Fest zryvaje meryja Čarnihava.
Fest zryvaje meryja Čarnihava.
«Starajemsia atrymać adkaz z meryi. Nas pierakidvajuć z adnych ludziej na inšych», — paviedamiŭ adzin z arhanizataraŭ Vital Supranovič.
U mai adbyłasia sustreča arhanizataraŭ z čarnihaŭskimi čynoŭnikami, na jakoj było ŭchvalena praviadzieńnie festu ŭ horadzie. Na 7 červienia płanavałasia praviadzieńnie razam z uładami arhkamiteta. Tady čakałasia atrymać aficyjny adkaz nakont festu. Ale arhkamitet biez tłumačeńnia byŭ admienieny. I na zvaroty arhanizataraŭ u meryi ŭžo miesiac jak nie adkazvajuć. Chacia vusna paviedamili, što fiestyval nie adbudziecca.
«Ź niefarmalnych krynic my daviedalisia, što
čarnihaŭskija ŭłady znachodziacca ŭ kantakcie z aficyjnym biełaruskim bokam, jaki nastojliva radzić nie dazvalać fest.
Takim čynam, los mižnarodnaha fiestyvalu, jaki pravodzicca na ŭkrainskaj terytoryi, de-fakta znachodzicca ŭ rukach biełaruskich uładaŭ», — kaža Vital Supranovič.
Tamu Be Free vyrašana adkłaści da 2011 hoda. Chacia sp. Supranovič nie vyklučaje, što stanoŭčy adkaz z meryi moža źjavicca ŭ žniŭni. Bo pa ŭkrainskim zakanadaŭstvie zabaranić takoje mierapryjemstva biez surjoznych na toje pryčyn vielmi składana. Ale tady ŭžo budzie prosta niemahčyma fizična jaho pravieści.
Vital Supranovič kaža, što inšyja ŭkrainskija harady hatovyja byli pryniać fest sioleta. Ale spynilisia na Čarnihavie, bo jon najbolš padyšoŭ dla praviadzieńnia Be Free. I na budučy hod arhanizatary znoŭ buduć sprabavać damovicca ź miascovymi čynoŭnikami. Na krajni vypadak fest pierajedzie ŭ inšy horad.
Rok fiestyval Be Free uźnik u 2007 hodzie pad nazvaj «Prava być svabodnym». U papiarednija hady jon prachodziŭ na zachadzie Ukrainy — u haradach Łuck i Lvoŭ. Letaś jon adbyŭsia ŭ Čarnihavie, dzie vyrašyli pravodzić jaho i nadalej. Udzieł u im prymali «Lapis Trubiecki», «Vopli Vidaplasava», «Krama», B:N, ZATOCZKA, Pomidor/OFF, Znich, Vladivostok i inšyja. Sioleta jon pavinien byŭ prajści 21-23 žniŭnia.
Kamientary