Što viadoma pra aryšt i źniavoleńnie sienatara Ihara Siarhiejeva, dyrektara Biełaruskaha cemientnaha zavoda

U hetym hodzie byŭ vyniesieny prysud hienieralnamu dyrektaru Biełaruskaha cemientnaha zavoda. Pra heta paviedamiŭ staršy prakuror Hienieralnaj prakuratury Biełarusi Andrej Fiedarovičaŭ.

«Sioleta za karupcyjnyja złačynstvy da kryminalnaj adkaznaści pryciahnuli 607 čałaviek, čaćviora ź jakich zajmali adkaznyja pasady. Za chabarnictva byli asudžanyja hienieralnyja dyrektary «Kamunarki», Biełaruskaha cemientnaha zavoda, Hrodzienskaha miasakambinata i inšyja vysokapastaŭlenyja słužbovyja asoby», — zajaviŭ jon.

Pra pieraśled kiraŭnika cemientnaha zavoda raniej nie było viadoma. Pra kaho idzie havorka? Z 2021 hoda na čale pradpryjemstva byŭ Ihar Siarhiejeŭ. Jon ža ŭ 2024 hodzie byŭ abrany členam Savieta Respubliki ad Mahiloŭskaj vobłaści.

Kali dakładna źnik Siarhiejeŭ, niezrazumieła. Heta adbyłosia ŭ kancy 2025 hoda ci ŭ samym pačatku 2026 hoda.

Na sajcie «Hołasa Kaściukoŭščyny» apošniaje mierkavańnie ad jaho imieni było apublikavana 17 listapada 2025 hoda, choć zvyčajna Siarhiejeva tam zhadvali štomiesiac.

Novy dyrektar źjaviŭsia na Biełaruskim cemientnym zavodzie ŭ mai 2026 hoda. Pasadu zaniaŭ Jaŭhien Vałoščyk, jaki raniej byŭ hałoŭnym technołaham u «Krasnasielskbudmateryjałach» — inšym cemientnym pradpryjemstvie, jano znachodzicca ŭ Vaŭkavyskim rajonie. Ahułam ža Vałoščyk adpracavaŭ na tym zavodzie bolš za 20 hadoŭ.

Iharu Siarhiejevu 47 hadoŭ. Jon usiu karjeru zrabiŭ u Kryčavie, dzie i naradziŭsia. Skončyŭ Biełaruskuju sielskahaspadarčuju akademiju, trochi papracavaŭ u kałhasie na radzimie i ŭ chlebapryjomnym pradpryjemstvie, a paśla na doŭhi čas — z 2003 da 2021 — zasieŭ u «Kryčaŭcemientšyfiery». Tam Siarhiejeŭ prajšoŭ šlach ad inśpiektara słužby kantrolu da namieśnika dyrektara pa kamiercyjnych pytańniach. I adtul jaho pieraviali ŭ Kaściukovičy na Biełaruski cemientny zavod — dyrektaram.

Pavialičyć

Ahułam u Biełarusi jość try cemientnyja zavody, abjadnanyja ŭ chołdynh — u Kaściukovičach, u Kryčavie i ŭ Krasnasielskim. U kožny ź ich dziaržava ŭkłała sotni miljonaŭ dalaraŭ, ale jany pa-raniejšamu pracujuć u minus, a top-mieniedžaraŭ pieryjadyčna sadžajuć za karupcyju.

Siarhiejeŭ nie staŭ vyklučeńniem. Za atrymańnie chabaru asobaj, jakaja zajmaje adkaznaje stanovišča (č. 3. art. 430 Kryminalnaha kodeksa), praduhledžvajecca ad 5 da 15 hadoŭ kałonii. Vyhladaje, što pieršasny sud užo adbyŭsia. Ale nieviadoma, były sienatar čakaje apielacyju ci ŭžo adpraviŭsia ŭ kałoniju.

• 1
• 0
• 9
• 1
• 0
• 0
• 0
• 1