Ekśpiert: Biełaruś zastaniecca ŭ poli ŭździejańnia i Rasii, i Zachadu

Maskva nie zacikaŭlena ŭ źmienie Łukašenki, a Brusiel nie hatovy stymulavać źmienu palityčnaha režymu ŭ Biełarusi. Ab hetym u śniežańskim numary časopisa The World Today, analizujučy pieradvybarčuju situacyju ŭ našaj krainie, piša kiraŭnik prahramy «Rasija — Jeŭraźviaz» finskaha Instytuta mižnarodnych adnosinaŭ Arkadź Mošes.

«Dyjałoh rasijskich i jeŭrapiejskich dypłamataŭ stvaryŭ uražańnie, što staŭleńnie Jeŭropy i Rasii da Biełarusi moža być kanvierhientnym. Heta aznačała b, što abodva baki buduć padtrymlivać palityčnyja źmieny ŭ krainie, što, u svaju čarhu, dazvolić stvaryć vialiki cisk na Łukašenku. Kali Minsk atrymlivaje kanvierhientnyja sihnały z Maskvy i Brusiela, jość vialikaja vierahodnaść, što prezidenckija vybary ŭ Biełarusi buduć bližej da demakratyčnych standartaŭ», — adznačaje ŭ svaim artykule Arkadź Mošes.

Tym nie mienš, kaža ekśpiert, u realnaści pohlady Jeŭraźviaza i Rasii na Biełaruś adroźnivajucca. U toj čas jak JEZ i Zachad u cełym najpierš zacikaŭleny ŭ palityčnaj libieralizacyi i ekanamičnych reformach, Rasija choča bačyć Biełaruś nadziejnym udzielnikam svajho prajekta pa reintehracyi postsavieckaj prastory.

«Naŭrad ci, JEZ siońnia budzie stymulavać źmienu palityčnaha režymu ŭ Biełarusi. Choć Złučanyja Štaty i razhladajuć jaje jak krainu-izhoj, situacyja z pravami čałavieka tut nie našmat horš, čym u niekatorych inšych krainach — udzielnikach prahramy „Uschodniaje partniorstva“. Całkam vierahodna, Brusiel zadavolicca peŭnym prykmietami demakratyzacyi, bo bolš kłapocicca ab kirunku, čym ab chutkaści pracesu. A hetaha možna dasiahnuć i z Łukašenkam va ŭładzie, — piša kiraŭnik prahramy „Rasija — Jeŭraźviaz“ finskaha Instytuta mižnarodnych adnosinaŭ. — Maskva nasuprać, niahledziačy na ciapierašniuju žorstkuju rytoryku, nie zacikaŭlena ŭ źmienie režymu. Niama nijakich harantyjaŭ, što novy prezident kardynalna nie pavierniecca da Zachadu. U rešcie rešt, u Biełarusi niama prarasijskaj apazicyi, jakaja była b całkam pradkazalnaj dla Maskvy… Padtrymka alternatyŭnaha kandydata ŭ Biełarusi moža stać znakavaj dla samich rasijcaŭ. U ich źjavicca mahčymaść pierakanacca, što ŭ apazicyi jość šaniec pryjści da ŭłady šlacham vybaraŭ. A heta davoli ryzykoŭna dla Kramla, bo praz dva hady ŭ Rasii taksama adbuducca prezidenckija vybary».

Pry hetym palitołah pierakanany, što Maskva nie praciahnie subsidziravańnia Biełarusi, kali Łukašenka i nadalej budzie padtrymlivać postsavieckuju intehracyju adno na słovach. Ale zmoža dapamahčy finansava, kali źjaviacca adčuvalnyja prykmiety taho, što Biełaruś hatovaja da reintehracyi z Rasijaj.

Ekśpiert zaŭvažaje, što ŭ ciapierašniaj situacyi ŭ kiraŭnictva Biełarusi jość davoli šyrokaje pole dla manieŭraŭ. Hetak zamiest praviadzieńnia demakratyčnych reformaŭ možna adkryć krainu dla prytoku zamiežnych inviestycyj, ekanamičnaj libieralizacyi. Što da stasunkaŭ z Rasijaj, jość mahčymaść umacavańnia adnosin u śfiery biaśpieki (ad sumiesnaj sistemy supraćpavietranaj abarony da ŭdziełu ŭ ADKB), a taksama atrymańnia dyvidendaŭ ad dałučeńnia da Mytnaha sajuzu, jaki harantuje Biełarusi bolš nizkija mytnyja płaciažy na enierharesursy. Dla taho, kab prademanstravać manieŭranaść źniešniaj palityki, Biełaruś sprabuje ŭklučyć u rehijanalnuju hulniu Kitaj ź jahonymi kredytnymi i inviestycyjnymi resursami.

«Uličvajučy ŭsie abstaviny, całkam mahčyma, što paśla śniežańskich vybaraŭ Maskva, viedajučy što joj nie pad siłu zrynuć režym Łukašenki, prapanuje zamireńnie. Paśla hetaha budzie dasiahnuty časovy i chistki kampramis pamiž Biełaruśsiu i Rasijaj, — prahnazuje Arkadź Mošes. — Adnak takaja situacyja nie praciahniecca doŭha. Biełaruś i paśla vybaraŭ zastaniecca ŭ poli ŭździejańnia Rasii i Zachadu. Takaja taktyčnaja pazicyja budzie vyhadnaja jak Maskvie, tak i Minsku».

Adnak palitołah pierakanany, što «heta jašče nie kaniec historyi». Pavodle jahonych słoŭ, ciapierašniaja pazicyja dapamoža Łukašenku vyjhrać jašče trochi času. Času, nieabchodnaha dla pabudovy biełaruskaj identyčnaści dy ideałohii Biełarusi jak niezaležnaj jeŭrapiejskaj dziaržavy, a nie zachodniaha rehijona svajho rasijskaha susieda.

• 0
• 0
• 0
• 0
• 0
• 0
• 0
• 0