«Pajšoŭ značny pryrost nasielnictva» i inšyja česnaści.
1 kastryčnika biełaruski kiraŭnik znoŭ budzie mieć znosiny z žurnalistami rasiejskich ŚMI. Napiaredadni hetaj padziei hazieta «Salidarnaść» vyrašyła supastavić niekatoryja zajavy Alaksandra Łukašenki, zroblenyja na papiarednich pres-kanfierencyjach padobnaha kštałtu, z tym, što jość nasamreč.
Kab daloka nie chadzić, zazirniem dla pačatku ŭ 2009 hod. Tady Łukašenka, u pryvatnaści, paviedamiŭ rasiejskim žurnalistam, što ŭ Biełarusi try hady tamu demahrafičnaja situacyja stała źmianiacca --
«pajšoŭ značny pryrost nasielnictva».
«Salidarnaść» źviarnułasia da dadzienych Nacyjanalnaha statystyčnaha kamiteta Respubliki Biełaruś.
2005 hod -- 9 młn. 800 tys.
2006 hod -- 9 młn. 751 tys.
2007 hod -- 9 młn. 714 tys.
2008 hod -- 9 młn. 690 tys.
2009 hod -- 9 młn. 493 tys.
2010 hod (na 1 vieraśnia) -- 9 młn. 466 tys.
Vy tut «značny pryrost» choć dzie-niebudź bačycie? Ci chacia b prosta pryrost?
Vyšejzhadanaja zajava dyktatara (jak, zrešty, i mnohija inšyja) była raźličana na toje, što rasiejskija žurnalisty pavierać jamu na słova i nie stanuć paraŭnoŭvać skazanaje choć by z aficyjnaj infarmacyjaj.
A ciapier, mabyć, samaja znakamitaja historyja, źviazanaja z adkryćciami biełaruskaha kiraŭnika na sustrečach z rasiejskimi žurnalistami. U 2006 hodzie kiraŭnik Biełarusi raskazaŭ, što ŭ kałhasie, pradadzienym Nacbanku, dajarki atrymlivajuć pa 600 dalaraŭ za miesiac. Hazieta «Salidarnaść» pa haračych śladach źviarnułasia tady ŭ padšefnuju haspadarku Nacyjanalnaha banka -- AAT «Aleksandryjskaje» - i pracytavała słovy Łukašenki, čym vielmi raźviesialiła supracoŭnic buchhałteryi. Adśmiajaŭšysia, jany raspaviali, što siaredni zarobak u dajarak składaje kala 600 tysiač rubloŭ (pa tym kursie heta mienš za 300 dalaraŭ).
Tym nie mienš,
na nastupnaj pres-kanfierencyi, u 2007 hodzie, biełaruski kiraŭnik «davioŭ» zarobak dajarak da 700-800 USD. A na letašniaj sustrečy z rasiejskimi žurnalistami hetaja ličba vyrasła ŭžo da 1000 dalaraŭ.
Na žal, Nacyjanalny statystyčny kamitet nie pryvodzić asobnych dadzienych pa dachodach dajarak. Ale dla taho, kab zrabić vysnovy, dastatkova aznajomicca z aficyjnymi źviestkami ab zarobkach ahraryjaŭ u cełym.
Za studzień-žnivień 2010 hoda siaredniaja naličanaja zarpłata ŭ sielskaj haspadarcy skłała 776.541 rubiel (kala 250 dalaraŭ pa ciapierašnim kursie).
Kamientary