U Francyi z carkvy skrali i źniščyli moščy śviatoha Mikałaja — taho, chto staŭ pravobrazam Santa-Kłausa

U francuzskim horadzie Sien-Nikala-de-Por, što ŭ Łatarynhii, staić vialikaja hatyčnaja bazylika, kudy ŭžo šmat stahodździaŭ pryjazdžajuć pałomniki, kab ušanavać moščy śviatoha Mikałaja. Mienavita hety śviaty staŭ adnym z pravobrazaŭ Santa-Kłaŭsa. Štohod u śniežni ŭ horadzie pravodziać uračystaje šeście z fakiełami, i ciapier tut rychtujucca da čarhovaha śviata.

Adnak sioleta, jak piša Daily Mail, padrychtoŭku azmročyŭ kradziež. 2 listapada śviatary paviedamili ŭ palicyju, što z adnoj z kaplic bazyliki źnikła relikvija — nievialiki frahmient kostki, jakuju ličać moščami śviatoha Mikałaja. Jana zachoŭvałasia ŭ relikvaryi pad jaho statujaj.

Palicyja vyznačyła asobu padazravanaha i zatrymała jaho. Mužčyna pryznaŭsia, što raźbiŭ šklanuju vitrynu i vykraŭ relikviju. Paśla jon spaliŭ frahmient kostki i razdrabniŭ jaho. Svoj učynak zatrymany patłumačyŭ žadańniem źniščyć toje, što ličyŭ prajavaj fietyšyzmu.

U parafii zajavili, što ŭsprymajuć zdareńnie nie tolki jak stratu histaryčnaj kaštoŭnaści, ale i jak udar pa viery i tradycyjach mnohich pakaleńniaŭ pałomnikaŭ.

Pry hetym hałoŭnyja śviatyni bazyliki nie paciarpieli. U jaje skarbnicy zachoŭvajucca jašče siem frahmientaŭ kostak, jakija prypisvajuć śviatomu Mikałaju. Najbolš šanavanaja relikvija źmieščana ŭ bahata azdoblenym relikvaryi ŭ formie ruki. Źniščany ž frahmient znachodziŭsia asobna — pad statujaj śviatoha jaho raźmiaścili ŭ pačatku 2000‑ch hadoŭ.

Pavialičyć

Čamu hetaja relikvija takaja važnaja

Śviaty Mikałaj žyŭ u III—IV stahodździach i byŭ jepiskapam horada Mira na terytoryi sučasnaj Turcyi. Pavodle chryścijanskaha padańnia, jon dapamahaŭ biednym i tajemna razdavaŭ padarunki. Asabliva viadomaja historyja pra toje, jak Mikałaj padaryŭ zołata trom dziaŭčatam ź biednaj siamji, kab vyratavać ich ad žabractva i prastytucyi.

Mienavita tradycyja tajemnych padarunkaŭ, źviazanaja sa śviatym Mikałajem, z časam stała adnoj z asnoŭ sučasnaha vobraza Santa-Kłaŭsa.

U 1087 hodzie maraki vyvieźli moščy śviatoha ź Miry ŭ italjanski horad Bary. A ŭ 1098 hodzie francuzski rycar Aber de Varanževil pryvioz adtul u Łatarynhiju frahmient kostki, jaki, pavodle padańnia, byŭ častkaj palca pravaj ruki Mikałaja.

Z taho času Sien-Nikala-de-Por staŭ važnym centram pałomnictva. U XV stahodździ tut pačali budavać vialikuju hatyčnuju bazyliku ŭ honar śviatoha, jakoha ličać apiekunom Łatarynhii.

Štohod 6 śniežnia ŭ horadzie adznačajuć dzień śviatoha Mikałaja, a napiaredadni ładziać tradycyjnaje šeście z fakiełami. Sioleta jano zapłanavanaje na 5 śniežnia.

• 0
• 0
• 0
• 0
• 0
• 0
• 0
• 0