna kazać tolki pryblizna. Hod tamu trochpakajoŭki płoščaj 78 kvadrataŭ u hetym žyllovym kompleksie kaštavali kala $140 tysiač. Ale tam nie było navat ścien pamiž pakojami, ramont litaralna treba było rabić z nula.
Anhielina ž atrymała ŭžo praktyčna prydatnuju dla žylla kvateru. Tam užo jość łaminat i naciažnyja stoli, ścieny padrychtavanyja pad špalery. Navat kuchonny harnitur z chaładzilnikam, vyciažkaj i plitoj byŭ ustalavany.
Za kuchniu Anhielina asabliva dziakuje. Kaža, što vielmi lubić hatavać (akramia pracy miedsiastroj jana piakła torty na zamovu) i budzie vučyć hetamu dočak.
Zastałosia pafarbavać ścieny i zavieźci meblu.
Maci trajniatak pryznajecca: kvateru možna ličyć sapraŭdnym padarunkam. Bo, pa-pieršaje, atrymali jany nieruchomaść pa-za čarhoj dla šmatdzietnych. Pa-druhoje, zvyčajnym šmatdzietnym siemjam navat z ulikam ilhotnych umoŭ treba mieć prystojnuju sumu svaich hrošaj — bo za žyllo jany ŭsio ž płaciać.
Anhielina ž z mužam finansavaj paduški biaśpieki nie mieli i za kvateru (jakaja ŭžo aficyjna aformlena na ich) nie zapłacili ni kapiejki.
Akramia vialikaj kuchni-haścioŭni maładaja maci pakazała budučy dziciačy pakoj. Pad jaho baćki pradkazalna addali samy vialiki pakoj. Kali dziaŭčynki padrastuć, la akna im pastaviać piśmovyja stały. A ŭ bližejšych płanach — nabyć dla małych try šafy. Pieraviazuć siudy ich łožački i spavivalnyja stoliki.
Anhielina raspaviała i pra svaju siamju. U jaje baćkoŭ čaćviora dziaciej (Anhielina starejšaja). Kaža, što raśli jany ŭsie vielmi družnymi, i navat u niejki momant mieli adnu maru na ŭsich — płanavali pajści pracavać u milicyju. U vyniku płany źmianilisia.
Ale ž siłavik u siamji ŭsio ž źjaviŭsia. Muž Anhieliny, Stanisłaŭ Kaminski — staršy siaržant Departamienta achovy MUS. Para razam jašče sa škoły (pry hetym Anhielina starejšaja za jaho na dva hady).
Žartuje, što kachany začapiŭ tym, što zusim nie źviartaŭ na jaje ŭvahu: «Heta dla dziaŭčynki taki kamieńčyk u aharod».
Ažanilisia, kali Anhielinie byŭ 21 hod, a Stanisłavu ŭsiaho 19. Žančyna kaža, što adrazu skazała mužu, što maryć pra šmat dziaciej. Toj byŭ suprać taho, kab stanavicca baćkami adrazu paśla viasiella — Anhielina pahadziłasia, što varta krychu pačakać.
Sama jana skončyła spačatku miedycynski kaledž — atrymała prafiesiju miedsiastry, potym advučyłasia na zavočcy ŭ BDU na sacyjalnaha rabotnika.
Da dekreta šeść hadoŭ adpracavała ŭ dziciačaj reanimacyi ŭ radzilni №1 Minska.
Začać u pary nie atrymoŭvałasia kala paŭhoda — Anhielina ŭžo pačała dumać, što jany majuć niejkija prablemy sa zdaroŭjem. Ale ŭ chutkim časie jany daviedalisia pra ciažarnaść. Muž na naviny pra toje, što buduć trajniatki, adreahavaŭ frazaj: «Nu, prykolna, spravimsia». Anhielina dadaje, što Stanisłaŭ pačaŭ śmiajacca i kazać, što jon čaraŭnik.
U vyniku vyśvietliłasia, što spačatku dziaciej było čaćviora — ale zastałosia tolki troje. Unikalnaść ciažarnaści była ŭ tym, što dziaŭčaty atrymalisia z adnoj zihoty i mieli adnu płacentu na ŭsich (u vypadku trajniatak zvyčajna 2‑3 płacenty). Tamu była ryzyka, što niechta pačnie abjadać inšych.
Anhielina ž žartavała, što jaje dočki ŭžo žyvuć u trochpakajovaj kvatery.
Prasić kvateru ŭ Łukašenki Anhielina vyrašyła, jašče kali była ciažarnaj. Letam jana pabačyła videa, dzie toj kaža prasić što zaŭhodna paśla naradžeńnia treciaha małoha: «Ja paabiacała sabie jašče da rodaŭ, što, kali ŭsio budzie dobra, małyški buduć zdarovymi, sa mnoj usio budzie dobra, ja abaviazkova źviarnusia da kiraŭnika dziaržavy».
Prapahanda zaraz vykarystoŭvaje hetuju historyju dla taho, kab prasoŭvać tezu: «Łukašenka — sapraŭdny mužyk, skazaŭ — zrabiŭ». Ale pry hetym ihnarujucca zvaroty ŭsich astatnich šmatdzietnych mam, jakija natchnilisia prykładam Anhieliny i taksama zapisali zvaroty da Łukašenki.
Sama ž jana ŭ instahramie raspaviadaje, što ŭžo maryć pra čaćviortaje dzicia — chłopčyka.
«Da apošniaha nie viedała, što kvaternaje pytańnie moža vyrašycca». Mama trojni raskazała, jak navažyłasia prasić žyllo ŭ Łukašenki
Minčanka Anhielina, jakaja prasiła ŭ Łukašenki kvateru za trojniu, atrymała žyllo
Minčancy, jakaja prasiła ŭ Łukašenki kvateru za troch narodžanych dačok, pakul padaryli trochmiesnuju kalasku
Biełaruska naradziła trojniu — usie dziaŭčynki. Ciapier prosić u Łukašenki kvateru ŭ Minsku, bo Hod biełaruskaj žančyny
Ciapier čytajuć
Prabityja lohkija, razarvanaja piečań i seks z małaletniaj: što adbyvajecca ŭnutry biełaruskaj milicyi i jak načalstva heta chavaje21
Prabityja lohkija, razarvanaja piečań i seks z małaletniaj: što adbyvajecca ŭnutry biełaruskaj milicyi i jak načalstva heta chavaje
Žycharka Daniecka zajechała praź Biełaruś va Ukrainu, kab pamianiać pašpart i pajechać žyć u Jeŭropu. Akazałasia, pierad tym jana vajavała za Rasiju77
Žycharka Daniecka zajechała praź Biełaruś va Ukrainu, kab pamianiać pašpart i pajechać žyć u Jeŭropu. Akazałasia, pierad tym jana vajavała za Rasiju7
«Z rasijan-naviednikaŭ pracentaŭ 70 akazvalisia vatnikami». Eks-hid z muzieja VAV, jakoha zatrymlivali jaho ž ekskursanty, ciapier papularny ŭ Varšavie — pahutaryli ź im1414
Kamientary