Śpiecyjalisty raskazali, jakija fišynhavyja listy najčaściej adkryvajuć biełarusy. Lidaram stała zaprašeńnie na subotnik
Najčaściej supracoŭniki biełaruskich arhanizacyj adkryvajuć fišynhavyja listy, jakija tyčacca zvyčajnych pracoŭnych pytańniaŭ. Pra heta śviedčać vyniki vučebnych fišynhavych rassyłak «Łabaratoryi Kaśpierskaha» za studzień — kastryčnik 2026 hoda, pradstaŭlenyja na forumie «Kibierbiaśpieka — 2027», piša BiełTA.
Samaj dziejsnaj prynadaj akazałasia zaprašeńnie na abaviazkovy subotnik: na takuju spasyłku pierajšli 23% supracoŭnikaŭ, jakija atrymali list. Paviedamleńni pra pieranos pracoŭnych dzion i raźlikovyja listy zacikavili pa 11% atrymalnikaŭ.
Značna radziej supracoŭniki reahavali na paviedamleńni, jakija imitavali aficyjnyja paviedamleńni. Falšyvaje paviedamleńnie ad Centra abarony infarmacyi zacikaviła 3% atrymalnikaŭ, paviedamleńnie pra niedastaŭleny list — 2%. Amal nichto nie adreahavaŭ na paviedamleńnie pra pačatak pazapłanavaj pravierki. Pa 1% supracoŭnikaŭ pierajšli pa spasyłkach u listach pra novuju sistemu hadavoha premiravańnia i pašyreńnie pieraliku karparatyŭnych pasłuh.
Ekśpierty ŭ halinie kibierbiaśpieki adznačajuć, što złamyśniki vykarystoŭvajuć pracoŭnyja temy, jakija vyklikajuć emocyi i źnižajuć pilnaść. Naprykład, abaviazkovy ŭdzieł u subotniku abo atrymańnie raźlikovaha lista. Paviedamleńni, źviazanyja z pracoŭnymi pracesami, stanoviacca asabliva efiektyŭnaj prynadaj dla fišynhavych atak.
Listy, jakija vydajuć siabie za rassyłki ad adździeła kadraŭ abo ŭnutranych słužbaŭ arhanizacyi, supracoŭniki mohuć usprymać jak nadziejnyja. Tamu dla abarony patrebnyja nie tolki techničnyja srodki, ale i rehularnaje navučańnie piersanału, a taksama zvyčka praviarać paviedamleńni, navat kali jany vyhladajuć całkam zvyčajnymi.
Pa słovach ekśpiertaŭ, strymanaja reakcyja supracoŭnikaŭ na niekatoryja vidy vučebnaha fišynhu moža śviedčyć pra toje, što jany stali bolš uvažliva stavicca da padazronych paviedamleńniaŭ. Adnak u realnych atakach ašukancy ŭsio čaściej vykarystoŭvajuć štučny intelekt, kab stvarać pierakanaŭčyja listy, jakija ciažka adroźnić ad sapraŭdnych.
Kab źnizić ryzyku fišynhavych atak, śpiecyjalisty rajać rehularna navučać supracoŭnikaŭ raspaznavać mietady sacyjalnaj inžynieryi, abnaŭlać prahramnaje zabieśpiačeńnie i vykarystoŭvać srodki abarony karparatyŭnaj pošty i pryład. Taksama važna stvarać składanyja ŭnikalnyja paroli dla pracoŭnych ulikovych zapisaŭ i zachoŭvać ich u śpiecyjalnych mieniedžarach parolaŭ.
Rasijskija chakiery ŭzłamvajuć smartfony navat praz nadziejnyja sajty. Adzinaja strachoŭka: abnaŭlać prahramnaje zabieśpiačeńnie
Machlary navučylisia zdavać praz Booking nieisnujučaje žyllo — voś jak pracujuć schiemy
Adkul machlary daviedvajucca imiony, numary i navat miescy pracy biełarusaŭ?
Machlary stali rassyłać biełaruskamoŭnyja paviedamleńni ad DAI nibyta dla apłaty štrafaŭ
Kamientary