Psichołah: Musić być i jurydyčnaja adkaznaść psichołaha za razhałošvańnie miedycynskaj tajamnicy
Kamientar śpiecyjalista adnosna zakonu «Ab psichałahičnaj dapamozie».
U Biełarusi pryniaty zakon «Ab psichałahičnaj dapamozie». Psichołahi ciapier abaviazanyja danosić pra złačynstvy, pra jakija daviedalisia ad tych, chto da ich źviarnuŭsia i raskryŭ dušu.Heta prapisana ŭ zakonie «Ab psichałahičnaj dapamozie», što byŭ padpisany 1 lipienia kiraŭnikom dziaržavy. Artykuł 15 zakonu kaža: «Psichołahi abaviazanyja paviedamlać u pravaachoŭnyja orhany infarmacyju, jakaja składaje prafiesijnuju tajamnicu, kali jana źmiaščaje źviestki ab ździejśnienym asabliva ciažkim złačynstvie albo ab padrychtoŭcy ciažkaha i asabliva ciažkaha złačynstva».
Novy zakon kamientuje viadučy psichołah Minskaha haradskoha centra sacyjalnaha absłuhoŭvańnia siam'i i dziaciej Žanna Mickievič.
«Pačuć pra ciažkija złačynstvy — amal nierealnaja situacyja», — kaža jana. Žanna Mickievič ličyć, što, kali psichołah vysłuchoŭvaje čałavieka, jaki niasie niejkuju niebiaśpieku dla inšych, to, viadoma, patrebna prymać miery.Bo hetaja sprava tyčycca nie tolki pacyjenta, ale i inšych ludziej. Ale trochi škaduje, što niama pakul jašče zakonu ab jurydyčnaj adkaznaści psichołaha za razhałošvańnie miedycynskaj tajamnicy, jak, naprykład, u Hiermanii. U mnohich krainach psichołah nie maje prava navat kaleham raskazvać pra toje, što daviedaŭsia ad pacyjenta.
«U našym vypadku novy zakon možna dvuchbakova razhladać. Naprykład, pryjšoŭ da mianie chłopčyk i skazaŭ, što choča zabić baćku. Z adnaho boku, ja pavinna adrazu skazać heta pravaachoŭnym orhanam. Ale ja mahu pasprabavać vyśvietlić pryčyny prablemy.Potym ja mahu parazmaŭlać ź jaho maci i nie ŭ łob skazać, što jon choča zabić jaje muža. Ja mahu vyśvietlić, u jakich umovach jon žyvie, čym siamja dychaje. Zatym pacikavicca akuratna ŭ baćki dy vyśvietlić pryčyny jaho žorstkich pavodzinaŭ u siamji. Heta pryvodzić da taho, što baćka pačynaje trochi miakčej stavicca da syna i syn suadnosna mianiaje niekatoryja sa svaich namieraŭ. Psichołah musić pracavać prafiesijna, niekatoryja situacyi možna vypravić».
Žanna Mickievič zaznačaje, što psichołahu davodzicca vysłuchoŭvać ad pacyjentaŭ roznaje — navat pra parušeńnie zakanadaŭstva. Z maralnaha punktu hledžańnia, heta miedyčnaja tajamnica i parušeńnie zakonu — vyklučna sprava pacyjenta. Ź inšaha boku, kali pacyjent sacyjalna niebiaśpiečny, to psichołah nie moža nie źviarnuć na heta ŭvahi. Sprava nie ŭ danosie, a, mahčyma, ŭ vyratavańni žyćcia absalutna zdarovaha čałavieka, jaki i nie padazraje pra niebiaśpieku.
Ciapier čytajuć
Ejsmant: Statkieviča pamiłavali ŭžo paŭhoda nazad, ale tady jon viarnuŭsia ŭ turmu6
Kamientary