Na paradzie ŭ livijskim Bienhazi zaśviaciŭsia biełaruski bieśpiłotnik «Miratvorac»
Biełaruski ŭdarny bieśpiłotnik «Miratvorac» pakazali na vajskovym paradzie ŭ Bienhazi, na ŭschodzie Livii. Raniej pra pastaŭki takich dronaŭ u hety rehijon nie paviedamlałasia. Pry hetym pieradača ŭdarnych bieśpiłotnikaŭ u Liviju biez papiaredniaha dazvołu sankcyjnaha kamiteta Rady Biaśpieki AAN parušaje embarha na pastaŭki zbroi, uviedzienaje ŭ 2011 hodzie, piša vydańnie Reform.news.
Parad šturmavych i parašutna-desantnych padraździaleńniaŭ sił śpiecyjalnaha pryznačeńnia adbyŭsia 15 kastryčnika 2026 hoda. Fotaspravazdaču apublikavała pres-słužba kamandavańnia Livijskaj nacyjanalnaj armii.
«Miratvorac» raspracavała biełaruskaje kanstruktarskaje biuro «Bieśpiłotnyja viertaloty», raniej viadomaje jak KB «INDELA». Pieršapačatkova aparat stvarali pad nazvaj «Bierkut-BM» jak rabatyzavanuju pavietranuju mišeń. Paźniej raspracoŭku pieratvaryli va ŭdarny bieśpiłotnik-kamikadze «Miratvorac». U 2023 hodzie na vystavie MILEX taksama pakazali mabilny kompleks supraćdziejańnia bieśpiłotnikam «Miratvorac-P».
Biełaruskija bieśpiłotniki hetaha siamiejstva ŭžo fihuravali ŭ paviedamleńniach pra pastaŭki zbroi ŭ inšyja krainy. U lutym 2025 hoda paŭstancy z hrupoŭki M23 zachapili ŭ aeraporcie horada Homa na ŭschodzie Demakratyčnaj Respubliki Konha partyju vajskovaj techniki, siarod jakoj byli novyja «Bierkuty-BM» u draŭlanych skrynkach.
U červieni 2026 hoda indyjskaja kampanija SMPP paviedamiła pra zaviaršeńnie pastaŭki indyjskaj armii 100 reaktyŭnych udarnych dronaŭ-kamikadze Peacekeeper (Agniveg) i šaści navučalnych kompleksaŭ. Pavodle infarmacyi Reform.news, havorka išła pra biełaruskija raspracoŭki. Kantrakt z «Biełśpiecźniešnietechnikaj» padpisali ŭ 2025 hodzie. Raniej vydańnie Afghanistan International śćviardžała, što Indyja zakuplaje ŭ Biełarusi ŭzbrajeńnie dla talibaŭ.
Na paradzie ŭ Bienhazi prysutničali kamandujučy Livijskimi arabskimi ŭzbrojenymi siłami Chalifa Chaftar i jaho syn, namieśnik Sadam Chaftar. Mierapryjemstva prymierkavali da 12‑j hadaviny ŭvachodžańnia sił Chaftara ŭ Bienhazi 15 kastryčnika 2014 hoda. Siarod haściej byli taksama kiraŭnik urada ŭschodniaj Livii Usama Chamad, vajskovaje kamandavańnie, pradstaŭniki družalubnych dziaržaŭ i siemji zahinułych vajskoŭcaŭ.
Na fotazdymkach žurnalisty Reform.news zaŭvažyli i pradstaŭnikoŭ Biełarusi — hienierał-majora zapasu Siarhieja Dudko i kapitana Antona Pracenku.
U Livii ciapier idzie hramadzianskaja vajna i centralny ŭrad u Trypali nie kantraluje bolšuju častku terytoryi krainy. Na niepadkantrolnaj terytoryi vaładaryć Livijskaja nacyjanalnaja armija na čale z Chalifoj Chaftaram, i mienavita ź im i jahonymi paplečnikami raźvivaje adnosiny režym Łukašenki.
Były ministr sielskaj haspadarki źbirajecca vyroščvać pšanicu ŭ Livii
U Minsku adkryłasia handlovaje pradstaŭnictva Livii
U Minsk znoŭ pryjechała vysokaja delehacyja ź Livii
U Biełarusi prachodzili padrychtoŭku livijskija śpiecnazaŭcy FOTY
U Liviju palacieła ź nieanansavanym vizitam pradstaŭničaja delehacyja biełaruskich čynoŭnikaŭ
U minskim handlovym centry Palazzo sabrałasia daŭžeznaja čarha. Pa darmovych miadźviedzikaŭ!5
Kamientary