Navukoŭcy vyjavili niečakanuju suviaź pamiž pryjomam paracetamołu padčas ciažarnaści i zdaroŭjem dačok

Asnovy žanočaj repraduktyŭnaj sistemy zakładvajucca jašče da naradžeńnia. Dziaŭčynki źjaŭlajucca na śviet z peŭnym zapasam jajcakletak, jaki pastupova raschodujecca na praciahu žyćcia. Kali jon vyčerpvajecca, nadychodzić mienapaŭza.

Tamu navukoŭcaŭ cikavić, ci mohuć leki, jakija žančyna prymaje padčas ciažarnaści, paŭpłyvać na repraduktyŭnaje zdaroŭje jaje budučaj dački.

Novaje daśledavańnie navukoŭcaŭ z Kapienhahiena, na jakoje źviartaje ŭvahu Tagesspiegel, było pryśviečana paracetamołu — adnamu z najbolš raspaŭsiudžanych abiazbolvalnych i haračkapanižalnych preparataŭ.

U daśledavańnie ŭklučyli 685 žančyn u pieršym trymiestry ciažarnaści. Dalej navukoŭcy sačyli za imi na praciahu ciažarnaści: raz na dva tydni žančyny paviedamlali, ci prymali paracetamoł, a daśledčyki taksama analizavali ŭzory mačy.

Paśla naradžeńnia dziaciej navukoŭcy abśledavali 302 dačok udzielnic. Na toj momant dziaŭčynkam było ŭ siarednim 106 dzion.

Zaležnaść nastupstvaŭ ad terminu ciažarnaści

U dziaŭčynak, čyje maci prymali paracetamoł da 17‑ha tydnia ciažarnaści, abjom jaječnikaŭ byŭ u siarednim prykładna na 40% mienšy, a matki — na 13% mienšy, čym u tych, čyje maci nie prymali preparatu.

Pryjom paracetamołu z 17‑ha tydnia ciažarnaści byŭ źviazany ŭžo ź inšym pakazčykam. U jaječnikach dziaŭčynak naličvałasia prykładna na 23% mienš falikułaŭ, u jakich znachodziacca niaśpiełyja jajcakletki.

Akramia taho, u dziaŭčynak, čyje maci prymali paracetamoł tolki na rańnich terminach ciažarnaści, byŭ nižejšy ŭzrovień antymiuleravaha harmonu (AMH). Jaho vykarystoŭvajuć jak adzin z pakazčykaŭ zapasu jajcakletak.

Navukoŭcy zaŭvažyli jašče adnu zakanamiernaść. Čym vyšejšaj była kancentracyja paracetamołu ŭ mačy maci, tym mienšymi byli jaječniki i matka ŭ dački. Heta moža ŭkazvać na zaležnaść vyjaŭlenych źmien ad uzroŭniu ŭździejańnia preparatu.

Pavodle źviestak daśledčykaŭ, žančyny prymali adnosna nievialikija sutačnyja dozy paracetamołu (nie vyšej za rekamiendavanyja 4000 milihramaŭ). Najčaściej jany vykarystoŭvali jaho ad hałaŭnoha bolu i mihreni, a taksama ad inšych vidaŭ bolu.

Zaŭvažym, što daśledavańnie było naziralnym. Heta značyć, jano vyjaviła suviaź, ale nie dakazała, što mienavita paracetamoł staŭ pryčynaj adroźnieńniaŭ u raźvićci repraduktyŭnaj sistemy.

Da taho ž, jak adznačajuć aŭtary, całkam vyklučyć upłyŭ inšych faktaraŭ niemahčyma. U toj ža čas atrymanyja imi vyniki adpaviadajuć tamu, što raniej nazirali ŭ ekśpierymientach na žyviołach. U ich uździejańnie paracetamołu va ŭłońni maci było źviazana ź mienšym zapasam falikułaŭ, źnižeńniem fiertylnaści i karaciejšym repraduktyŭnym pieryjadam u naščadkaŭ žanočaha połu.

Dadatkovyja danyja

Navukoŭcy taksama pravieryli svaje vysnovy na danych inšaj hrupy, u jakuju ŭvachodzili 1210 dziaŭčatak. Za imi nazirali ad niemaŭlaci da padletkavych hadoŭ.

I tam vyjaviłasia padobnaja suviaź. U dziaŭčynak, čyje maci prymali paracetamoł padčas ciažarnaści, u pieryjad pałavoha staleńnia matka była mienšaj, a ŭ padletkavych hadach mienšym byŭ abjom jaječnikaŭ. Heta moža śviedčyć pra toje, što vyjaŭlenyja adroźnieńni zachoŭvajucca i paśla rańniaha dziacinstva.

Ale hałoŭnaje pytańnie pakul zastajecca biez adkazu. Navukoŭcy nie viedajuć, ci adabjucca hetyja asablivaści na zdolnaści dziaŭčynak mieć dziaciej u darosłym žyćci i ci moža ŭ ich raniej nastupić mienapaŭza. Kab heta vyśvietlić, patrebnyja bolš praciahłyja nazirańni.

Aŭtary padkreślivajuć, što žančynam, jakija prymali paracetamoł padčas ciažarnaści, nie varta chvalavacca z-za atrymanych vynikaŭ. Daśledavańnie pakazvaje zakanamiernaści na ŭzroŭni vialikich hrup i nie dazvalaje pradkazać nastupstvy dla kankretnaj žančyny abo jaje dziciaci.

U mnohich dziaŭčatak, čyje maci prymali paracetamoł, pakazčyki jaječnikaŭ byli takimi ž, jak u dziaciej, jakija nie zaznali ŭździejańnia preparatu.

Tamu vučonyja nie zaklikajuć ciažarnych całkam admaŭlacca ad paracetamołu, kali jon nieabchodny. Jany rajać abmiarkoŭvać z doktaram, kali pryjom lekaŭ sapraŭdy patrebny, a kali možna razhledzieć inšyja sposaby palehčyć stan.

Ahulny pryncyp zastajecca raniejšym: padčas ciažarnaści varta vykarystoŭvać najmienšuju efiektyŭnuju dozu paracetamołu i prymać jaho jak maha mienš času.

• 0
• 0
• 0
• 0
• 6
• 0
• 0
• 0