U Aŭstralii mietearadary pačali pakazvać doždž, jakoha niama. Akazałasia, što heta miljony matylkoŭ

U apošnija tydni, jak piša The Guardian, mietearadary ŭ aŭstralijskim štacie Novy Paŭdniovy Uels stali pakazvać dziŭnuju karcinu. Amal kožnuju noč na kartach źjaŭlajucca šyrokija zony apadkaŭ, asabliva ŭ vakolicach Sidneja. Ale ŭ mnohich miaścinach, dzie radary pakazvajuć doždž, nasamreč sucha.

Što ž tady fiksujuć prybory? Mietearołahi miarkujuć, što pryčynaj mohuć być miljony načnych matylkoŭ, jakija ciapier pierasiakajuć uschod Aŭstralii.

Havorka pra načnic vidu Agrotis infusa. U Aŭstralii ich nazyvajuć bohanhami — ad słova bugung, jakoje na movie karennaha naroda dudchuroa aznačaje «karyčnievy načny matylok».

Mietearadary vyjaŭlajuć apadki z dapamohaj radyjoimpulsaŭ, jakija adbivajucca ad kropiel vady, śniažynak abo hradu. Ale kali ŭ pavietry znachodziacca vielizarnyja rai nasiakomych, sihnał moža adbivacca i ad ich ciełaŭ dy kryłaŭ. U vyniku na radarnych kartach źjaŭlajucca plamy, padobnyja da daždžavych abłokaŭ.

Aŭstralijskaje Biuro mietearałohii paćvierdziła, što vializnyja rai matylkoŭ mohuć stvarać taki efiekt. Praŭda, śpiecyjalisty pakul nie hatovyja prypisać usie niezvyčajnyja sihnały mienavita nasiakomym, bo padobnuju karcinu časam vyklikajuć i atmaśfiernyja źjavy, naprykład tempieraturnyja inviersii.

Cikava, što niešta padobnaje ŭžo zdarałasia. Padčas Alimpijskich hulniaŭ u Sidnei ŭ 2000 hodzie vielizarnyja rai matylkoŭ, pryciahnutych jarkimi ahniami stadyjonaŭ, pavodle ŭspaminaŭ, mietearołahi taksama pryniali za doždž.

Bohanhi štohod ździajśniajuć padarožža na sotni kiłamietraŭ. Uviesnu jany nakiroŭvajucca z raŭnin uschodniaj Aŭstralii ŭ Aŭstralijskija Alpy, dzie pravodziać śpiakotnyja miesiacy ŭ prachałodnych piačorach i raskolinach skał. Uvosień matylki viartajucca nazad. Padčas takich mihracyj ich moža być nastolki šmat, što ŭ pavietry ŭtvarajucca sapraŭdnyja chmary z nasiakomych.

Dla navukoŭcaŭ niezvyčajnyja pakazańni radaraŭ mohuć akazacca vielmi karysnymi. Dahetul adsočvać pieramiaščeńni bohanhaŭ było składana. Daśledčyki sprabavali paznačać asobnych matylkoŭ, źbirali śviedčańni vidavočcaŭ i navat vyvučali hazietnyja paviedamleńni, kab adnavić maršruty ich mihracyj.

Ciapier radary mohuć dapamahčy nazirać za rucham cełych rajoŭ. Padobnyja technałohii ŭžo vykarystoŭvajuć dla adsočvańnia pieramiaščeńniaŭ ptušak i latučych lisic — bujnych rukakryłych ź siamiejstva kryłanaŭ.

Masavaje źjaŭleńnie bohanhaŭ asabliva ŭzradavała daśledčykaŭ, bo ŭ papiarednija hady ich kolkaść rezka skaraciłasia. U 2021 hodzie vid unieśli ŭ Čyrvony śpis Mižnarodnaha sajuza achovy pryrody ŭ katehoryi vidaŭ pad pahrozaj źniknieńnia.

Adnoj z hałoŭnych niebiaśpiek dla matylkoŭ zastajecca źmianieńnie klimatu, jakoje pahražaje ich miescam letniaha pražyvańnia ŭ Aŭstralijskich Alpach. Ciapierašniaje źjaŭleńnie vializnych rajoŭ daje navukoŭcam nadzieju, adnak jašče nie śviedčyć pra poŭnaje adnaŭleńnie papulacyi.

• 1
• 0
• 0
• 0
• 0
• 0
• 0
• 0